Read Imbabura Highland Quichua ROMANOS 5 Bible Online

ROMANOS 5 - Imbabura Highland Quichua bible

ROMANOS 5

¹Jesusta crijpi imatapash cashcatapacha rurashcatashna ñucanchita Dios chasquijpimi, Jesucristomandaca Taita Dioshuan casilla ali causaita charinchi.

²Paimandami ñucanchica, Dios ninanda juyajujpi, paita crishpa shinllitapacha catinatapash charinchi. Shinallata Taita Diospaj punchapamba llactapi causagrinata shuyanajushpami, ninanda cushijunajunchi.

³Na chaimandalla cushijushpami, ashtahuangarin ninan llaquicuna japijpipash cushijunchi. Llaquica, na ñapash fiñarishpa causanata yachachijujtami yachanchi.

⁴Na ñapash fiñarishpa causanaca, imashna catijta yachangapaj, shinallata imashna catijta yachanaca, Diosta shuyanata yachachijujtami yachanchi.

⁵Chashna shuyanaca, na pingaichinllu. Taita Diosca, ñucanchita ninanda juyajujpijmi, na pingai tucushun. Jucha illaj paipaj Espiritutami, ñucanchi shungupi tiachun talinshna caramurca.

⁶Ñucanchi imata na rurai ushajcuna cajpipash Cristoca, pai huañuna punllapimi, Diosta na manllajcunamandaca huañurca.

⁷Imatapash cashcatapacha ruraj runamandaca, pipash na huañunmanllu. Ashtahuan alipacha runamandaca, ñuca huañushallami nishpa, maijambash huañunmanllari.

⁸Ashtahuangarin Taita Diosca, paipaj juyaitami ñucanchiman ricuchimujun. Ñucanchi juchayu cajpipash, Cristomi ñucanchimanda huañurca.

⁹Cristopaj yahuarhuan ñucanchita imatapash cashcatapacha rurashcatashna chasquishca jahuami Diosca, ñucanchita fiñashpa llaquichinamandapash quishpichinga.

¹⁰Diosta fiñajcuna cashpapash, paipaj Churi Cristo huañujpimi, Taita Dioshuan ali tucurcanchi. Cristo huañushpa causarishcamanda Dioshuan ali tucushcamandacarin, ashtahuanmi quishpichi tucushun.

¹¹Na chaillapashchu, ashtahuangarin ñucanchi Apunchi Jesucristomanda, Dioshuan ali tucushcamandaca, cunanga ninanda cushijunatapashmi charinchi.

¹²Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun.

¹³Mandashca shimicuna nara tiajpillatami, cai pachapica juchata rurai callarirca. Ashtahuangarin mandashca shimicuna illajpica, juchatami rurashcangui nishpa juchachinapash na tianllu.

¹⁴Ashtahuangarin Adanmandapacha Moisés shamungacamanmi, huañuica mandajurca. Adanga, Taita Dios mandashcata na cazushpami, juchata rurajurca. Na paishnalla juchata rurajcunatapashmi, huañuica mandajurca. Adán runaca, shuj runa jipaman shamunatami ricuchijurca.

¹⁵Adán runa Diosta na cazujpipash, Diosca shuj aligutami caramurca. Imashnami shujlla runa Diosta na cazujpi, ashtacacuna huañunajurca. Chaitaca yalimi Taita Diospaj ninan juyaipash aliguta caramushcapash, ashtacacunapaj chayamurca. Ninanda juyashpa quishpichijuchun, shuj runata caramujpimi chayamurca. Paica Jesucristomi.

¹⁶Shujlla runa juchata rurashpa causajpipash, Diosca ashtahuan aligutami caramurca. Shujlla runa juchata rurashpa callarijpimi, ninanda llaquichi tucunapash callarirca. Ashtahuangarin ashtacacuna na cazujpimi, imatapash cashcatapacha rurashcatashna Dios chasquishpa aliguta caranapash chayamurca.

¹⁷Shujlla runa na cazuimandami, huañuica mandajurca. Ashtahuangarin chaitapash yalimi Jesucristomandaca, paihuanllata causashpa mandanajunga. Dios paipaj ninan juyaita caramunata, shinallata imatapash cashcatapacha ruranata caramushcata japijcunami mandanajunga.

¹⁸Shujlla runa na cazushcamandami, llaquichi tucunaca callarirca. Shinallata shujlla runa imatapash cashcatapacha rurangapaj shamushcamandami, imatapash cashcatapacha rurashcatashna Dios tucuicunata chasquishpa, causaita causagrinata caranapash chayamurca.

¹⁹Shujlla runa na cazujpimi, ashtacacuna juchayu tucushca. Shinallata shujlla runa cazushcamandami, ashtacacuna imatapash cashcatapacha rurajcuna canga.

²⁰Jucha ashtahuan mirachunmi, mandashca shimicunaca yaicumurca. Jucha ashtahuan yaicumujpimi, Diospaj ninan juyaipash ashtahuan ninandapacha shamurca.

²¹Imashnami juchata rurajpi huañui mandajurca, shinallata Diospaj ninan juyaipash, imatapash cushcatapacha rurashcatashna chasquishpa, mandajuchunmi churarca. Ñucanchi Apunchi Jesucristomanda causaita causagrinata charichunmi, chashna mandachun churarca.