Read Imbabura Highland Quichua 1 CORINTIOS 7 Bible Online

1 CORINTIOS 7 - Imbabura Highland Quichua bible

1 CORINTIOS 7

¹Canguna ñucata tapushpa escribishcatami, cunanga tigrachimuni. Jarica, na cazarashpa causashpachari ali canman.

²Ashtahuangarin huainayana munaicuna tiashcamanda, tucuicunallata quiquin huarmita charichun. Shinallata huarmicunapash, quiquin cusata charichun.

³Cusaca, cazarashca cashcashnallata, paipaj huarmiman imata cashpapash pactachishpa causachun. Shinallata huarmipash, cusahuan chashnallata causachun.

⁴Huarmica, paipaj cuerpotaca na mandai ushanllu, ashtahuangarin cusami mandai ushan. Shinallata cusapash, paipaj cuerpotaca na mandai ushanllu, ashtahuangarin huarmimi mandai ushan.

⁵Ishcandimanda na munanichu nishpaca, na ninachu canguichi. Ashtahuangarin Diosta yariashpa mañangapajmi, ashagucamanlla na quimiri ushana canguichi. Na unaita jarcari ushashpaca, nali yuyaita Satanás ama cuchun, cutin quimiringuichilla.

⁶Chashna causanguichi nishpaca, na mandanichu. Ashtahuangarin shina causashpami, ali canga nitallami nijuni.

⁷Tucui jaricuna ñucashnalla causachunmi munani. Ashtahuangarin Taita Diosmi, shican shican causaita caishujmambash, chaishujmambash carashca.

⁸Nara cazarashcacunapash, sapalla huarmicunapash, ñucashnalla na cazarashpa causashpami, ali canman ninimi.

⁹Ashtahuangarin na jarcari ushashpaca, cazarachunlla. Chaita yariajlla purinapaj randica, cazaranami ashtahuan ali.

¹⁰Shina cajpipash cazarashcacunataca, Apunchi Jesusmi caita mandan, na ñuca mandanichu: Huarmica, cusataca na jichunachu.

¹¹Jichushpaca, ama shujhuan cazarashpa causachun. Na cashpaca, cusallahuanda ali tucuchun. Shinallata cusapash, huarmitaca napacha jichunachu.

¹²Shujcunataca, na Apunchi Jesús nijujpi, ñucallami cashna nijuni: Maijan crij huauquipash na crij huarmita charijpi, huarmi ali causashunllami nijpica, ama jichuchun ninimi.

¹³Shinallata maijan crij huarmipash na crij cusata charijpi, cusa ali causashunllami nijpica, ama jichuchun ninimi.

¹⁴Na crij cusaca, paipaj huarmi crij cajpimi, Diospajlla tucushca. Shinallata na crij huarmipash, paipaj cusa crij cajpimi, Diospajlla tucushca. Na shina cajpica, cangunapaj huahuacunapash, na crijcunapaj huahuacunashna nalicunami canman. Ashtahuangarin cunanga, cangunapaj huahuacunaca Diospajllami.

¹⁵Maijan na crij cashpapash jichusha nishpaca, jichuchunlla. Shina jichujpica, crij huauqui cashpa, pani cashpapash, na ashtahuan gañanshna causajunllu. Taita Diosca, casilla ali causaita charichunmi, ñucanchitaca cayashca.

¹⁶Cazarashca huarmilla, ¿cambaj cusataca quishpichi ushashallami yajunguichu? Shinallata cazarashca cusapash, ¿cambaj huarmitaca quishpichi ushashallami yajunguichu?

¹⁷Ashtahuangarin Apunchi Jesusmi imashna ali causanatapash, tucuicunaman carashca. Shinamandami, Taita Dios cangunata cayai punllapi imashna causajushcashnallata, tucuicuna chashnallata causana canguichi. Shina causachunmi, tandanajuj tucui crijcunataca mandani.

¹⁸Dios cayai punllapica, ¿maijandapash circuncisión nishcata rurashcachu carca? Shina cashpaca, circuncisionda rurashcallata quedachunlla. Dios cayai punllapi ¿maijandapash circuncisionda na rurashcachu carca? Shina cashpaca, na circuncisionda ruranachu ninimi.

¹⁹Circuncisionda rurashca cashpa, circuncisionda na rurashca cashpapash, imapash na canllu. Ashtahuangarin Taita Dios mandashcacunata pactachinami ali.

²⁰Dios cayai punllapi imashna causajushca cashpapash, chashnallata tucuicuna causashpa catichilla.

