Read Imbabura Highland Quichua ROMANOS 6 Bible Online

ROMANOS 6 - Imbabura Highland Quichua bible

ROMANOS 6

¹Shina cajpica, ¿imatata nina canchi? Dios ashtahuan ninanda juyachunga, ¿juchatachu ashtahuan rurashpa catina canchi?

²Napacha shinachu. Ashtahuangarin juchata ama ashtahuan rurangapaj huañushcashna cashpaca, ¿imashnata ashtahuanga chai juchatallata rurashpa causashunchiyari?

³Cristo Jesushuan shujlla tucungapaj bautizai tucushcacunaca, pai huañushcashna causangapajmi bautizarircanchi. Chaitaca, ¿nachu yachanguichi?

⁴Bautizarishpaca, Cristohuan huañushcashna causangapajmi, paihuanllata pambai tucurcanchi. Cristotaca, huañushcacunapaj chaupimandami paipaj Taitaca, paipaj punchapambahuan causachirca. Chashnallata ñucanchipash mushuj causaipi causangapajmi, pambai tucurcanchi.

⁵Imashnami Cristohuan huañushcashna cashpa paihuan pambai tucurcanchi, chashnallatami pai causarishcashna ñucanchipash causarina canchi.

⁶Cashnatami yachanchi: Ñucanchita juchata rurachun punda nalita yarichijuj munaicunaca, Cristohuan cruzpi chacatai tucujpimi, tucurishca. Shina cashpami, juchataca na ashtahuan servinajunchi.

⁷Ashtahuangarin maijan cashpapash Cristohuan huañushcashna cashpaca, jucha nalita rurachijujmandaca imatapash cashcatapacha rurashcashna chasqui tucushcami.

⁸Cristohuan huañushcashna cashpami, paihuan causagrinatapash crinchi.

⁹Huañushcacunapaj chaupimandami, Cristoca causarirca. Cutinga na huañunatami, paitaca yachanchi. Huañuica, cutinga na paitaca mandashpa charijunllu.

¹⁰Paica, tucuicunapaj juchamandami shuj viajella huañurca. Ashtahuangarin causarishpaca, Taita Diospajllami causajun.

¹¹Chaimandami cangunapash, cashna yarina canguichi: Juchata ama rurangapaca, huañushcashnami canchi. Ashtahuangarin ñucanchi Apunchi Cristo Jesusmandaca, Taita Diospajlla causaj cashcatami yarina canchi.

¹²Shina cashpami, cangunapaj huañunalla cuerpopi jucha mandachunga, napacha saquina canguichi. Nali munaicuna yarichijujtapash, napacha cazunachu canguichi.

¹³Shinallata cangunapaj cuerpopi tucui tiajtapash na juchaman saquinachu canguichi. Ashtahuangarin huañushcacunapaj chaupimanda causarishcashna cashpami, Taita Diospaj cachun cangunallata cuna canguichi. Cangunapaj cuerpopi ima tiajtaca, imatapash cashcatapacha rurachunmi, Taita Diosman saquina canguichi.

¹⁴Shina rurajpimi juchaca, na ashtahuan mandashpa chari ushanga. Cangunaca, mandashca shimicuna mandajpica, na causanajunguichichu. Ashtahuangarin Dios ninanda juyajujpimi causanajunguichi.

¹⁵Dios ninanda juyajujpimi, mandashca shimicunaca na ashtahuan mandai ushan. Shina cashpaca, ¿juchata rurashpa catinallachu canchi? Napacha shinachu.

¹⁶Maijambaj gañan tucushpaca, ¿nachu paita cazungapaj gañan tucunguichi? Chaitaca, ¿nachu yachanguichi? Shinallatami maijanda cazushpa causajushpapash, chaipaj gañan canguichi. Jucha mandajujtara gañanshna cazushpaca, huañushpa chingagrinami canguichi. Ashtahuangarin Diosta cazujushpaca, imatapash cashcatapachami ruranajunguichi.

¹⁷Ashtahuangarin Taita Diostami, pashi nini. Cangunaca, gañanshna juchatara cazushpa punda causashca cashpapash, Diosmanda yachachijujta tucui shunguhuan chasquishpami cazunajunguichi.

¹⁸Shinamandami, juchata rurashpa causajujmandaca Dios cacharichijpi, imatapash cashcatapacha rurajcuna tucushcanguichi.

¹⁹Cangunaca, runa cashcamanda nara shinlli cajpimi, ñucapash runashnallata parlajuni. Pundaca nalita rurangapajmi, cangunapaj cuerpopi ima tiajtapash, mapatalla rurashpa nalita rurachun saquircanguichi. Chashnallatami cunanga, Diospajlla causangapaj cangunapaj cuerpopi ima tiajtapash, imatapash cashcatapacha rurashpa servingapaj cuna canguichi.

²⁰Juchapaj gañan cashpami, imatapash cashcatapacha ruranamanda cacharishcami causarcanguichi.

²¹¿Shina causashpaca, ima alitata japircanguichi? Cunambica, chaita yarishpami pingai tucunguichi. Chai rurashcacunaca, huañuimanmi apajurca.

²²Ashtahuangarin juchata rurashpa causajujmanda Dios cangunata cacharishcamandaca, cunanga Taita Diostalla servijcunami tucurcanguichi. Shina tucushpami, grano fucunshna Diospajlla causanata japircanguichi. Chaita japijushcamandaca, causaita causagrinatami charinguichi.

²³Juchata rurashpa causajcunamanga, huañushpa chingagrinatami cujun. Ashtahuangarin ñucanchi Apunchi Cristo Jesusmandami, causaita causagrinata Taita Diosca yanga caramujun.