Read Imbabura Highland Quichua ROMANOS 2 Bible Online

ROMANOS 2 - Imbabura Highland Quichua bible

ROMANOS 2

¹Maijan cashpapash ñucaca alimi cani nishpa, shuj runata llaquichij runalla, ima nishpa ricurinatapash na charinguichu. Shujta llaquichishpaca, canllatami ninandapacha llaquichi tucungapaj shina nijungui.

²Ashtahuangarin chashna nalita rurajcunataca, Taita Diosca na llullashpa llaquichinatami yachanchi.

³Shujcuna nalita rurajpi, caica llaquichi tucunapachami nishpa parlaj runalla, cambash chashnallatami nalita rurajungui. Canga, ¿Taita Dios llaquichinamandaca pacajui ushashami yanguichu?

⁴¿Dios ninanda juyajujta, na fiñarishpa shuyajujta, jatun llaquij cajtachu yangapi churangui? ¿Diospajman tigrarichun canda juyashpa shuyajujtachu yangapi churangui?

⁵Ashtahuangarin canga, shinlliyashcapacha cashpa, cambaj shungupipash na llaquirishca cashpami, Taita Dios imatapash cashcatapacha rurashpa llaquichimui punllapaca, ashtahuan llaquichi tucungapaj mirachijungui. Chai punllapimi, Diosca ninanda fiñashpa, can nali cashcatapacha ricuchishpa llaquichijunga.

⁶Imashna rurashcashnallatami, Diosca tucuicunaman cujunga.

⁷Aligutalla rurashpa catijcunamanmi, causaita causagrinata caranga. Paicunaca, juyailla canata, causaita causagrinatami mascanajun.

⁸Ashtahuangarin fiñanajushpalla causajcunata, na llullashpa villajuj shimitapash na cazushpa, ashtahuangarin imatapash cashcatapacha na ruranatara cazushpa causajcunataca, Diosca ninandapacha fiñashpami llaquichijunga.

⁹Nalitalla rurashpa causanajuj tucui gentecunamanmi, jatun llaquita, ninan llaquita cachamunga. Pundaca, Judea llactamanda gentecunamanra, shinallata griego nishca gentecunamambashmi cachamunga.

¹⁰Ashtahuangarin alita rurashpa tucui causajcunamanmi, juyailla canatapash, ninanda alicachi tucunatapash, casilla ali causaigutapash caranga. Pundaca, Judea llactamanda gentecunamanra, shinallata griego gentecunamambashmi caranga.

¹¹Taita Diospaca, ñavipi ricushpalla agllanaca napacha tianllu.

¹²Ashtahuangarin mandashca shimita na yachaimanda juchata tucui rurajcunaca, mandashca shimita na yachashpallatami, chingaita chinganajunga. Ashtahuangarin chai mandashca shimita yachashpata juchata tucui rurajcunaca, chai mandashcapi nijunshnallatami llaquichi tucunga.

¹³Taita Diospaj ñaupajpi imatapash cashcatapacha rurashpa causajcunaca, mandashcata uyashpalla causajcunaca na canllu. Ashtahuangarin mandashcata cazushpa pactachijcuna cajpimi paicunataca, imatapash cashcatapacha rurashcatashna Diosca chasquijun.

¹⁴Na israelcunaca mandashcata na charishpapash yarishpa rurashpallami, chai mandashcapi nijujtashna ruranajun. Mandashcata na charishpapash, paicunapaca chaicunaca mandashcallatami.

¹⁵Chai mandashcata shungupi escribishcashna charishpami, mandashcapi nijunshna imashna causashcata ricuchinajun. Paicunapaj shungupillata imatapash yachashpami nalicachin, na cashpaca paicunapaj yuyaicunata alicachin.

¹⁶Taita Dios llaquichijui punllapimi Jesucristoca, gentecuna imata pacalla yarinajushcata ricuchimunga. Chashnallatami, ali villaita villajuni.

¹⁷Ricui canga, Judea llacta runa ni tucushcami cangui. Mandashca shimitami yariajlla causangui. Shinallata Taita Diospimi cushijungui.

¹⁸Imata rurachun Dios munajtapash yachanguimi. Mandashca shimi yachachijpimi, imatapash ashtahuan aliguta ruranata yachangui.

¹⁹Ñausashna causajcunatapash pushajmi cani, yana yana tutapishna causajcunatapash punchayachijmi cani yashpami, chaita yariajlla causajungui.

²⁰Nara yachajushcacunaman, aliguta entendichijmi cani. Huahuashna causajcunaman yachachijmi cani yanguimi. Mandashca shimimanda na llullashpa villajuj shimimandami, ali yachaita charini yanguimi.

²¹Shujcunaman yachachij runa, ¿imashpata canra na yachajungui? “Na shuhuanachu” nishpa villajushpapash, ¿imashpata shuhuanguilla?

²²“Na huainayanachu” nijushpapash, ¿imashpata huainayanguilla? Yanga dioscunata millanayachishpapash, ¿imashpata chai dioscuna tiajuj huasimandaca shuhuanguilla?

²³Mandashca shimita yachashpa jariyashpapash, ¿imashpata chai mandashca shimita na cazushpa, Taita Dios alicachi tucushcatapash huaglichijungui?

²⁴Escribishcapica cashnami nijun: “Cangunamandami na israelcunaca, Taita Diospaj shutita nali shimicunata rimanajun” nijunmi.

²⁵Mandashca shimipi nijujta can pactachijpica, circuncisión nishcata can rurashcapash alipachami. Ashtahuangarin mandashca shimipi nijujta can na cazujpica, circuncisionda can rurashcapash, circuncisionda na rurashcashnami.

²⁶Circuncisionda na rurashca runa cashpapash, mandashcapi imata nijujta pactachijushpaca, ¿nachu circuncisionda rurashcashnallata, Diospaj ñaupajpica ricuringa?

²⁷Circuncisionda na rurashca cashpapash, mandashcapi nijujta aligutapacha pactachijcunaca, candarami llaquichi tucunapipacha churanga. Escribishpa mandashcata yachashpapash, circuncisionda rurashca cashpapash, canga na cazujmi cangui.

²⁸Gentecunapaj ricuipilla Judea llacta runa cashpapash, napacha chai purachu. Aichapi circuncisionda rurashca cashpapash, napacha circuncisionda rurashcachu.

²⁹Ashtahuangarin ucu shunguta circuncisionda rurashca runami, Judea llacta runa. Diospaj Espirituca, shungutami circuncisionda ruran. Mandashca shimica, na chashna rurai ushanllu. Paita alicachinaca, na gentecunamanda shamunllu, ashtahuangarin Taita Diosmandami shamun.