Read Imbabura Highland Quichua 1 CORINTIOS 16 Bible Online

1 CORINTIOS 16 - Imbabura Highland Quichua bible

1 CORINTIOS 16

¹Diospajlla causajcunaman, culquita carashpa cachanataca, Galacia llactapi tandanajuj crijcunatapash mandarcanimi. Chashnallata cangunapash, paicunashna tandachipaichi ninimi.

²Mashnaguta canguna japishpapash, tucuicunallata semana callari punllapi tandachinguichi. Chai culquigutaca, shican churashpa alichipanguichi. Ñuca shamujpira ama tandachinajuchunmi, cashna nipani.

³Ñuca ña chayashpami, canguna carashpa tandachishca culquitaca, Jerusalenbi saquigrichun canguna cachangapaj cartapi agllashca huauquicunatallata cachasha.

⁴Ñucapash rinapacha cajpica, paicunapash ñucahuan cumba tucushpa ringallami.

⁵Macedonia llactamanra chayanatami charini. Macedonia llactata yalimushca jipami, cangunapajman chayamusha.

⁶Cangunapajman ñuca shamushpaca, cangunahuan ashaguta quedashapashchari. Na cashpaca, tamia quillacuna yalingacamanmi quedaringa. Chai jipami, ñuca maiman rina cajpipash canguna cachahuanguichi.

⁷Cangunataca yalishpalla ricungapaca, na munanichu. Ashtahuangarin Apunchi Jesús munajpica, unaicamanmi cangunahuan cangapaj munani.

⁸Shina cashpapash Pentecostés nishca fiesta punllacuna yalingacamanllami, cai Efeso pueblopi cagrini.

⁹Caipi villajungapaca, pungu pascashcashna alipacha cajpimi, maipipash villajuni. Shina cajpipash, ñucata na ricunayachij runacunaca, ashtacacunami tian.

¹⁰Cangunapajman Timoteo chayamujpica, ama manllajuchun, aliguta mingachipanguichi. Paipash ñucashnallata, Apunchi Jesuspajta rurajmi.

¹¹Shina cajpimi paitaca, na yangapi churana canguichi. Ashtahuangarin aliguta tigramuchun, imagutapash carapanguichi. Paitaca, caishuj huauquicunahuan cumba tucushpa tigramunatami shuyajuni.

¹²Apolos shuti huauquitaca, caishuj huauquicunahuan cumba tucushpa, cangunata ricungapaj richunmi, cutin cutin mingajurcani. Shina mingajpipash, cunambica napacha cangunapajman ringapaj munarcachu. Shina cashpapash, cutin rina tiajpica ringami.

¹³Rijcharianshna causanguichi. Canguna crishcatapash, aligutapacha catinguichi. Shinlli jaricunashna, shinlli tucushpa causanguichi.

¹⁴Imata rurashpapash, ninan juyaihuanmi rurana canguichi.

¹⁵Huauquicuna, panicuna, Estéfanas shuti huauquitaca, paipaj familiacunatapash rijsinguichimi. Paicunaca, Acaya shuti llactapimi Jesusta punda cri callarirca. Shinallata Diospajlla causanajuj crijcunaman, imaguta ruranatapash yariajmi causanajun.

¹⁶Shinamandami, paicunashna imaguta rurajcunatapash, shujcunaman aliguta ayudashpa imaguta rurajcunatapash, cazupanguichi nipani.

¹⁷Estéfanas, Fortunato, Acaico shuti huauquicuna shamushcamandami, ninanda cushijuni. Cangunaca, carupi causashpa na ayudai ushajpimi, cangunapaj randi ñucataca ayudahuarca.

¹⁸Paicunaca cangunatapash, ñuca shungutapash cushichircami. Paicunashna aliguta rurajcunataca, alicachinami canguichi.

¹⁹Asia llactapi tandanajuj crijcunami, cangunataca alillachu capanguichi ninajun. Aquila shuti, Priscila shuti crijcunami, paicunapaj huasipi tandanajuj crijcunandi, Apunchi Jesuspaj tucushcamanda, alillachu capanguichi nishpa, cutin cutin ninajun.

²⁰Cangunataca, tucuilla crijcunami alillachu capanguichi ninajun. Ima nalitapash na yarishpa muchashpami, caishujhuan chaishujhuan alillachu capanchi nina canguichi.

²¹Pablomi, ñuca maquihuambacha caita escribishpa cangunataca, alillachu capanguichi nishpa cachamuni.

²²Apunchi Jesusta maijambash na juyajtaca, Dios tucuchingapaj shicanyachishca cachun ninimi. Apunchi Jesusmi shamugrin.

²³Apunchi Jesucristopaj ninan juyaica, cangunahuan cachun ninimi.

²⁴Cristo Jesusmanda ninan juyaita ñuca charishcapash, tucui cangunahuan cachunmi munani. Shina cachun.