Read Imbabura Highland Quichua 1 CORINTIOS 1 Bible Online

1 CORINTIOS 1 - Imbabura Highland Quichua bible

1 CORINTIOS 1

¹Taita Dios munashpa cayajpi, Jesucristomanda villachun cachashca Pablomi cani. Sóstenes shuti huauquindimi,

²Corinto pueblopi tandanajuj, Taita Diospajlla causanajuj crijcunaman escribimunchi. Cangunaca, Cristo Jesusmandami Diospajlla tucushcanguichi. Cangunaca, ñucanchi Apunchi Jesucristopaj shutipi*, maipi cashpapash mañajcunahuan, paipajlla causachun cayai tucushcacunami canguichi. Jesucristoca paicunatapash, ñucanchitapash Mandajmi.

³Ñucanchi Taita Diospash, Apunchi Jesucristopash ninan juyaita, casilla ali causaiguta, cangunaman carachunmi munanchi.

⁴Cangunamandaca, ñuca Taita Diostaca ima horapash pashi nijunillami. Cristo Jesusmanda Taita Diosca, cangunata ninanda juyashpa imagutapash caramujushcamandami, pashi nijuni.

⁵Cristomandami, tucuipi charijyachishpa, tucui juyailla shimicunatapash, tucuita yachajunatapash carashca.

⁶Shinallatami, Cristomanda villajuj Shimitapash, cangunapaj shungupi shinllitapacha churashca.

⁷Chaimandami, Dios imatapash aliguta carajpi imapash na illajpi causanguichi. Ñucanchi Apunchi Jesucristo shamunata shuyashpami causanajunguichi.

⁸Diosmi tucurimui punllacaman, cangunataca shinllichinga. Shina cashpami, ñucanchi Apunchi Jesucristo tigramui punllapica, na juchachi tucunguichi.

⁹Taita Diosca, imatapash pactachij cashpami, paipaj Churi ñucanchi Apunchi Jesucristohuan shujlla tucushpa causachun, cangunataca cayarca.

¹⁰Huauquicuna, panicuna, ñucanchi Apunchi Jesucristopaj shutipimi*, cangunataca cashna nipani: Tucuilla shujllashnalla yarishpami parlana canguichi. Canguna purapica, na shicanyarinachu canguichi. Ashtahuangarin alipacha shujlla yuyai tucushpami, chashnatallata yarishpa causana canguichi nipanimi.

¹¹Juyashca crijcuna, Cloé shuti huarmipaj familia villaj shamujpica, canguna purapica fiñanajushpa ninanda rimarijushcatami uyarcani.

¹²Caitami ningapaj munani: Canguna purapica, cashnami ninajunguichi ninga: “Ñucaca, Pablota catijmi cani. Ñucaca, Apolos shuti runata catijmi cani. Ñucaca, Cefas shuti runata catijmi cani. Ñucaca, Cristota catijmi cani” nirinajunguichi ninga.

¹³¿Cristoca chaupirishcachu? ¿Pablo ñucachu cangunamandaca, cruzpi chacatai tucushpa huañurcani? Na cashpaca, ¿Pablopaj shutipichu bautizai tucurcanguichi?

¹⁴Taita Diostami pashi nini. Cangunataca, maijandapash na ñuca bautizarcanichu. Crispo shuti, Gayo shuti runacunatallami ñuca bautizarcani.

¹⁵Cangunaca ama: “ñucaca, Pablopaj shutipimi bautizarircani” ninajuchunmi, pitapash na bautizarcani.

¹⁶Shinallata Estéfanas shuti runatapash, paipaj huasi ucu purandimi bautizarcani. Ashtahuanga maijandapash, shujta bautizashcataca na yarinichu.

¹⁷Cristoca, bautizachunga na cachamuhuarcachu. Ashtahuangarin ali villaita villachunmi cachamuhuarca. Alipacha yachajushca shimicunahuan villachunga, na cachamuhuarcachu. Chashna cachamujpica, Cristota chacatashpa huañuchishcami yanga canman carca.

¹⁸Cristota cruzpi chacatashcata villashca shimicunaca, chingaita chingangapaj rijcunapaca, juizu illaj runa parlarijunshnami uyarin. Ashtahuangarin ñucanchi quishpirishcacunapaca, chai shimicunaca Taita Dios ninan ushaita charijtami ricuchijun.

¹⁹Escribishcapica cashnami nijun: “Alipacha yachajushcacuna yachajushcataca tucuchishami. Shinallata ali yuyaita charijcuna, ali yuyaita charishcatapash yangapimi churasha” nijunmi.

²⁰¿Alipacha yachajushca runaca, maipita? ¿Escribij runaca, maipita? ¿Cai pachapi imapash tiajta rimaj runaca maipita? ¿Nachu Taita Diosca, cai pachapi ali yachaitaca, juizu illanshna ricurichun churashca?

²¹Cai pachapi causanajuj alipacha yachajushcacunaca, Taita Diospaj ali yachaitaca, na yachai usharcachu. Juizu illaj runa parlarijunshna villashca shimita uyashpa, crishcacunataca chai ali yachaimandami Taita Diosca cushijushpa quishpichin.

²²Judea llactapi causajcunaca, imatapash juyaillata rurashpa ricuchihuai ninajunmi. Griego* nishca gentecunaca, ali yachaitami mascanajun.

²³Ashtahuangarin ñucanchica, Cristota chacatashcatami villanajunchi. Chaica, Judea llacta gentecunataca, nitijachij rumishnami. Na israelcunapaca*, juizu illaj runacuna parlashcashnami.

²⁴Ashtahuangarin Judea llactamanda cajpi, griegocuna cajpipash, Dios cayashcacunapaca, Taita Dios ninan ushaita charijta, ali yachaita charijtami Cristoca ricuchijun.

²⁵Taita Dios juizu illajtashna rurashcami, gentecunataca ashtahuan yali alipacha yachajushca ricurin. Shinallata imatapash na rurai ushajtashna Taita Dios rurashcami, gentecunataca ashtahuan yali ushaita charin.

²⁶Huauquicuna, panicuna, cangunata Dios cayashcataca aliguta yarichi. Canguna purapica, cai pachapi alipacha yachajushcacuna, ushaita charijcuna, ninanda alicachi tucushcacunapash, na taucacunachu canguichi.

²⁷Ashtahuangarin alipacha yachajushcacunata pingaichingapajmi, cai pachapi imatapash na yachajcunatara, Taita Diosca agllashca. Shinallata ninan ushaita charijcunatapash pingaichingapajmi, cai pachapi na ushaita charijcunatara agllashca.

²⁸Ashtahuan alimi canchi nijcunata pingaichingapajmi, cai pachapi yangallacunata, yangapi churai tucushcacunatara, Taita Diosca agllashca.

²⁹Diospaj ñaupajpica pipash ama jariyanajuchunmi, chashna agllarca.

³⁰Ashtahuangarin Diosmandami cangunaca, Cristo Jesushuan shujlla tucushcanguichi. Paillatami, Taita Diosmanda ali yachaitapash, imatapash cashcatapacha rurashcashna chasqui tucunatapash, paipajlla causachumbash, quishpirishcacuna cachumbash caramurca.

³¹Escribishcapi nijunshna jariyachunmi, chashna rurarca. Chaipica cashnami nijun: “Maijambash jariyangapaj munashpaca, Jatun Diosmanda jariyachun” nijunmi.