Read Imbabura Highland Quichua 1 CORINTIOS 3 Bible Online

1 CORINTIOS 3 - Imbabura Highland Quichua bible

1 CORINTIOS 3

¹Huauquicuna, panicuna, Diospaj Espirituta charijcunamanshnaca, na cangunaman villai usharcanichu. Ashtahuangarin Cristota crij cashpapash, nara yachajuj huahuacunashna, cangunapaj munaitara rurashpa causajcunamanshnami villarcani.

²Llullu huahuacuna na shinlli micunata micui ushajpi, lechetalla caranshnami cangunapash, nara shuj yachajunata yachajui ushajpi, yachajui ushanatalla yachachijurcani. Cunangamanmi, nara yachajui ushanguichi.

³Cangunaca, cunangamanmi cangunapaj munaitara rurashpa causanajunguichi. Shujcuna imata charijtapash munashpa, fiñanajushpa, shicanyarinajushpaca, ¿nachu na crijcunashnallata, cangunapaj munaitara rurashpa causanajunguichi?

⁴Shujcunaca: “Ñucaca, Pablota catijpachami cani” ninajunmi. Caishujcunaca: “Ñucaca, Apolos shuti runata catijmi cani” ninajunmi. Chashna ninajushpaca, ¿nachu cangunapaj munaitallata rurashpa causanajunguichi?

⁵Apolospash, Pablopash, ¿imata canchiyari? Ñucanchica servijcunallami canchi. Apunchi Jesús ñucanchiman ushaita carajpi, villajpimi crircanguichi.

⁶Ñucami, tarpunshna villajurcani. Apolosca, yacuta churanshnami yachachijurca. Ashtahuangarin Taita Diosmi, viñachinshna mirachijun.

⁷Shina cashpaca tarpujpash, yacuta churajpash imapash na canllu. Ashtahuangarin Taita Diosllami viñachijun.

⁸Tarpujpash, yacuta churajpash, chashnallatami canchi. Imata rurashcashnallata ricushpa Dios carajpi, ishcandillata japina cashpapash, chashnallatami canchi.

⁹Ñucanchica, Taita Diosta ayudajcunallami canchi. Cangunaca, Taita Dios tarpujuj alpashnami canguichi. Shinallata Taita Dios huasichijuj huasishnami canguichi.

¹⁰Taita Dios ninanda juyajpimi, huasichinata ali yachaj runa huasichinshna, cangunaman villai callarircani. Ñuca callarishca jahuapica, shujmi huasichinshna catijun. Shina cashpapash huasichinshna catingapaca, tucuicuna aliguta ricunarami.

¹¹Huasita shayachingapaj callari rumita churashcashnaca, Jesucristollami. Chaipi shuj rumita churaitaca, pipash na ushanllu.

¹²Callaringapaj churashca cai rumi jahuapica, maijan cashpapash orohuan, culquihuan, juyailla rumicunahuan, caspihuan, jupahuan, fangacunahuan huasichingami.

¹³Tucuicuna imata rurashcapash ricuringami. Huasichij runa imashna rurashcataca, shamui punllapimi ninahuan rupachishpa ricuchijunga. Tucuicuna imatalla rurashca cajpipash, ninami ricuchinga.

¹⁴Callarishca jahuapi, huasichinshna maijan imata rurashcapash na rupajpica, imagutapash aligutami japinga.

¹⁵Ashtahuangarin maijan imata rurashcapash rupajpica, imatapash na japingachu. Shina cashpapash, paillami rupajuj nina ucumanda llujshinshna quishpiringa.

¹⁶Cangunaca, Taita Diospaj huasishnami canguichi. Chaitaca, ¿nachu yachanguichi? Taita Diospaj Espíritu cangunapi causajujtapash, ¿nachu yachanguichi?

¹⁷Taita Dios causajuj huasita maijambash tucuchijpica, Taita Diosmi paitapash tucuchinga. Taita Dios causajuj huasica, Diospajllami. Chai huasica, cangunallatami canguichi.

¹⁸Cangunallata, na pandarinachu canguichi. Cai pachapajtaca aligutapacha yachanimi nishpapash, alipacha yachajushcacuna cangapaca, imatapash na yachanshnami tucuna canguichi.

¹⁹Imata cai pachapajta alipacha yachajushcapash, Taita Diospaj ñaupajpica, juizu illajcunashnami ricurin. Escribishcapica cashnami nijun: “Diosca, alipacha yachajushcacunataca, paicuna umachita ali yachashcapillatami japishpa muspayachijun” nijunmi.

²⁰Cutinmi cashnatapash nijun: “Jatun Diosca, alipacha yachajushcacunapaj yuyaicunaca, yanga yanga cajtami yachan” nijunmi.

²¹Chaimandami runacunahuanga, na jariyana canguichi. Ima tiashcapash, tucuillami cangunapaj.

²²Pablo, Apolos, Cefas shuti runacunapash, cai pachapash, causaipash, huañuipash, cunan punllacunapash, shamui punllacunapash, tucuimi cangunapaj.

²³Cangunaca, Cristopajmi canguichi. Cristoca, Taita Diospajmi.