Read Imbabura Highland Quichua 1 CORINTIOS 15 Bible Online

1 CORINTIOS 15 - Imbabura Highland Quichua bible

1 CORINTIOS 15

¹Cunanga tucui crijcuna, ali villaita ñuca villashcataca, cutinmi cangunaman yarichimuni. Chai villashcataca, cangunaca aligutami chasquircanguichi. Chaitallatami, cunangaman aliguta catinajunguichi.

²Chaimandami cangunaman ñuca villajushca shimicunata aligutapacha catimushpaca, na yangalla crishcamanda quishpirishcanguichi.

³Cangunaman yachachijushpaca, pundaca ñuca chasquishcatarami yachachijurcani: Dios escribichishca Shimipi nijunshnami Cristoca, ñucanchipaj juchacunamandaca huañurca.

⁴Dios escribichishca Shimipi nijunshnami, Cristoca pambai tucurca. Ashtahuangarin quimsa punllapica, causarircallami.

⁵Pai causarishpaca, Pedromanrami ricurirca. Chai jipaca, chunga ishcai yachajujcunamanmi ricurirca.

⁶Chai jipaca, picha patsaj yali crijcuna tandanajushcamanmi ricurirca. Paicuna puramandaca, taucacunami causanajunra, huaquingunaca ñami huañushca.

⁷Paicunaman ricurishca jipaca, Jacobomanmi ricurirca. Chai jipaca, pai villachun cachashca tucuicunamanmi ricurirca.

⁸Tucuicunaman ricurishca jipaca, nara huacharina punllapillata huacharishcashna ñucamanmi ricurihuarca.

⁹Villachun cachashca runacunapajpash, jipa jipami cani. Taita Diospajlla tandanajushca crijcunata catiriashpa llaquichishcamandami, villachun cachashcami cani ningapaca, pinganayai cani.

¹⁰Cunambi ñuca imashna cashpapash, Taita Dios ninanda juyajpimi shina cani. Dios ninanda juyashpa ñucaman mingashpaca, na yanga caramushcachu. Ashtahuangarin ñucami, caishuj villajcunatapash, tucuicunata ashtahuan yalishpa imatapash rurajurcani. Shina rurajushpapash, na ñucallata rurajunichu. Ashtahuangarin Taita Dios ninanda juyashpa ñucahuan cashpami, imaguta rurachumbash, ushaita caramujun.

¹¹Caishujcunapash, ñucapash chaitallatami villanajunchi. Chai shimicunatami, cangunaca crircanguichi.

¹²Ashtahuangarin: “Huañushcacunapaj chaupimandami, Cristoca causarirca” nishpami villarcanchi. Shina villajpipash, ¿imashpata canguna puramanda huaquingunaca: “Huañushcacunaca na causaringachu” ninajunguichi?

¹³Shina cashpaca, huañushcacuna na causarina tiajpica, Cristopash na causarishcachu canman.

¹⁴Cristopash na causarishca cajpica, yanga yangami villashpa purinchiman. Cangunapash, yangallatami cringuichiman.

¹⁵Shina cashpaca, Taita Diosmanda llullashpa villajcunami ricurishun. Ñucanchica: “Taita Diosmi, Cristotaca causachirca” nishpami villanajunchi. Cristo na causarishca cajpica, huañushcacunapash napacha causarinachu canman.

¹⁶Huañushcacuna na causarina cajpica, Cristopash na causarishcachu canman.

¹⁷Cristo na causarishca cajpica, cangunapash yangallatami cringuichiman. Juchacunapillatami causanguichiman.

¹⁸Shina cajpica, Cristota crij huañushcacunapash, chingaita chingashcami canman.

¹⁹Cai pachapi causaipajlla Cristota crinimi nishpa shuyanajushpaca, tucui gentecunatapash yali ashtahuan llaquinayaimi canchiman.

²⁰Ashtahuangarin cunanga Cristoca, huañushcacunapaj chaupimandami causarirca. Paica punda causarishpami, paita crij huañushcacuna causarinata ricuchijun.

