Read Imbabura Highland Quichua 2 CORINTIOS 5 Bible Online

2 CORINTIOS 5 - Imbabura Highland Quichua bible

2 CORINTIOS 5

¹Cai pachapi causana ñucanchi cuerpoca, carpa talirinshna huañunataca, aligutami yachanchi. Shina cashpapash, jahua pachapimi shuj juyailla huasita charinchi. Chai huasitaca, gentecunaca na rurashcachu. Ashtahuangarin Taita Diosmi, causaita causachun rurashca.

²Shina cajpica, jahua pachapi causagrinatami, churajunata churajunshna japigrinata, aij nishpa shuyanajunchi.

³Chashnami churajunata churajushcashna cashpa, na lluchulla ricurishunchi.

⁴Cai cuerpohuanga carpashna cashpami, ninanda llaquirishpa aij ninajunchi. Cai huañunalla cuerpotaca, mushuj causaimi chingachinga. Shina cajpica, na lluchulla cashpami, mushujta churajushca causashun.

⁵Ashtahuangarin chaita japigrichunmi Taita Diosca, ñucanchita ña alichishpa, paillata paipaj Espiritutapacha caramurca.

⁶Shinamandami chaita yariashpa, cushijushpa causanchi. Cai cuerpohuan causanajushpaca, Apunchi Jesushuanga carupira cashcatami yachanchi.

⁷(Paitaca, ñavihuan na ricushpapash, crishpami causanajunchi).

⁸Shina cajpipash, paitalla yariashpa causashpami, cai cuerpohuan causangapaca na munanchi. Ashtahuangarin Apunchi Jesushuan causagringapajmi, ninanda munanchi.

⁹Shinamandami causanajushpapash, huañushpapash, Apunchi Jesustalla cushichishpa causangapaj munanchi.

¹⁰Tucuicunami, jatun tiarinapi tiajuj Cristopaj ñaupajpi ricurina canchi. Chaipimi, caipi causajushpa alita rurashca cashpa, nalita rurashca cashpapash ricushpa, imata cashpapash carajpi japinajushun.

¹¹Apunchi Jesusta manllashpami, paita crichun gentecunaman aliguta villanajunchi. Shina cajpimi Taita Diosca, ñucanchi imashna causanajujtaca yachan. Chaitaca, cangunapash yachachunmi munani.

¹²Ñucanchica, alimi canchi nishpaca, na cutinga cangunaman villanachu canchi. Ashtahuangarin ñucanchi imashna purinajujta yachashpa cushijuchunmi munanchi. Imatapash ñavi ricuipilla cushijujcunami, shunguca imapash cachun ninajun. Chaicunataca, upallayajtami tigrachi ushanguichi.

¹³Juizu illanshna cashpaca, Taita Diospajmi chashna canchi. Shinallata ali yuyaita charishpaca, cangunapaj ali cachunmi, chashna canchi.

¹⁴Cristopaj juyaimi, ñucanchitaca ninanda cashna yarichimujun: Shujllami, tucuicunamanda huañurca. Chaimandaca, tucuicunami huañushcashna tucurcanchi.

¹⁵Ama paicunapaj munaihuanlla causachunmi, Cristoca tucuicunamanda huañurca. Ashtahuangarin Cristopajlla causachunmi, paicunamandaca huañushpa causarirca.

¹⁶Shinamandami, cai pachapi causajcunataca, cunanmandapacha pitapash na yanga runatashna ricunchi. Cristotapash yanga runatashna rijsishca cashpapash, cunanga na chashnallata cajtami yachanchi.

¹⁷Shinamandami, maijan cashpapash Cristohuan cashpaca mushujman tigran. Punda nali causajushcacunaca chingashcami. Ricuichi, tucuillami mushuj tucushca.

¹⁸Tucui caicunaca, Taita Diosmandami shamun. Paimi, Cristomanda ñucanchihuanga ali tucurca. Shinallata paimi: “Dioshuan ali tucupanguichi” nishpa villachun, ñucanchiman mingarca.

¹⁹Taita Diosca, Cristohuan cashpami, cai pachapi causajcunahuanga ali tucurca. Gentecuna juchacunata rurashcatapash cungashpami: “Dioshuan ali tucupanguichi” nishpa villachunga, paillata ñucanchiman mingarca.

²⁰Shina cajpica ñucanchica, Cristopaj shutipi randi rimajcunami canchi. Shina cashpami: “Cristopaj shutipi Taita Dioshuan ali tucupaichi” nishpa, Taita Dios nijunshna cangunaman villanajunchi.

²¹Cristoca, ima juchata na rurashca cajpipash, ñucanchimandami Taita Diosca paitara, jucha cachun churarca. Cristohuan shujlla tucujpimi Taita Diosca, imatapash cashcatapacha rurashcatashna ñucanchita chasquirca.