Read Imbabura Highland Quichua 2 CORINTIOS 13 Bible Online

2 CORINTIOS 13 - Imbabura Highland Quichua bible

2 CORINTIOS 13

¹Cai shamuihuanga, quimsa viajetami cangunataca ricungapaj shamugrini. Ishcai cashpa, quimsa cashpa ricushpa villaj tiajpimi, tucui ima cashcatapash alichina.

²Cangunahuan punda chaipi cashpa nishcashnami, cunan na chaipi cashpapash, cangunahuan tiajunshnallata nigrini. Juchata punda rurajcunamambash, caishuj na cazujcunamambash, cutin shamushpaca na llaquishpami llaquichisha nishpami escribircani.

³Cangunaca, Cristo imata villachumbash, ñucaman yarichijushcata yachangapajpachami munanguichi. Ñuca shamujpimi yachanguichi. Cristoca, canguna purapi imatapash na rurai ushanshnaca na canllu. Ashtahuangarin paica, ninan ushaita charishcatami, canguna purapi ricuchijun.

⁴Imatapash na rurai ushanshnami, paica chacatai tucurca. Shina cashpapash, Taita Diospaj ushaihuanmi causajun. Shinallatami ñucanchipash, ushaita na charinchi. Shina cashpapash, cangunapaj ali cachunmi, paihuan shujlla tucushpa causashun.

⁵Cangunallatami: “¿Ñachu alipacha crij cani, narachu ali crij cani?” yashpa, ricurina canguichi. Imashna cashcataca, cangunallata yarinami canguichi. Jesucristo cangunapaj shungupi causajujtaca, ¿nachu yachanguichi? Chaita na yachashpaca, nallata ali crijcunachu canguichi.

⁶Ashtahuangarin ñucanchitaca, alipacha crij cajta canguna yachachunmi munani.

⁷Imatapash nalita canguna ama rurachunmi, Taita Diosta mañanajunchi. Ñucanchilla alipi ricuringapaca, na mañanajunchica. Ashtahuangarin ñucanchita nalicachijpipash, canguna imatapash aliguta rurachunmi mañanajunchi.

⁸Shina cashpami, na llullashpa villajuj Shimita nalicachitaca na ushanchi. Ashtahuangarin chai na llullashpa villajuj Shimitami ninanda alicachinchi.

⁹Shinamandami, ushaita ñucanchi na charishpapash, canguna shinllipacha cajpi cushijunchi. Canguna ima pandatapash ama rurachunmi, Diostaca mañarianchi.

¹⁰Chaimandami cangunapajman shamushpa, ama yapata llaquichingapaj nara shamushpallata, cashnataca escribini. Canguna ashtahuan alipacha crishpa catichun ayudachunmi, Apunchi Jesusca ñucaman ushaita carahuarca. Chingachijuchunga na carahuarcachu.

¹¹Cunanga huauquicuna, panicuna, ninanda cushijushpa, ima pandatapash na rurashpa catinguichi. Shujmanda shujmanda yachachirishpa, shujllashnalla yarishpa, casilla aligutami causana canguichi. Shina causajpica, casilla ali causaita, juyarishpa causanata caraj Taita Diosmi cangunahuan canga.

¹²Caishujmanda chaishujmandami, ima nalitapash na yarishpa muchashpa, alillachu capangui nina canguichi.

¹³Diospajlla causajcunaca, tucuillami cangunataca alillachu capanguichi ninajun.

¹⁴Apunchi Jesucristopaj ninan juyaipash, Taita Diospaj juyaipash, Diospaj jucha illaj Espiritumanda, tucui canguna shujllashnalla causanapash, cangunahuan cachunmi munani. Shina cachun.