²¹Cai pachapica, shujlla runamandami huañunaca callarirca. Shinallata shujlla runamandami, huañushcacunapaj chaupimanda causarinapash callarirca.

²²Imashnami Adán runapaj miraicunaca, tucuicuna huañunajun. Chashnallatami Cristohuan causajcunaca, tucuicuna causachi tucunga.

²³Tucuicunami, paicuna causarinapillata causaringa. Tucuipaj pundaca, Cristomi causarirca. Chai jipami, Cristo tigramujpica, paipajlla tucushcacuna causaringa.

²⁴Ashtahuan chai jipamanmi, tucurimui canga. Paita na ricunayachij tucui mandajcunatapash, tucuilla mandajcunatapash Cristo tucuchishpami, pai mandajushcataca Taita Diosman cutin tigrachinga.

²⁵Ashtahuangarin Cristota na ricunayachijcunataca tucuicunata, paipaj chaqui sarunapi Dios churana punllacaman Cristo mandajunami ashtahuan ali.

²⁶Tucuripi tucuchi tucuna fiñajca, huañuimi.

²⁷Diosca, tucui imapash cazuchunmi, Cristopaj chaqui sarunapi churashca. Shina tucuita cazuchun churashca nishpaca, tucuita churaj Taita Diospash, Cristopaj ñaupajpi cazuchi tucungami nishpaca, na nijunllu.

²⁸Ashtahuangarin tucuita cazuchijuchun, paipaj ñaupajpi Dios churashca jipami, paipaj Churipash tucuita cazuchijuchun churaj Diosta cazujunga. Taita Diosllami, tucui imatapash tucuipi cazuchijunga.

²⁹Huañushcacuna imashnallapash na causarina cajpica, huañushcacunamanda bautizarijcunaca, ¿imatashi ruran? ¿Imapajshi huañushcacunamandaca bautizarin?

³⁰¿Imashpata ñucanchica, ima horapash llaqui japinalla purinajunchi?

³¹Huauquicuna, panicuna, ñucami punllandi huañuchi tucunalla purijuni. Ñucanchi Apunchi Jesucristota canguna crij cajpi, cushijushca cashpami cashnataca nini.

³²Cai pachapi causanamandalla, Efeso pueblopi millai animalcunahuan ninanda macanajushca cashpaca, ¿imapajshi ali cahuanga? Huañushcacuna na causarina cajpica: “Micushunchi, ufiashunchi, cayaca huañuipajpash canchi” ninchimanmi.

³³Na pandanachu canguichi. Nali parlocunaca, alita rurashpa causanajujtapash huaglichinmi.

³⁴Rijcharianshna aliguta yariajlla causashpami, juchataca na rurana canguichi. Canguna puramanda huaquingunaca, Taita Diosta na rijsinllu. Canguna pingai tucuchunmi, chashna nijuni.

³⁵Ashtahuangarin huaquingunaca, cashnami ninga: “¿Imashnata huañushcacunaca causaringa? ¿Imashna cuerpohuanshi causaringa?” ningami.

³⁶Chashna nij runaca juizu illajmari. Ima muyuta can tarpushcapash, na viñanllachu, ashtahuangarin pundaca ismushpa chinganrami.

³⁷Imata tarpushpapash, ña viñashcataca na tarpunguichu. Ashtahuangarin trigota cashpa, na cashpaca ima muyuta cashpapash, muyutallami tarpungui.

³⁸Ashtahuangarin tarpushca muyutaca Taita Diosmi, pai munashcashna viñachin. Tucuilla muyutami, chashnallata viñachin.

³⁹Ima causajcuna tiashpapash, na chashnallata cuerpohuanllu. Gentecunaca shuj cuerpohuan, animalcunapash shuj shuj cuerpohuanmi. Alasyu animalcunapash shuj cuerpohuan, pijicunapash shuj cuerpohuanmi.

⁴⁰Jahua pachapipash, shuj cuerpocunami tian. Cai pachapipash, shuj cuerpocunami tian. Jahua pachapica, shujmi punchapambagu tian. Cai pachapipash, shujmi juyailla tian.

