Read Imbabura Highland Quichua 1 CORINTIOS 2 Bible Online

1 CORINTIOS 2 - Imbabura Highland Quichua bible

1 CORINTIOS 2

¹Huauquicuna, panicuna, cangunaman Taita Diospaj Shimita villangapaj shamushpaca, na jatun juyailla shimicunahuan, alipacha yachajushcashna villangapaj shamurcanichu.

²Cangunahuan cashpaca, imapash shujmanda yachajungapaca na munarcanichu. Ashtahuangarin Jesucristotami yariajurcani. Paita chacatashpa huañuchishcatallami, yariashpa causarcani.

³Cangunahuan cashpaca ushai illanshna, ninanda manllashpa chujchushpami causarcani.

⁴Ñuca parlashpa, ñuca villajushpapash, runacuna yachachijpi alipacha yachajushca shimicunataca na villarcanichu. Ashtahuangarin Diospaj Espíritu ushaita charijtami ricuchishpa villajurcani.

⁵Canguna crishcapash, Taita Dios ushaita carajpi crichunmi, shina villajurcani. Alipacha yachajushca runacuna yachachijpi crichunga, na munarcanichu.

⁶Shinamandami, ashtahuan alipacha crij puracunaca, Taita Diosmanda ali yachachij shimicunata villanajunchi. Cai shimicunaca, na cai pachamandachu. Cai pachata mandajcunamandapash na canllu. Chai mandajcunaca chinganllami.

⁷Ashtahuangarin Taita Dios caramushca pipash na yachai ushashca, pacalla ali yachai tiashcatami villanajunchi. Chai pacalla alipacha yachashcahuanmi Taita Diosca, cai pachata nara rurashpallata ñucanchitaca, punchapamba llactapi causagrichun ña churashca.

⁸Chaitaca, cai pachata maijan mandajpash na yacharcachu. Chaita yachashpaca, punchapamba Apunchi Jesustaca napacha cruzpi chacatashpa huañuchinmanllu carca.

⁹Ashtahuangarin escribishcapica, cashnami nijun: “Ricuitapash na ricushca, uyaitapash na uyashca, pipaj shungupipash na yarijushcatami, Taita Diosca paita ninanda juyajcunamanlla alichishca” nijunmi.

¹⁰Ashtahuangarin Taita Diosca, ñucanchimanmi pipash na yachai ushashcataca, paipaj Espirituhuan yachachimushca. Diospaj Espirituca, tucui imatapash aligutapachami yachan. Taita Dios imata yarijujtapash yachanmi.

¹¹¿Maijan runata shuj runa imatapash yarijujtaca, yachai ushan? ¿Nachu paipaj espiritulla yachan? Shinallatami, Taita Dios imata yarijujtaca, pipash na yachai ushan. Taita Diospaj Espiritullami, chaitaca yachan.

¹²Ñucanchica, na cai pachapi tiaj espiritutaca chasquishcachu canchi. Ashtahuangarin Taita Dios imaguta ñucanchiman carashcata yachangapaca, paipaj Espiritutami chasquircanchi.

¹³Shina cashpami ñucanchica, alipacha yachajushca runacuna yachachishca shimicunataca na villanajunchi. Ashtahuangarin Diospaj Espíritu yachachijuj shimicunatami Diospaj Espiritumandaca, Diospaj Espirituta charijcunamanllata aligutapacha yachachinchi.

¹⁴Ashtahuangarin Diospaj Espirituta na charij runaca, pai imata carashcatapash na yachai ushanllu. Paipaca, juizu illaj runa parlarijunshna uyarijpimi, na yachajungapaj munan. Diospaj Espíritu yarichijpillami, alita nalitapash yachajui ushan.

¹⁵Ashtahuangarin Diospaj Espirituta charijca, tucuitami aliguta ricushpa yachai ushan. Shina cajpimi paitaca, pipash na imatapash ni ushanajun.

¹⁶“Jatun Dios imata yarijujtaca, ¿pipash yachai usharcachu? Paitaca, ¿pipash yachachi ushangachu?” nijunmi. Ashtahuangarin ñucanchica, Cristopaj yuyaitami charinchi.