Read Imbabura Highland Quichua 1 CORINTIOS 11 Bible Online

1 CORINTIOS 11 - Imbabura Highland Quichua bible

1 CORINTIOS 11

¹Cristota ñuca imashna catijujta ricushpa, cangunapash ñucashnallata catipaichi.

²Tucui crijcuna, ñucataca na cungashpami, ñuca imata yachachishpa mingashcatapash, aliguta catinajunguichi. Shina cajpimi cangunataca, cushijushpa alicachini.

³Ashtahuangarin caita yarichunmi munani: Cristoca, tucui jaricunatami umashna mandajun. Cusapash, paipaj huarmitaca, umashnami mandajun. Taita Diospash, Cristotaca umashnami mandajun.

⁴Maijan jaripash Diosta mañajushpa, na cashpaca Dios ima nishcata villajushpapash, umata quilparishpaca, paita umashna mandajujtami na cazujun.

⁵Ashtahuangarin maijan huarmipash Diosta mañajushpa, na cashpaca Dios ima nishcata villajushpapash, umata na quilparishpaca, umashna paita mandajtami na cazujun. Chashna rurashpaca, ajchata rutushcashnami ricurin.

⁶Maijan huarmipash, umata na quilparishpaca, ajchata rutuchishpami ali canman. Huarmica, asha ajchata rutuchishpa, na cashpaca tucui tucui rutuchinata pinganayajpica, umata quilparichun ninimi.

⁷Jarica, na umata quilparinachu. Paitaca, Taita Diosmi paiman rijchajta rurashca. Shina cashpami Taita Dios punchapambagu cajta ricuchinajun. Ashtahuangarin huarmica, cusa juyailla cajtami ricuchijun.

⁸Jarica, na huarmimanda llujshishcachu. Ashtahuangarin huarmimi, jarimanda llujshishca.

⁹Shinallata jaritaca, na huarmipaj ali cachun rurashcachu. Ashtahuangarin huarmitami, jaripaj ali cachun rurashca.

¹⁰Shinamandami huarmica, mandajpi causajushcata ricuchingapaj, angelcunamandapash umata quilparina.

¹¹Ashtahuangarin Apunchi Jesusta crijcuna cashcamanda, jarica na huarmita yalichu. Huarmipash, jaritaca na yalichu.

¹²Huarmitaca, jarimanda llujchishpami rurashca. Shinallata jaripash, huarmimandami miranajun. Ashtahuangarin Taita Diosmandami, tucui imapash tiashpa catijun.

¹³Cangunallata aliguta ricushpa yaringuichi: Taita Diosta mañajushpa, ¿huarmica umata na quilparishpa mañashpachu ali canga?

¹⁴Jaricuna ajchata viñachun saquishcamanda pinganayai cajtaca, ¿nachu imashna causashcallata cangunaman yachachijun?

¹⁵Ashtahuangarin huarmicuna ajchata viñachun saquinaca, alipachami. Umata quilparingapaj randimi, huarmicunapaj ajchataca Diosca viñachishca.

¹⁶Ñuca cashna nijujta maijambash fiñashpa rimangapaj munajtaca, cashnami nini: Ñucanchi purapipash, Taita Diospajlla tandanajuj crij purapipash huarmicunaca, umata quilparinataca yacharishcami.

¹⁷Ashtahuangarin cai shimicunata villashpaca, cangunata alicachishpaca na nijunichu. Cangunaca, tandanajushpa alita rurangapaj randica, ashtahuan nalita rurangapajmi tandanajunguichi.

¹⁸Pundaca caitapashmi nigrini: Crijpura tandanajushpapash, cangunapura shicanyarinajun nijtami uyarcani. Chashna nijtaca, ashataca crinimi.

¹⁹Canguna purapi Dios alicachijpi causajcuna ricurichunga, cangunapura shican shican tucushpami ali canguichiman.

²⁰Canguna tandanajushpaca, Apunchi Jesús huañushcata yarishpa micungapaca, na tandanajunllu cashcanguichi.

²¹Cangunaca, micungapaj apashpapash, shujcunataca na shuyashpami micushcanguichi. Shina rurashcamandami, huaquingunaca yarjaihuan, huaquingunaca machashca tianajun.

²²Micushpa, ufiashpa tiangapaca, ¿nachu huasita charinguichi? Na cashpaca, ¿Taita Diospajlla tandanajuj crijcunata yangapi churangapaj, imagutapash na charijcunata pingaichingapajchu chashna ruranajunguichi? Cangunataca, ¿ima ninata cani? ¿Cangunataca alicachishachu? Chashna ruranajujtaca, napacha alicachinichu.

²³Apunchi Jesús ñucaman mingashcatami, cangunaman yachachircani. Apunchi Jesusca, paita huañuchijcunaman japi tucuna tutami, tandata japirca.

²⁴Chai tandamanda Diosta pashi nishpami chaupishpa, cashna nirca: “Japishpa micuichi. Caica, cangunapaj ali cachun chaupirina ñuca cuerpomi. Ñucata yarishpa, cashnata rurashpa catinguichilla” nircami.

²⁵Ña micushca jipaca, copatapash japishpami cashna nirca: “Cai vino copaca, ñuca yahuarmi. Chaihuanmi Diosca, shuj mushujta ari nishca. Ima horas cashnata ufiashpapash, ñucata yarishpa ufianguichilla” nircami.

²⁶Ima hora cashpapash, canguna cai tandata micushpa, cai copamanda ufiashpaca, Apunchi Jesús huañushcatami, pai tigramungacaman villanajunguichi.

²⁷Maijan cashpapash, Apunchi Jesús micuichi nishca cai tandata nali shunguhuan micushpa, na cashpaca ufiaichi nishca cai copamandapash nali shunguhuan ufiashpaca, Apunchi Jesuspaj cuerpota, yahuarta nalicachishpami juchata ruran.

²⁸Shinamandami tandata nara micushpallata, copamanda vinota nara ufiashpallata, tucui canguna imashna causanajushcata aliguta yarina canguichi.

²⁹Ashtahuangarin Apunchi Jesuspaj cuerpo cajta na aliguta yarishpa, nali shunguhuan cashpa maijambash micushpa ufiashpaca, paillata llaquichi tucungapajmi micun, ufian.

³⁰Shinamandami huañujujpash, irquiyashcapash canguna purapica, ashtacacunapacha tianguichi. Taucacunami ña huañushca.

³¹Ñucanchillata imashna causajushcata aliguta yarishpaca, na chashna llaquita apanchimanllu.

³²Ashtahuangarin Apunchi Jesusca, ñucanchi nali cajta ricushpami llaquichishca. Na crijcunahuan ama ninan llaquiman cachangapajmi, chashna llaquichijun.

³³Shina cashcamanda ñuca juyashca crijcuna, shina micungapaj tandanajushpaca, caishuj chaishuj shuyanarami canguichi.

³⁴Maijambash yarjachishpaca, huasipillata micuchun. Tandanajushcapica na llaquichi tucungapajmi, chashna rurana canguichi. Imapash shuj alichinacuna tiajpica, ñuca shamushpami alichisha.