²¹Dios cayai punllapica, ¿gañanllu carcangui? Na chaimanda llaquirinachu cangui. Shina cajpipash chaimanda llujshi ushanashnalla cashpaca, llujshinata yaringui.

²²Apunchi Jesusta crichun, Dios cayai punllapi gañan causanajushca cashpaca, Apunchi Jesuspajta rurangapaj cacharishcami cangui. Shinallata Dios cayai punllapi na gañan cashca cashpapash, Cristopajmi gañan cangui.

²³Diosca, tucuita yali valishcahuanmi cangunataca randishca. Shina cashpami gentecunapaca, na gañan tucuna canguichi.

²⁴Huauquicuna, Dios cayai punllapi imashnami causarcanguichi, chashnallata Taita Diospaj causashpa catinguichilla.

²⁵Jarihuan nara tacarishca cuitsacuna imashna causachun ñuca yachachijuchunga, Apunchi Jesusca na mandahuarcachu. Ashtahuangarin pactachij Apunchi Jesús ñucata llaquishpa yarichijpimi, cashna causanaca aligumi nijuni:

²⁶Ninan llaqui punllacunapi causanajushcamandami, imashna causajushpapash, chashnallata causanami jaripaca ali yajuni.

²⁷¿Huarmihuan cazarashcachu cangui? Shina cashpaca, jichunata na yarinachu cangui. ¿Nara cazarashcachu cangui? Shina cashpapash, cazaranataca na yarinachu cangui.

²⁸Cazarashpaca, juchataca na ruranguichu. Shinallata cuitsagupash cazarashpaca, juchataca na ruranllu. Ashtahuangarin cazarajcunaca, cai causaipi llaquicunatami apanajunga. Chai llaquicunamanda cangunata jarcangapajmi munani.

²⁹Ashtahuangarin huauquicuna, caitallami ningapaj munani: Punllacunaca, na unaicaman tiajunallachu, tucurishpa catijunallami. Shinamandami huarmita charijcunaca, huarmita na charinshna causachun nini.

³⁰Shinallata huacajcunapash, na huacanshnalla purichun. Cushijushpa causajcunapash, na cushijunshnalla purichun. Imata randijcunapash, na charinshnalla causachun.

³¹Shinallata cai pachapi imata charishcacunahuan cushijujcunapash, na charishpa cushijunshnalla causachun. Cai pachapi imalla tiajcunapash tucurinllami.

³²Canguna llaquilla causachunga na munanichu. Na cazarashca chairalla runaca, Apunchi Jesusta yariajlla cashpami, Apunchi Jesustalla cushichingapaj munan.

³³Ashtahuangarin cazarashca runaca, huarmi cushijushpa causachun nishpami, cai pachapi imapash tiajtalla yarishpa causan.

³⁴Shinallata cusayu huarmica shuj yuyaita, jarihuan nara tacarishca cuitsaca shuj yuyaitami charin. Jarihuan nara tacarishca cuitsami, cuerpondi almandi Diospajlla causashpa, Apunchi Jesusta yariashpa causan. Ashtahuangarin cusayu huarmica, cusata cushichingapajmi, cai pachapi imapash tiajtalla yariashpa causan.

³⁵Caitaca, cangunapaj ali cachunmi cashna nini. Lazuta churanshna jarcashpaca, na ninichu. Ashtahuangarin imapash na jarcajpi Apunchi Jesuspajta aliguta rurashpa causachunmi, cashna nini.

³⁶Ashtahuangarin maijan cashpapash, ñuca ushi na cazarashpa payayanaca na alichu yajushpaca, pai imashna yajushcashnallata cazarachinapachami. Pai imashna munashcashna cazarachinallami. Chaica na juchachu.

³⁷Ashtahuangarin jarihuan nara tacarishca paipaj ushi na cazarashpaca, alimi canga nishpa shungupi yarishpaca, aligutami ruran.

³⁸Shina cashpami maijambash paipaj ushita cazarachishpapash, alita ruran. Na cazarachishpacarin, ashtahuan aligutami ruran.

³⁹Cusayu huarmica, mandashca shimipi nijunshnami cusa causajujpica, huatashcashna causan. Ashtahuangarin cusa huañujpica, cacharishcashna cashcamandami, pihuan cazarangapaj munashpapash cazaranalla. Ashtahuangarin Apunchi Jesusta crij cachun ninimi.

⁴⁰Ashtahuangarin na cutin cazarashpaca, ashtahuan cushijushpami causanman yanimi. Ñucapash, Taita Diospaj Espiritutaca charinimi yashpami cashna nini.