Read Imbabura Highland Quichua 1 CORINTIOS 4 Bible Online

1 CORINTIOS 4 - Imbabura Highland Quichua bible

1 CORINTIOS 4

¹Ñucanchitaca, Cristota servijcuna cajta, shinallata pipash na yachai ushashcata, ñucanchiman Taita Dios mingashcata, aliguta ricushpa yachachijcuna cajta yarinajuchunmi munanchi.

²Cunanga, imata rurachun mingashpapash, tucuicunallata aliguta pactachijcuna cachunmi munan.

³Cangunapash, shuj mandajcunapash, ñuca imata rurajujta nalicachinajujpipash, na llaquirinichu. Nalita ñucallata rurashcataca, na yarinichu.

⁴Ima nalitapash na rurarcanichu yajushpapash, na chaimandalla imatapash cashcatapacha ruraj runachu cani. Ashtahuangarin Apunchi Jesusmi, ima nalita rurashcatapash ricuchihuanga.

⁵Shina cajpimi, Apunchi Jesús shamui punlla nara chayamujpillata, na imatapash juchachina canguichi. Pai shamushpami, imatalla rurashcatapash yanapi pacashca tiajujtapash michaman llujchinga. Paillatami, shungupi imata yarijushcatapash ricuchimunga. Chaipimi, imata rurashcatapash ricuchishpa, tucuicunata Taita Diosca alicachijunga.

⁶Huauquicuna, panicuna, ñucahuan, Apolos shuti runahuan imata rurajtapash ricurcanguichimi. Cangunata juyaimandami, cashna nishpa yarichini: Ñucanchita ricushpa, ama ashtahuan chai escribishcapi nijujtalla yariashpa causachunmi, chashna yarichini. Shuj runamandalla caishuj chaishuj fiñanajunguichiman.

⁷Candaca, ¿pita ashtahuan alicachishpa ricun? Canga, ¿imatata Dios carajujtaca nara chasquishcangui? Pai carashcata ña chasquishca cashpaca, ¿imashpata na chasquishcashna jariyajungui?

⁸Cangunaca, vijsa pactajta micushcashnami ña tucuita charinguichi. Ñami ninanda charijyashcanguichi. Ñucanchitaca na minishtishpa, cangunalla jatun mandajcunami canguichi. ¡Cangunallata mandanajushcanguichiman, ñucanchipash cangunahuan tandanajushpa mandanajungapaj alipachami canguichiman!

⁹Cashnatami yarijuni: Villachun cachashca ñucanchitaca, Taita Diosmi huashaman churashca cajpi, huañuchinallami ni tucushpa purinchi. Shinallata angelcunapash, cai pachapi causajcunapash, ñucanchitaca asishpami ricunajun.

¹⁰Cristota juyashpami, juizu illajcunashna canchi. Ashtahuangarin cangunaca, Cristohuan cashpami, alipachami yachanchi yanguichi. Ñucanchica, ushai illajcunashnami canchi. Cangunaca, ushaita charijcunami canguichi. Cangunaca, alicachi tucushcami canguichi, ashtahuangarin ñucanchica yangapi churai tucushcami canchi.

¹¹Cunangamanmi yarjaihuan, yacunayaihuan, churajunapash illaj, macai tucushpa purinajunchi. Maipi causanatapash na charishpami purinchi.

¹²Imatapash ñucanchi maquihuan rurashpami, ninanda shaijushca canchi. Imapash tucushpaca alimi canman nijpipash, Dios bendiciachun nishpami tigrachinchi. Catiriashpa llaquichijpipash, llaquitaca apanchillami.

¹³Ñucanchita nalicachijpipash, aligutami yarichinchi. Cai pachapi mapa sirijtashnami ñucanchitaca, cunangaman tucuicuna na ricunayachishpa fiñan.

¹⁴Cangunata pingaichingapaca, na cashna escribinichu. Ashtahuangarin ñuca juyashca huahuacuna cajpimi, cashna tacurini.

¹⁵Cristomanda yachachijcunata chunga huarangata charishpapash, na tauca taitacunatachu charinguichi. Ali villaita ñuca villajujpi Cristo Jesusta crijpimi, cangunapaj taitashna cani.

¹⁶Shinamandami, ñuca imashna causajunshnalla causapaichi nijuni.

¹⁷Shina causachun nishpami, Timoteotaca cangunapajman cachamurcani. Paica, Apunchi Jesusta alipacha crij cashpami, ñuca juyashca huahuashnalla. Shinallata Cristota catishpa ñuca imashna causajujtapash, paimi cangunaman yarichijunga. Chaitallatami maipi cashpapash, tandanajuj tucui crijcunamambash yachachijuni.

¹⁸Ashtahuangarin cangunapajman ñuca ima horapash na rina cajpishnami, canguna purapi huaquingunaca jariyanajun.

¹⁹Shina ninajujpipash Apunchi Jesús munajpica, ñallami shamusha. Ñuca shamushpami, chai jariyashpa purijcunataca, na shimi rimashcatalla ricusha. Ashtahuangarin imatapash rurai ushashcatami ricusha.

²⁰Taita Dios mandajujca, na shimihuan rimashcamandalla canllu, ashtahuangarin ninan ushaimandami.

²¹Cangunapajman shamushpaca, ¿vara caspihuan llaquichingapajchu shamusha, na cashpaca juyaihuan, ali shunguhuanllu shamuchun munanguichi?