Read Imbabura Highland Quichua 1 CORINTIOS 5 Bible Online

1 CORINTIOS 5 - Imbabura Highland Quichua bible

1 CORINTIOS 5

¹Canguna purapica, huainayashpa causanajun nijtami uyani. Chashna huainayajtaca, na israelcunapipash na uyanayachinllu. Shuj churica, paipaj taitapaj huarmihuanllatami causajun nijtami uyani.

²Chashna tiajpipash, alimi canchi nishpami jariyanguichi. ¿Nachu cangunaca, ninanda huacashpa, chashna nalita ruraj runataca canguna puramanda llujchina canguichi?

³Cangunahuan ñuca na chaipi cashpapash, ñuca espiritupica cangunahuanmi cani. Shina cashpapash, chai juchata ruraj runataca, chaipi cangunahuan cashcashnami ninanda nalicachijuni.

⁴Ñucanchi Apunchi Jesucristopaj shutipi tandanajuichi. Ñuca espiritupash, ñucanchi Apunchi Jesucristopaj ushaipashmi cangunahuan canga.

⁵Shina tandanajushpa, chai runapaj aichataca, Satanás tucuchijuchun cuichi. Apunchi Jesús shamui punllapi chai runapaj espíritu quishpirichunmi, chashna rurana canguichi.

⁶Canguna jariyanaca, napacha alichu. Tanda masapi ashalla levadurata chapujpica, tucuillatami punguichin. ¿Chaitaca nachu yachanguichi?

⁷Mushuj masashna tucungapaca, huaglishca levadurata shitanshna, mapa illaj tucuichi. Shina rurashpaca, levadura illaj tanda masashnami ali canguichi. Pascua punllapi Diosman carajpi huañuchishca Llamashnami, Cristoca ñucanchimanda ña huañurca.

⁸Shina cashcamanda cunanga, pascua punllapi cushijushpa micuna jatun fiestata rurashunchi. Fiestata rurashpaca, huaglishca, nalita ruraj, jatun nali levadurahuanga, napacha micunachu canchi. Ashtahuangarin levadura illaj tandata rurashpa, imatapash nalitaca na yarishpami, ali shunguhuambacha micuna canchi.

⁹“Huainayashpa causajcunahuanga, na tandanajunachu canguichi” nishpami, shuj cartapica cangunaman escribimurcani.

¹⁰Shina nishpaca: “Cai pachapi tiaj huainayajcunahuan, ashtahuan charijyangapaj munajcunahuan, shuhuacunahuan, yanga dioscunata mañajcunahuanga, napacha tandanajunachu canguichi” nishpaca, na shina nircanichu. Chashnacunahuan na tandanajuna cajpica, cai pachamanda llujshinami canguichiman.

¹¹Ashtahuangarin cashna nishpami escribimurcani: “Maijambash crijmi cani nijushpapash huainayashpa causajpi, charishpapash ashtahuan charijyangapaj munashpa, yanga dioscunata mañashpa, ima llaquipash japishpami ali canman nishpa, machashpa, shuhuashpa causajhuanga, na tandanajushpa purinachu, micuillatapash na micunachu canguichi” nircanimi.

¹²Na crijcunataca, ¿imamandata ñucaca paicuna ima nalita rurashcata ricunata charini? Crij purataca, ¿nachu cangunallata paicuna ima nalita rurashcatapash ricunajunguichi?

¹³Taita Diosmi, na crijcuna imatalla rurashcataca ricuchinga. Chai jatun nalita rurashpa causaj runataca, canguna puramandaca llujchinami canguichi.