Read Imbabura Highland Quichua 2 CORINTIOS 10 Bible Online

2 CORINTIOS 10 - Imbabura Highland Quichua bible

2 CORINTIOS 10

¹Ñucami Pablo cani. Cristoca, ali shunguta charishpami ninanda llaquijun. Shinamandami, ñuca nijujta uyapaichi nini. Ñucanchihuan cashpaca, ali shunguhuanmi. Ashtahuangarin caruman rishpaca, ninandami jariyajun ninajunmi.

²“Paicunapaj munaitami rurashpa purin” nishpami, ñucanchitaca juchachinajun. Chashna nijcunataca, ñuca shamushpa ama fiñarishpa rimachun, cangunallata ricupanguichilla nini.

³Cai pachapi causashpapash, na cai pachapajchu macanajushpa causanchi.

⁴Ñucanchi macanajunacunaca, na cai pachapaj rurashcachu. Ashtahuangarin Taita Dios caramushca ushaihuanmi, shinllipacha shayanajuj patacunatashna tucuchinchi.

⁵Taita Diosta ama rijsichunmi, ninanda jariyashpa nali yuyaicunata cushpa jarcariajun. Paicuna tucui imata yarinajujtapash, Cristo prezu apanshna cazuchishpa charichunmi, paiman cushpa saquinchi.

⁶Na pandashpa canguna aliguta cazunajujpica, shujcuna na cazushcamanda llaquichingapaca, alichirishcami shuyanajunchi.

⁷Imatapash cangunaca, jahuallata ñavillahuan ricushpami causanguichi. Maijambash paillata Cristopajmi cani yajushpaca, imashnami paillata Cristopajmi cani yajun, chashnallata ñucanchitapash Cristopajmi yachunmi munani.

⁸Canguna ashtahuan shinlli tucushpa catinajuchun mandachunmi, Apunchi Jesusca ñucanchiman ushaita cararca. Na cangunata chingachingapaj ushaita cararcachu. Chaimandami, ashata jariyashpa rimashpapash, na pinganayachini.

⁹Canguna manllarichunmi, cai cartataca cachamushca yanguichiman.

¹⁰Ñucataca, cashna nishpami nalicachin: “Cartacunapica, yapa shinllitapacha rimashpami cachamun. Ashtahuangarin paillata ñucanchihuan cashpaca, na ushashpami purijurca. Pai villashcapash, na uyanayaimi carca” ninajunmi.

¹¹Maijan chashna nijushpapash aliguta yachachunmi, cashna nini: Carupi cashpa, imashnami cartacunapi rimashcanchi, chashnallatami cangunahuan cashpapash, imatapash rurashun.

¹²Huaquingunaca, alimi canchi yashpami, paicuna purallata maijanda ashtahuan alicanchiyari ninajun. Chashna nijcunaca, juizu illajcunamari. Shina cajpimi, paicunahuan chimbapurashpa, maijambaj tucungapajpash na munanchi.

¹³Ñucanchica, na ñucanchipaj munai jariyashpa purishunllu. Ashtahuangarin Taita Diosmi imashna rurachumbash, ushanallata ninanda ñucanchiman ushaita carashpa, cangunapajman chayamuchumbash cachamurca.

¹⁴Cangunapajman chayashpaca, na ashtahuan yalishpa rircanchica. Cristomanda ali villaita villangapaca, cangunapajmanrami ñucanchica punda chayarcanchi.

¹⁵Chaimandami, shujcuna ruranajushcata ñucanchimi rurarcanchi nishpa jariyaitaca, na ushanchi. Ashtahuangarin canguna aliguta crishpa catijpimi, imashna catichun Dios munashcashna ashtahuan villashpa catishun.

¹⁶Shinallata shujcuna punda villashpa callarichishcapica, na ñucanchira jariyashpa yaicungapaj munashpami, cangunapaj llactacunata yalishpa, shuj llactacunapi ali villaita villangapaj munanchi.

¹⁷“Pipash jariyangapaj munashpaca, Jatun Diosmandalla jariyachun” nijunmi.

¹⁸Maijambash paillata alicachirishpaca, nara imashna cajta ricushpa alicachi tucushcachu. Ashtahuangarin Taita Dios alicachijpi causanami ali.