Read Imbabura Highland Quichua 1 CORINTIOS 12 Bible Online

1 CORINTIOS 12 - Imbabura Highland Quichua bible

1 CORINTIOS 12

¹Huauquicuna, panicuna, canguna imata rurai ushachumbash, Diospaj Espíritu caramujujta yachachunmi munani.

²Diosta nara cazushpa causanajushpaca, rimaitapash na rimajuj, yanga dioscunapajman apai tucushpami pandashpa causarcanguichi. Chaitaca, ña yachanguichimi.

³Shinamandami, caita yachachun munani: Maijan cashpapash, Taita Diospaj Espíritu rimachijpi rimajushpaca, Jesusca ninanda llaquichi tucunapachami nishpaca na ninllu. Shinallata, Jesusca ñucata Mandajmi nitaca, pipash na paillata ni ushanllu. Ashtahuangarin Diospaj jucha illaj Espíritu yuyaita cujpillami, shina ni ushan.

⁴Shina cajpimi, imata rurai ushanacunapash shican shican tian. Shina cajpipash, Diospaj Espirituca paillatami.

⁵Shinallata Diospajta ruranacunapash, shican shicanmi tian. Shina cajpipash, Apunchi Jesusca paillatami.

⁶Imata ruranacunapash, shican shicanmi tian. Shina cajpipash, tucui imata ruranacunapipash, paillata rurajuj Taita Diosca paillatami.

⁷Ashtahuangarin tucuicunapaj ali cachunmi Diosca, paipaj Espirituta tucuicunaman carashpa ricuchijun.

⁸Diosca, paipaj Espiritumandami, aliguta yachajushcalla shimicunata villachunga tucuicunaman caran. Shujmanga, Diospajta aliguta yachajunatami, chai Espiritullata caramujun.

⁹Caishujmanga, aligutapacha crinatami, chai Espiritullata caramujun. Caishujmanga, huañujujcunata alichi ushanatami, chai Espiritullata caramujun.

¹⁰Shujca, pipash na rurai ushanallata rurai ushachun, shujca Dios villashcata villachunmi, shina caramujun. Shujca, Diospaj Espíritu yarichijpi villajujta, na Diospaj Espíritu yarichijpi villajujta yachai ushachunmi, shina caramujun. Shujca, shuj shuj rimaicunata parlachun, shujca chai shuj shuj rimaicunata yalichishpa villai ushachunmi, chai Espiritullata caramujun.

¹¹Ashtahuangarin cai tucuita ruranacunataca, Diospaj Espiritullatami chaupishpa, pai imashna munashcashna shican shican imata rurai ushachumbash, tucuicunaman caramujun.

¹²Cuerpoca shujlla cashpapash, imatapash ashtacatami charin. Cuerpoca imatapash ashtacata charishpapash, shujlla cuerpomi. Shinallata Cristopash shujllami.

¹³Ñucanchica, Judea llacta gentecuna cashpa, griego nishca gentecuna cashpa, gañanguna cashpa, na gañanguna cashpapash, Diospaj shujlla Espiritumanda bautizarishpami, tucuilla shujlla cuerposhnalla canchi. Ñucanchica, chai Espiritutallatami ufiachijpishna chasquircanchi.

¹⁴Ashtahuangarin cuerpoca, na shujlla parteta charishpami, ashtaca partecunata charin.

¹⁵Chaquica: “Na maqui cashcamandaca, na cuerpopajchu cani” nijushpapash, ¿nachu cuerpopajllata canga?

¹⁶Shinallata rinripash: “Na ñavi cashcamandaca, na cuerpopajchu cani” nijushpapash, ¿nachu cuerpopajllata canga?

¹⁷Tucui cuerpo ñavi cashca cajpica, ¿maipishi rinrica tiajunman? Tucui cuerpo rinri cashca cajpica, ¿maipishi singaca tiajunman?

¹⁸Ashtahuangarin cunanga, Taita Diosmi cuerpopi ima tiachumbash, pai munashcashna churashca.

¹⁹Cuerpopi ima tiashcapash, shujlla tiajpica, ¿cuerpoca maipishi tianman?

²⁰Ashtahuangarin cunanga cuerpoca, imatapash ashtacata charishpapash, shujlla cuerpomi.

²¹Shina cajpica, ñavica: “Canda na minishtinichu” nishpaca, na maquitaca ni ushanllu. Shinallata umapash, chaquitaca: “Cangunataca na minishtinichu” nitaca, na ushanllu.

²²Ashtahuangarin cuerpopi tiaj, imatapash na rurai ushanashnallacuna cashpapash, ashtahuan minishtirishcami.

²³Cuerpopi ashtahuan pinganayai ricurijcunapirami, ashtahuan aliguta churajunchi. Shinallata na yapa juyailla alichina pinganayaicunatarami, ashtahuan juyailla alichirinchi.

²⁴Ñucanchipi ashtahuan juyailla alichirishca ricurijcunaca, na imatapash minishtinllu. Ashtahuangarin Taita Diosmi, ñucanchi cuerpogutaca aliguta churashca. Maipi imapash nalishnalla ricurijujtaca, ashtahuan ninanda alicachishpami churashca.

²⁵Cuerpopi tiajcunaca, ama shican shican cashpa, caishuj chaishuj ayudarichunmi, Diosca chashna churashca.

²⁶Shina cajpimi, cuerpopi tiajcunamanda shuj nanachijpica, tucuilla paihuan nanachin. Shinallata shuj alicachi tucujpica, tucuillami paihuan cushijun.

²⁷Cangunaca, Cristopaj cuerposhna cashpami, tucuilla chai cuerpo purallata canguichi.

²⁸Shina cajpimi Taita Diosca, huaquingunataca tandanajuj crij purapica, pundaca Jesusmanda villachun cachashcacunata churashca. Chaipaj catica, pai ima nishcata villajcunata, chaipaj catica yachachijcunata, chaipaj catica pipash na rurai ushanallata rurajcunatami churashca. Chaipaj catimi, huañujujcunata alichijcunata, shujcunata ayudajcunata, crijcunata mandajcunata, shuj shuj rimaita rimajcunata churashca.

²⁹Paicunaca, ¿tucuicunachu Jesusmanda villachun cachashcacuna? ¿Tucuicunachu Dios ima nishcata villajcuna? ¿Tucuicunachu yachachijcuna? ¿Tucuicunachu, pipash na rurai ushanallata rurajcuna?

³⁰¿Tucuicunachu huañujujcunata alichina ushaita Dios carajpi charin? ¿Tucuicunachu shuj shuj rimaita rimajcuna? ¿Tucuicunachu chai rimashcata yalichishpa villajcuna?

³¹Shina cashcamanda Dios carajpi ruranataca, ashtahuan aliguta mascaichi. Ashtahuangarin cunanga, cai tucuitapash yali ashtahuan juyailla causanagutami, ñucaca cangunaman yachachigrini.