Read Imbabura Highland Quichua 1 CORINTIOS 6 Bible Online

1 CORINTIOS 6 - Imbabura Highland Quichua bible

1 CORINTIOS 6

¹Canguna puramanda maijan cashpapash, pihuambash fiñanajushca cashpaca, ¿cashna ruranatachu yachanguichi? Diospajlla causajcunapaj ñaupajpi alichingapaj randica, ¿imatapash cashcatapacha na rurajcunapaj ñaupajpi alichingapajchu ringuichi?

²Cai pachapi causajcunataca, Diospajlla causajcunami imata rurashcata ricushpa mandanajunga. Chaitaca, ¿nachu yachanguichi? Cai pachapi causajcunata canguna ricushpa mandana cashpaca, ¿imashpata asha fiñanajushcata alichitaca na ushanguichi?

³Angelcuna imata rurashcatapash, ricushpa ñucanchi mandana cashcataca, ¿nachu yachanguichi? Shina cashpaca, cai causaipi ima fiñanajui tiajtaca, ¿maitata na alichishunyari?

⁴Cai causaipi fiñanajuicuna tiajpica, ¿crij puracunapi na yapa alicachi tucushcacunamanrachu alichipai nishpa villagringuichi?

⁵Canguna pingai tucuchunmi, cashna nini: Crij puracuna fiñanajushcata alichingapaca, ¿nachu canguna purapillata ali yachaita charijcuna shujllapash tianguichi?

⁶Ashtahuangarin crij purallata fiñanajushcataca, ¿na crijcunaman villangapaj purijcunachu canguichi?

⁷Canguna purallata chashna fiñanajushpaca, nalitapachami ruranajunguichi. Chashna fiñanajunapaj randica, ¿imashpata na llaquita apanajunguichilla? Shinallata umachishpa quichushpa apajpipash, ¿imashpata na saquinguichilla?

⁸Ashtahuangarin cangunaca, crij purallata llaquichirishpa, umachishpa shuhuarishpami puringuichi.

⁹Imatapash cashcatapacha na rurashpa causajcunaca, Taita Dios mandajuj llactapica, imatapash na japigringachu. ¿Chaitaca nachu yachanguichi? Na pandanachu canguichi. Huainayajcuna, yanga dioscunata mañajcuna, cazarashca jahua shujhuan causajcuna, huarmicunashna causaj runacuna, jari purallata huarmihuanshna puñujcuna,

¹⁰shuhuacuna, charishpapash ashtahuan charijyangapaj munajcuna, machajcuna, ima llaquipash japishpami ali canman nijcuna, ñavi ñavi shuhuajcunapash, Taita Dios mandajuj llactapica, napacha imatapash japigringachu.

¹¹Cangunapash pundaca, chashnallatami huaquingunaca causarcanguichi. Ashtahuangarin Apunchi Jesuspaj shutipi, ñucanchi Taita Diospaj Espiritumandapashmi, ña armashcacuna canguichi. Shinallata Diospajllami causanajunguichi, imatapash cashcatapacha rurashcatashna chasqui tucushcacunapashmi canguichi.

¹²Tucui imatapash rurai ushanimi, ashtahuangarin napacha tucuilla alichu. Tucui imatapash rurai ushanimi, ashtahuangarin chaicunara ñucata mandashpa charichunga, napacha saquishachu.

¹³Micunaca vijsapajmi, vijsaca micunapajmi. Ashtahuangarin Taita Diosca, ishcanditami tucuchinga. Shina cajpipash ñucanchi cuerpotaca, huainayachunga na rurashcachu. Ashtahuangarin Apunchi Jesuspajlla causachunmi rurashca. Apunchi Jesusmi, ñucanchi cuerpotapash mandajun.

¹⁴Apunchi Jesusta causachij Taita Diosllatami, ñucanchitapash paipaj ushaihuan causachinga.

¹⁵Cangunapaj cuerpopash Cristopajllata cajtaca, ¿nachu yachanguichi? ¿Cristopaj cuerpomanda anchuchishpa apashpachu, culquimanda huainayaj huarmipaj cuerpohuan shujllata rurana cani? Napacha chashnachu.

¹⁶Maijan cashpapash, culquimanda huainayaj huarmihuan shujlla tucushpaca, paihuanmi shujlla cuerpo tucun. Chaitaca, ¿nachu yachanguichi? Escribishcapica: “Ishcandimi, shujlla aicha tucunga” nijunmi.

¹⁷Ashtahuangarin Apunchi Jesushuan maijambash shujlla tucushpaca, shujlla espiritumi paihuanga causajun.

¹⁸Huainayamandaca anchurichi. Maijan cashpapash ima shuj juchata rurajpica, paipaj cuerpopica na tacarinllu. Ashtahuangarin pipash huainayashpaca, paipaj cuerpotallata fiñashpami, chashna ruran.

¹⁹Cangunapaj cuerpoca, jucha illaj Taita Diospaj Espíritu causajuj huasishna cajtaca, ¿nachu yachanguichi? Chai Espirituca, cangunapaj shungupimi causajun. Chai Espiritutaca, Taita Dios carajpimi charinguichi. Shinamandami, na cangunapajllata causanguichi.

²⁰Cangunaca, ninan valishcapaj randi tucushcami canguichi. Shina cajpimi cangunapaj cuerpohuan, espirituhuambash, Taita Diosta alicachina canguichi. Cuerpopash, espiritupash, Taita Diospajmi.