Read Imbabura Highland Quichua 2 CORINTIOS 6 Bible Online

2 CORINTIOS 6 - Imbabura Highland Quichua bible

2 CORINTIOS 6

¹Ñucanchipash, Diospajta paihuanllata rurajcuna cashpami cangunataca: Taita Diospaj ninan juyaitaca, pactara yanga chasquinguichiman nishpa, aligutapacha yarichinchi.

²Paica cashnami nijun: “Chasquina punllacunapimi, candaca uyajurcani. Quishpichina punllapica, candaca quishpichircanimi” nijunmi. Ricuichi, cunanmi chasquina punllacuna chayamushca. Ricuichi, cunanllatami quishpirina punllapash chayamushca.

³Maijambash ama nitijanshna fiñarishpa, Diospajta ñucanchi ruranajushcataca ama nalicachishpa rimachunmi, aliguta cuidarinchi.

⁴Ashtahuangarin imagutapash rurashpa, ninanda llaquichi tucushpa, na ñapash fiñarishpa, imagupash illajmi purinchi. Ninanda llaquichi tucunajushpapash, Taita Diospajtami ruranajunchi.

⁵Ñucanchica, asti tucushpa, prezu churai tucushpami tianajunchi. Ninanda caparinajujpi, imagutapash rurashpa, na puñushpa, na micushpami tianajunchi.

⁶Imatapash nalita ruranataca na yarishpa, aliguta yachajushpa, imamandapash na fiñarishpa, pitapash llaquishpa, Diospaj jucha illaj Espíritu ali yuyaita cujpimi, pitapash tucui shunguhuan juyashpa causanajunchi.

⁷Na llullashpa villajuj shimitapashmi villanajunchi. Taita Diospaj ushaihuanmi, imatapash cashcatapacha rurashpa, macanajunacunata ali ladoman, lluqui ladomambash charinajunchi.

⁸Huaquimbica alicachi tucushca, huaquimbica nalicachi tucushca, huaquimbica alipi ricurishpa, huaquimbica nalipi ricurishcami purinchi. Huaquimbica, umachijcunashnami ricurinchi yarin. Ashtahuangarin na llullashpa villajcunami canchi.

⁹Na rijsishcacuna cashpapash, alipacha rijsishcami canchi. Huañunalla tucushpapash, ashtahuangarin causanchirami. Macai tucunajushpapash ricuichi, ashtahuangarin na huañuchi tucushcami causanajunchi.

¹⁰Llaquichi tucushpapash cushijunchimi. Imagutapash na charishpapash, taucacunatami charijyachinajunchi. Imaguta na charishpapash, tucuitami charinchi.

¹¹Corinto pueblopi causajcunalla, cangunamanmi ñucanchi shungupi imata yarishcatapash na pacashpa, tucuita ñucanchi shimihuan villanchi.

¹²Cangunaca, ñucanchi shungupica na pacashcachu canguichi. Ashtahuangarin cangunapaj shungupimi, pacashpa shungu ucupilla imatapash yarinajunguichi.

¹³Imatapash na pacashpami cangunataca, (huahuata taita yachachinshna rimani). Shinallata cangunapaj shungupi imata yachashcatapash, ama pacashpa villahuaichilla.

¹⁴Na crijcunahuanga, na yugurinshna tandanajunachu canguichi. ¿Imatapash cashcatapacha ruranahuan, nalita ruranahuanga tandanajunllu? Shinallata ¿michapash, yana yana tutahuanga tandanajunllu?

¹⁵Shinallata ¿Cristopash, Belial nishca diablohuanga cumba tucushpa purinllu? Na cashpaca, ¿crijpash, na crijhuanga imatata japinata charin?

¹⁶Shinallata ¿Taita Diospaj huasipash, yanga dioscunahuanga, shujlla yuyai tucui ushanllu? Cangunami, causajujlla Taita Dios causana huasishna canguichi. Taita Diosllatami, cashna nishca: “Paicunahuanga causajushami, purijushami. Ñucami, paicunapaca Taita Dios casha, paicunapash ñuca huahuacunami canga” nishcami.

¹⁷Shinamandami Jatun Diosca, cashna nishca: “Paicunapaj chaupimanda llujshishpa anchurichi. Ima mapatapash, pactara tacaringuichiman. Shina causajpimi, cangunataca chasquisha.

¹⁸Shinallata cangunapaca, Taitami casha. Cangunaca ñuca churicuna, ñuca ushicunami canguichi” nijunmi Tucui Ushaita Charij Jatun Diosca.