Read Imbabura Highland Quichua 2 CORINTIOS 11 Bible Online

2 CORINTIOS 11 - Imbabura Highland Quichua bible

2 CORINTIOS 11

¹¡Juizu illanshna rimajpipash, ashaguta uyashpami ali cahuanguichiman! Ari, uyahuaichilla nipanimi.

²Taita Diosca, cangunataca ninandapacha juyashpami, paipajlla causachun munan. Shinallatami ñucapash, paipajlla causachun munani. Jarihuan nara tacarishca cuitsata, shujlla cusahuan cazarachinshnami cangunataca, Cristoman pushangapaj munani.

³Ashtahuangarin caitami manllani: Imata umachinata ali yachaj culebra, Eva huarmita umachishcashna, cangunapash chashnallata umachijpica, Cristota na tucui shunguhuan juyashpa cazungachu yashpami manllani.

⁴Jesusmanda ñucanchi villashcataca na yarishpami, maijambash shujmanda villajtara aliguta uyanajunguichi. Diospaj Espirituta chasquishca jahuapashmi, shuj espiritutapash chasquinguichi. Ali villaita chasquishca jahuapashmari, shujtara villajpipash, na aliguta yarishpa uyanajunguichi.

⁵Chai ninanda yachajushca villajcunataca, na ñucata yali alimi villanajunga yajunichu.

⁶Rimanata ñuca na ali yachajushca cashpapash, ali yachaitami charini. Chaitaca imata rurashpapash, tucuipimi cangunaman ricuchircanchi.

⁷Canguna jatunyachi tucuchunmi, na imatapash mañashpa, Taita Diosmanda ali villaitaca na pingai tucushpa villajurcani. Shinallata imatapash na mañashpa villajushpaca, ¿juchatachu rurarcani?

⁸Cangunaman villangapaca, shuj llactapi tandanajuj crijcunatarami, culquiguta carajpi paicunata quichunshna tucurcani.

⁹Cangunahuan cashpaca, ñucapaj imagu illajpipash, na pitapash mañashpa llaquichircanichu. Macedonia shuti llactamanda shamuj huauquicunami, ñucapaj imagu illajpipash carahuarca. Chaita japishpaca, cangunataca imatapash na fiñachircanichu. Cangunata imamandapash ama fiñachingapajmi, cutimbash cuidarisha.

¹⁰Cristo na llullaj cajta ñuca shungupi yachashcamandami, Acaya shuti llactapi causajcunaman cashnami causajuni nishpa cushijushpa villajuni. Shina villajujtaca, pipash na ñucataca jarcahuangachu.

¹¹¿Imashpata cashna nini? ¿Cangunata na juyashpachu, cashna nini? Cangunata ñuca juyajujtaca, Taita Diospash yachanmi.

¹²Ñucanchi villashpa cushijunshna cushijungapajmi, huaquingunaca munashpa purinajun. Paicuna ama chashna jariyachunmi, cunan imashnami rurajuni, chashnallata rurashpa catijushalla.

¹³Chaicunaca llullashpa villajcunami, umachishpa pandachijcunami. “Cristo villachun cachashcacunami canchi” nij tucushcacunami.

¹⁴Chashna tucujpipash, na manllarinachu canguichi. Satanaspash, paillata punchapamba angelshna tucunllami.

¹⁵Shina cajpimi, Satanaspajta rurajcunapash, imatapash cashcatapacha rurajcunashnallami tucushpa purinajun. Chaitaca, na manllarinachu canguichi. Chashnacunaca, tucurimui punllapimi imata rurashcamandapash, ninanda llaquichi tucunga.

¹⁶Pipash ñucata ama juizu illajmari nichunmi, cutin cashna nini. Na cashpaca, ñucapash ashaguta jariyangapaj, juizu illajtashna chasquihuaichilla.

¹⁷Apunchi Jesús munashcashnaca, na nijunichu. Ashtahuangarin ñuca jariyangapaj munashpallami, juizu illanshna nijuni.

¹⁸Ashtacacunami, paicuna munashcata rurashpa jariyanajun. Ñucapash jariyangapajmi munani.

¹⁹Cangunaca, ali yachajushcacuna cashpapash, shinlli shungu runacunataca, imatapash na nishpa ali uyanajunguichillami.

²⁰Maijambash cangunataca gañandashna mandajpipash, langanshna tucuchijpipash, shuhuashpa quichujpipash, jatun tucushpa, ñavipi huactajpipash, imatapash na ninguichica.

²¹Ñucanchica, na chashnachu carcanchi ningapaca pinganayanmi. (Juizu illanshnami rimagrini). Ashtahuangarin shujcunaca, imahuambash jariyajpimi, ñucapash chashnallata jariyajuni.

²²¿Paicunaca hebreocunachu? Ñucapash chaillatami cani. ¿Paicunaca israelcunachu? Ñucapash chaillatami cani. ¿Paicunaca Abrahambaj miraicunachu? Ñucapash chaillatami cani.

²³¿Paicunaca, Cristopajta rurajcunachu? (Juizu illanshnallatami rimagrini). Ñucamari, paicunatapash yali ashtahuan Cristopajtaca rurashpa asti tucurcani, prezuna huasicunapimi churai tucurcani. Tauca viajemi, ñalla huañuchi tucurcani.

²⁴Picha viajetami, Judea llacta runacunaca, quimsa chunga iscungaman astihuarca.

²⁵Quimsa viajetami, caspicunahuan asti tucurcani. Shuj viajetaca, rumicunahuanmi pegai tucurcani. Quimsa viajemi, ñuca rijuj barcocunapash yacupi huashajushpa chingarca. Shina huashajujpica shuj tuta, shuj punllatami mama cucha jahuapi huambujurcani.

²⁶Tauca viajemi ñangunapi, huañunata manllashpa jatun yacucunapi, shuhuacunapi, ñuca llacta cashpa, shuj llacta cashpapash, ñucata huañuchingallami yashpa manllarcani. Pueblocunapipash, jichushca pambacunapipash, mama cuchapipash, huañuna manllaihuanmi carcani. Crijmi canchi nij tucushcacunahuan cashpapashmi manllarcani.

²⁷Ninanda shaijungacamanmi, imatapash rurashpa tiarcani. Tauca viajemi, na puñushpa pacarircani. Yarjachishcapash, yacunayachishcapash, na micushcapashmi tauca viajeta carcani. Churajunapash illajpi chirichircanimi.

²⁸Ashtahuan shujcunatapash yalica, tucui tandanajuj crijcunata yarishpami, punllandi ninanda llaquirini.

²⁹Maijan crijpash ushai illaj tucujpica, ¿nachu ñucapash ushai illanshna tucuni? Maijandapash nitijachinshna pandachijpica, ¿nachu ñucapash fiñashpa pingai tucuni?

³⁰Ñucapash jariyana cajpica, imatapash na rurai ushashcata ricuchishpami jariyasha.

³¹Ñuca na llullajujtaca, ñucanchi Apunchi Jesucristopaj Taita Diospash yachanmi. Paitaca, causaita causaicaman alicachishunchi.

³²Damasco pueblopi cajpica, chai llactata mandachun, jatun mandaj Aretas shuti runa churashca mandajmi, ñucata japingapaj shuyajurca. Chai Damasco pueblomanda llujshina pungucunapi ñucata chapachunmi, soldadocunata churarca.

³³Chai pueblota muyushca pircapi tiaj ventanatami, shuj canastapi ñucataca uriajuchirca. Chashnami, ñucata japigrijujpaj maquimandaca quishpirircani.