Read Imbabura Highland Quichua 1 CORINTIOS 10 Bible Online

1 CORINTIOS 10 - Imbabura Highland Quichua bible

1 CORINTIOS 10

¹Huauquicuna, panicuna, ñucanchi ñaupa taitacuna imashna cashcatapash yachachunmi munani. Paicunataca, tucuicunata fuyu catichishpa rijujpimi, Puca Cuchatapash tucuicuna chimbanajushca.

²Paicunaca, Moisesta catishpami fuyupipash, mama cuchapipash tucuilla bautizai tucushca.

³Dios carashca micunatapash, tucuicunami micunajushca.

⁴Shinallata tucuicunami, Dios carashca yacutallata ufianajushca. Chai yacutaca, paicunata catishpa purijuj, Diospaj jatun rumimandami tucuicuna ufianajushca. Chai jatun rumica, Cristomi carca.

⁵Shina cajpipash, paicuna puramanda chaupi yali gentecunahuanmi, Taita Diosca na cushijurca. Chaimandami jichushca pambapillata, huañushpa tucurinajurca.

⁶Paicuna nalita ruranata ninandapacha munashcashna, ñucanchipash ama munachun ricuchingapajmi, chashna tucushca.

⁷Paicuna purapi huaquingunaca, yanga dioscunata mañajcunami carca. Cangunaca, na chashna mañanachu canguichi. Escribishcapica cashnami nijun: “Tucuillami micungapaj, ufiangapaj tiarirca. Chai jipaca, pugllangapajmi jatarirca” nijunmi.

⁸Paicuna purapi huaquinguna huainayashcashnaca, na ñucanchipash huainayanachu canchi. Chashnacunaca, shuj punllapillami, ishcai chunga quimsa huarangacuna huañushca.

⁹Paicuna purapi huaquinguna, Jatun Diosta fiñachishcashnaca, ñucanchica na fiñachinachu canchi. Chashnacunaca, culebracuna canijpimi huañushca.

¹⁰Paicuna purapi huaquingunaca, Diosta fiñashpami nalicachishpa rimashca. Chashnaca, napacha rimanachu canchi. Chashnacunataca, huañuchij angelmi huañuchishca.

¹¹Chashnataca ñucanchi ama catichunmi, ñucanchi ñaupa taitacuna imashna tucushcatapash, tucurimui punllacunapi causanajuj ñucanchita yachachingapaj escribishcapica, chashna villajun.

¹²Maijambash shinllipacha crijmi cani nirijushpaca, aliguta yaringuichi, pactara urmanguichiman.

¹³Tucui gentecunata japijuj nalita rurachina munaillatami, cangunatapash japijun. Shina cajpipash Taita Diosca pactachij cashpami, chai nali munaitaca canguna apai ushanatalla japichun saquinga. Ashtahuangarin chai nali munaihuanllatami, canguna shinlli tucushpa mishashpa, chai nali munaimanda llujshinataca, paillata caramunga.

¹⁴Shina cajpi ñuca juyashca crijcuna, cangunaca yanga dioscunata mañanamandaca anchurichi.

¹⁵Aliguta yachajushca gentecunamanshnami cangunaman rimani. Ñuca imata nijujtapash, cangunallata aliguta yaripanguichi.

¹⁶Bendiciashca copamanda Diosta pashi ninajushpaca, ¿nachu Cristopaj yahuarmanda caishuj chaishuj tandanajunchi? Tandata ñucanchi chaupinajushpaca, ¿nachu Cristopaj cuerpomanda caishuj chaishuj tandanajunchi?

¹⁷Shujlla tanda cajpimi, ñucanchica ashtacacuna cashpapash, shujlla cuerposhna canchi. Tucuicuna tandanajushpami, chai tandatallata micunajunchi.

¹⁸Israelcuna imata rurajtapash aliguta yarichi. Diosman carashpa huañuchishca animalcunata micushpaca, ¿nachu tandanajushpa, chai altarmandallata micunajun?

¹⁹¿Imashpata caita nijuni? ¿Yanga diosca imata? Na cashpaca, yanga dioscunaman animalta cushpa huañuchishca aichaca, ¿ali cajpichu chashnaca nijuni?

²⁰Na israelcunaca, animalta huañuchishpapash ayacunaman cushpami huañuchinajun, na Taita Diosman caranajunllu ninimi. Shinamandami cangunapash, ayacunahuan tandanajuchunga na munani.

²¹Cangunaca, Apunchi Jesús carashca copatapash, ayacunaman carashca copatapash ishcandita ufiaitaca, na ushanachu canguichi. Apunchi Jesús carashca micunatapash, ayacunaman carashca micunata micungapaj cangunapash tandanajushpa micuitaca, na ushanachu canguichi.

²²Ñucanchica ishcandita rurashpa, ¿Apunchi Jesusta ninandapacha fiñachingapajchu munanchi? ¿Ñucanchica, paitapash yali shinllichu canchi?

²³Tucui imatapash rurai ushanillami, ashtahuangarin napacha tucuilla alichu. Tucui imatapash rurai ushanillami, ashtahuangarin crijcunataca na tucuilla shinllichi ushanllu.

²⁴Pipash na quiquimbajlla ali cachun, imatapash ruranachu. Ashtahuangarin shujpajpash ali cachunmi, imatapash rurana.

²⁵Aichata jatujuj pushtupi randishpaca, shungupi imatapash na yarishpa, na tapushpa micunguichilla.

²⁶Cai pachapash, cai pachapi ima tiashcapash, Jatun Diospajmi.

²⁷Maijan na crijpash, cangunahuan micungapaj cayajpi rishpaca, imatapash na tapushpa, imata carajpipash micunguichilla. Imatapash ama yarijungapajmi, na tapuna canguichi.

²⁸Ashtahuangarin maijambash: “Cai aichataca, yanga dioscunaman carashcami” nishpa villajpica, na micunachu canguichi. Chai villajpash, paipaj yuyaihuan ama pandachunmi, na micuna canguichi. Cai pachapash, cai pachapi tucui ima tiashcapash, Jatun Diospajmi.

²⁹Cambaj yuyaitaca, na shina ninichu. Ashtahuangarin shujpaj yuyaitami shina nini. Ñuca imatapash rurai ushanalla cajpipash, ¿imashpata shujpaj yuyaimandalla nalicachishca canga?

³⁰Imata cashpapash, Diosta pashi nishpa micushpaca, ¿imashpata Diosta pashi nishpa micujushcamandaca nalicachi tucusha?

³¹Shina cajpimi canguna imata micushpa, ufiashpa, imata rurashpapash, Taita Diosca punchapambagumi cangui ni tucuchun, tucuita rurana canguichi.

³²Imata rurashpapash, Judea llacta gentecunata, na israelcunata, Taita Diospajlla tandanajuj crijcunata nitijachinshna urmachingapaca, na ruranachu canguichi.

³³Ñucapashmi tucuita imata rurajushpapash, tucuicunata cushichingapaj rurani. Ashtahuangarin taucacuna quishpirichunmi, paicunapaj ali cachunga imatapash rurajuni. Na ñucapajlla ali cachun, imatapash ruranichu.