Read Imbabura Highland Quichua ROMANOS 3 Bible Online

ROMANOS 3 - Imbabura Highland Quichua bible

ROMANOS 3

¹Judea llacta runaca, ¿ima alitata charin? Circuncisión nishcata rurashcapash, ¿imapajta ali?

²Chaica, tucui imapajpash alipachami. Taita Diosca, paicunamanmi paipaj Shimitaca, punda carashca.

³Paicuna puramandapash huaquingunaca, na crijcunachu. Paicuna na crijllapi, ¿Taita Diospash imatalla rurasha nishcata na pactachishpa saquingallachu?

⁴Napacha shinachu. Ashtahuangarin Taita Diosca pactachijpachami. Runacunaca, tucuicuna llullacunami. Escribishcapica, paimandaca cashnami nijun: “Imata can nijushcamandami: ‘Canga, imatapash cashcatapacha rurajmari cangui’ ni tucungui. Shinallata canda nalicachijpipash, aliguta mishanguimi” nijunmi.

⁵(Runa cashpami, runashnallata parlagrini). “Ñucanchi imatapash cashcatapacha na rurajpimi, Taita Diosca ashtahuan imatapash cashcatapacha rurashpa ricuchijun”, ¿ninachu canchi? “Pai ñucanchita llaquichishpaca, nalitami ruran” ¿ninachu canchi?

⁶Napacha shinachu. Taita Diospash nali cashpaca, cai pachapi causajcunatapash napacha llaquichi ushanmanllu.

⁷“Ashtahuangarin ñuca llullashcamandami, na llullaj Taita Dios punchapamba cajtaca ashtahuan ricuchini” ¿ninachu canchi? Paica, ¿imashpata juchayutashna llaquichigrihuan?

⁸“Ima aliguta japingapajpash, nalitamari rurana canchi ninajunmi” nishpami, ñucanchitaca yangata juchachinajun. (Paicuna ninajuj ali cajpica, ¿nachu chashna causanalla canchi? Chashna nishpa purijcunaca, ninanda llaquichi tucunapachami).

⁹¿Ima nishunda? ¿Ñucanchi Judea llacta gentecunaca, na israelcunatapash yali alichu canchi? Napacha shinachu. “Judea llacta gentecunatapash, na israelcunatapash juchami mandajun” nishpa, ña nircanchimi.

¹⁰Escribishcapica cashnami nijun: “Imatapash cashcatapacha ruraj runaca, shujllapash na tianllu.

¹¹Yuyaita japishpa causajca, pipash na tianllu. Taita Diosta mascajpash, pipash na tianllu.

¹²Diosmandaca tucuicunami anchurirca. Tucuillami nalicunapacha tucushca. Aliguta rurashpa causajpash, pipash na tianllu. Shujllapash na tianllu.

¹³Paicunapaj cungapash, huañushcata pambana utujuta pascashcashnami tucushca. Paicunapaj jalluhuanmi umachinajun. Paicunapaj shimi ucupica, millai culebrapaj venenoshnami tiajun.

¹⁴Paicunapaj shimipica, nalicachishpa rimashpa ninanda llaquichina jundami.

¹⁵Paicunaca, huañuchishpa yahuarta jichangapajpash, uchami rinajun.

¹⁶Paicunapaj causaipica ñutui tucushpa, llaquichi tucunallami tian.

¹⁷Casilla ali causaitapash, paicunaca na rijsircachu.

¹⁸Paicunaca, Taita Diospaj ñaupajpipash na manllashpami causanajun” nijunmi.

¹⁹Shina cajpipash mandashcapi imatalla nijujcunaca, mandashca shimicuna mandajpi causajcunamanmi yachachijun. Tucuicuna imata rurashcatapash, Taita Dios ricuchinapacha cajpimi, paipaj ñaupajpi tucuicuna upalla cachun, shina yachachijun. Chaitaca yachanchimi.

²⁰Mandashcapi imata nijujta rurashcamandalla, maijan runapash Diospaj ñaupajpica imatapash cashcatapacha rurashcashnaca na ricuringachu. Mandashca shimicunaca, juchata rurajcuna cajtallami yarichijun.

²¹Ashtahuangarin cunanga, mandashca shimicunapaj jipaca, Taita Diosca imatapash cashcatapacha ruraj cajtami ricuchimushca. Chaitaca, mandashca shimicuna shinapacha canata ricuchishcashna, Dios ima nishcata villajcuna villashcashnami ricuchimushca.

²²Jesucristota crishcamandalla Taita Diosca, imatapash cashcatapacha rurachun tucui paita crijcunata chasquijujtami ricuchijun. Paipaca, shujtalla agllashpa ricunaca na tianllu.

²³Tucuicuna juchata rurashcamandami, Taita Diospaj punchapambagumanda anchuchi tucushca causanajun.

²⁴Ashtahuangarin Dios ninanda juyashpa, Cristo Jesusmanda quishpichishpa, imatapash cashcatapacha rurashcatashna chasquishca jahuami, chashna anchurishpa causanajun.

²⁵Taita Diosca Jesucristotami, yahuarta jichashpa huañuchun cachamurca. Paita crijpica, quishpichijuchunmi cachamurca. Diosca, imatapash cashcatapacha ruraj cajta ricuchingapajmi cachamurca. Diosca, na ñapash fiñarijlla cajpi, ñaupa causajcuna juchata ashtahuan rurashcamandami cachamurca.

²⁶Cunan punllacunapi paica imatapash cashcatapacha ruraj cajta ricuchingapajmi, juchacunata anchuchijun. Jesusta crijpimi, Diosca imatapash cashcatapacha ruraj cashpa, imatapash cashcatapacha rurajtashna chasquijun.

²⁷Shina cajpica, ¿jariyanaca maipita? Chaica anchuchi tucushcami. ¿Maijan mandashcata tucuchishcanga? ¿Mandashca shimicunata pactachishcachu tucuchishcanga? Na chashnachu. Ashtahuangarin Jesusta crinata mandashcata ñucanchi chasquishcami tucuchishca.

²⁸Shina cashpami, cashnataca aliguta yachanchi: Chai mandashcata na pactachijpipash crijpillami, Diosca imatapash cashcatapacha rurashcatashna, pitapash chasquijun.

²⁹Taita Diosca, ¿Judea llacta gentecunapajllachu Taita Dios? ¿Nachu na israelcunapajpash Taita Dios? Ari, na israelcunapajpash Taita Diospachami.

³⁰Taita Diosca, shujllami tian. Shina cashpami crijpica, circuncisión nishcata rurashca runacunatapash, na circuncisionda rurashca runacunatapash Diosca, imatapash cashcatapacha rurashcatashna chasquinga.

³¹Shina cashpaca, ¿crij cashcamandaca mandashcataca yangapichu churana canchi? Napacha shinachu. Ashtahuangarin chai mandashcataca, shinllitapachami churanchi.