Read Imbabura Highland Quichua 2 CORINTIOS 7 Bible Online

2 CORINTIOS 7 - Imbabura Highland Quichua bible

2 CORINTIOS 7

¹Juyashca crijcuna, ñucanchiman cashna aliguta carashapachami nishca cajpimi, ñucanchi cuerpotapash, ñucanchi espiritutapash mapayachinamandaca anchuchina canchi. Ima pandatapash na rurashpa Diospajlla tucushpami, Taita Diosta manllashpa, aligutapacha causana canchi.

²Ñucanchi imata ninajujtapash uyapaichi. Ñucanchica, pitapash na llaquichishpa, pitapash na huaglichishpa, pitapash na umachishpami purircanchi.

³Cangunata llaquichingapaca, na chashna nijunichu. Ashtahuangarin punda ña nishcashnallata cangunaca, ñucanchi shungupimi canguichi. Causanajushpapash, huañungapajpash, ñucanchihuanmi canguichi.

⁴Cangunahuanga, imatapash na pacashpa parlanatami charini. Cangunamandami, ninanda cushijuni. Shina cushijuihuan junda cashpami, tucui jatun llaquicunata ñucanchi apajushpapash, cangunamandaca ninanda cushijuni.

⁵Macedonia llactaman chayamushca punllamandapacha, ñucanchica ashallatapash na samashcachu canchi. Ashtahuangarin tucuipimi ninanda llaquichi tucurcanchi. Na crijcunaca, ninandami na ricunayachirca. Ñucanchi purapica, manllaimi tiarca.

⁶Shina cajpipash, llaquilla causajcunata cushichij Taita Diosmi, Titota cachamushcahuan ñucanchitaca ninanda cushichirca.

⁷Na pai shamushcahuanlla cushichircachu. Ashtahuangarin paitapash canguna cushichijpi ninanda cushijushca cashpami, cashna nishpa ñucanchiman villarca: “Candaca, ninandami ricunayachishpa llaquinajunchi. Can munashcatapash, aliguta rurashpami causangapaj munanchi” ninajushcata villajpicarin, ashtahuan ninandami cushijurcani.

⁸Cangunaman escribimushpa llaquichishca cashpapash, na chaimanda ashtahuan llaquirinichu. Chai punllapica huacajurcanimi. Chai cartata cangunapajman cachashpaca, asha punllacunata llaquichishcata yarishpami llaquilla carcani.

⁹Cunambica, cangunata ñuca llaquichishcamandaca, na cushijunichu. Ashtahuangarin ñuca cangunata llaquichishcamanda llaquirishpa, Diospajman cutin tigrarishcamandami, ninanda cushijuni. Cangunaca, Taita Dios munashcashnami llaquirircanguichi. Ñucanchi escribimushpaca, cangunaman ima nalitapash na rurashcachu canchi.

¹⁰Taita Dios munashcashna llaquirishpaca, nali causajushcata saquishpa quishpiringapajmi ninanda llaquirin. Chaimandaca, na llaquirinajunachu canchi. Ashtahuangarin cai pachamanda llaquica, huañuimanmi apajun.

¹¹Ricuichi cangunaca, Taita Dios munashcashnami llaquirishcanguichi. Shina llaquirishpaca, ima nalitapash na rurashcachu canchi nishpami fiñarcanguichi. Shinallata manllarishpami, ali tucurcanguichi. Ninandami ñucata ricunayachinguichi. Chai nalita rurajtaca, ucha llaquichingapajmi munarcanguichi. Shina rurashpami, ña ali cashcata ricuchircanguichi.

¹²Caita escribimushpaca, na llaquita rurajta, na chai llaquichi tucujta escribimurcanichu. Ashtahuangarin ñucanchica, Taita Diospaj ñaupajpi, cangunata yarianajushcata ricuchingapajllami escribimurcani.

¹³Canguna cushijushcata yachashpami, ñucanchipash cushijurcanchi. Shinallata Tito, paipaj shungupi llaquilla cajpi, pai cungailla cachun canguna cushichishcata yachashpacarin, ashtahuanmi ninanda cushijurcanchi.

¹⁴Cangunata ñuca alicachishpa Titoman parlashcamandaca, na pingai tucushpami cushijurcani. Ashtahuangarin imata cashpapash, na llullashpami cangunaman villarcanchi. Shinallata cangunata alicachishpa Titoman parlashcapash, na llullachu cashca.

¹⁵Cangunata pai mandajujpica, tucuillatami aliguta cazushpa, paitaca manllashpa, chujchushpa mingachishcanguichi. Chaita yarishpami, cangunataca ashtahuan ninanda llaquijun.

¹⁶Imata nijpipash, canguna aliguta cazuj cajta yariashpami, ninanda cushijuni.