⁴¹Indi punchayachijujpash, luna punchayachijujpash, luzerocuna punchayachijujpash shujmi. Luzerocunaca, shuj shuj punchayachijcunami tian.

⁴²Huañushcacuna causarinapash chashnallatami. Huañushcataca, ismunatami tarpunshna pamban. Shina cajpipash na ismuna cuerpohuanmi causaringa.

⁴³Nalicachishcami tarpunshna pambarin. Shina cashpapash punchapamba cuerpohuanmi causaringa. Ushaita na charijtami, tarpunshna pamban. Shina cashpapash, ushaita charij cuerpohuanmi causaringa.

⁴⁴Aichayu cuerpotami, tarpunshna pamban. Shina cajpipash, Diospaj Espirituta charij cuerpomi causaringa. Aichayu cuerpopash tianmi, Diospaj Espirituta charij cuerpopash tianmi.

⁴⁵Shina cajpimi escribishcapipash, cashna nijun: “Punda rurashca Adán shuti runataca, causaj almahuanmi rurashca carca” nijunmi. Ashtahuangarin jipa Adanga, causaita caraj Espiritutami charin.

⁴⁶Diospaj Espirituta charij runaca, na punda tiashcachu. Ashtahuangarin aichayu runami, pundaca tiashca. Chai jipami, Diospaj Espirituta charij Runaca shamurca.

⁴⁷Punda runaca, alpamanda rurashca cashpami, cai pachamanda carca. Jipa runaca, Apunchi Jesusmi. Paica jahua pachamandami.

⁴⁸Alpata rurashca runashnallatami, cai pachapi runacunapash. Jahua pachamanda Runashnami, jahua pachaman rinacunapash.

⁴⁹Imashnami alpamanda rurashca runaman rijchaj canchi, shinallatami jahua pachamanda shamuj Runamambash rijchaj cashun.

⁵⁰Ashtahuangarin huauquicuna, panicuna, caitallami ningapaj munani: Aichandi yahuarndica, pipash na Taita Dios mandajuj llactaman ringachu. Shinallata ismushpa tucurinapash, na ismushpa tucurinahuanga na tandanajungachu.

⁵¹Ricuichi, pipash na yachai ushashcatami villajuni: Na tucuilla huañunachu canchi. Ashtahuangarin tucuillami, mushujman tigrachi tucushun.

⁵²Ñavita ñapash vichashpa ñapash pascaipishnami, mushujman tigrachi tucushun. Tucuripica trompetatami huacachinga. Trompetata huacachijpimi, huañushcacunaca na ismuna cuerpohuan causachi tucunga. Shinallata ñucanchipashmi, mushujman tigrachi tucushun.

⁵³Cai ismuna cuerpoca, na ismuna cuerpotami churajunata charin. Cai huañuna cuerpoca, na huañushpa causaita causana cuerpotami churajunata charin.

⁵⁴Cai ismuna cuerpo na ismuna cuerpota churajujpi, shinallata cai huañuna cuerpo na huañuna cuerpota churajujpimi, cashna escribishca shimica pactanga: “Tucuita mishajmi, huañuitaca tucuchishca.

⁵⁵Huañuilla, ¿maipita can tujsishpa huañuchinaca? Pambana utujulla, ¿imashnata mishai ushanguiyari?” nijushcami pactanga.

⁵⁶Huañuchingapaj tujsinaca juchami. Juchaman ushaita cujpash, mandashca shimicunami.

⁵⁷Ashtahuangarin Taita Diostaca, pashi ninami canchi. Paimi, nalita mishachunga, ñucanchi Apunchi Jesucristomanda ushaita caramujun.

⁵⁸Shina cajpimi ñuca juyashca huauquicunacuna, panicuna, Apunchi Jesusta alipacha crishpa catina canguichi. Imata rurachun pai mingashcatapash, ashtahuanmi rurashpa catina canguichi. Apunchi Jesusmanda imatalla ruranaca, na yanga cajta yachashpami, chashna rurana canguichi.