Read Imbabura Highland Quichua GÁLATAS 1 Bible Online

GÁLATAS 1 - Imbabura Highland Quichua bible

GÁLATAS 1

¹Villachun cachashca Pablomi cani. (Jesucristopash, huañushcacunapaj chaupimanda paita causachij Taita Diospash villachun cachashcami cani. Na runacunalla agllashca, runacuna cachashcachu cani).

²Ñucapash, ñucahuan caipi tianajuj tucuilla huauquicunapashmi, Galacia llactapi caipi chaipi tandanajuj crijcunaman, caitaca escribimunchi.

³Taita Diospash, ñucanchi Apunchi Jesucristopash, ninan juyaita, casilla ali causaiguta, cangunaman carachunmi munanchi.

⁴Cai nali pachapi causanajujpi quishpichingapajmi, Jesucristoca ñucanchipaj juchacunamanda japi tucushpa huañurca. Chashna huañuchunga, ñucanchi Taita Dios munashcashnami pactarca.

⁵Paica, causaita causaicaman punchapambagumi cangui ni tucushca cachun. Shina cachun.

⁶Cristopaj ninan juyaimanda cangunata agllaj Diosta, ñapash cungashcata ricushpami manllarini. Shujman tigrachishpa villajtara catingapajmi, shina rurashcanguichi.

⁷Ali villaita villanaca, na shuj tianllu. Ashtahuangarin huaquingunami, ali villaitapash shujmanra tigrachingapaj, cangunata pandachingapaj munanajun.

⁸Ashtahuangarin cai ali villaita ñucanchi villashcata shujmanra tigrachishpa villashpaca, ñucanchillata cashpapash, jahua pachamanda shuj ángel cashpapash, ninanda llaquichi tucuchun ninimi.

⁹Punda ñucanchi nishcashnallatami, cunambash cutin cashna nini: Ali villaita canguna uyashcata pipash shujmanra tigrachishpa villashpaca, ninanda llaquichi tucuchun ninimi.

¹⁰Cashna nishpaca, ¿gentecuna alicachihuachun yashpachu nijuni? Na cashpaca, ¿Taita Dios alicachihuachun yashpachu nijuni? ¿Na cashpaca, gentecunatara cushichingapaj munashpachu chashna nijuni? Gentecunatara cushichingapaj munajushpaca, na Cristota servij caimanllu.

¹¹Huauquicuna, panicuna, caitami yachachun munani: Ali villaita ñuca villajushpaca, runacuna munashcashnaca na villajunichu.

¹²Caitaca, maijan runacunapajta chasquishpaca, na yachajurcanichu. Ashtahuangarin Jesucristomi, ñucaman ricuchihuarca.

¹³Judea llacta runacuna yachachijujta catijushpa, punda ñuca imashna causashcataca, ñami uyashcanguichi. Ñucami, Taita Diospajlla tandanajuj crijcunataca, catiriashpa ninandapacha llaquichishpa, llaquinayaita tucuchijurcani.

¹⁴Judea llacta runacuna yachachijujta catijushpaca, ñuca llactapi ñucahuan viñaicunataca misharcanimi. Ñucapaj ñaupa taitacuna yachachishpa saquishcataca, alipachami pactachij carcani.

¹⁵Ashtahuangarin Taita Dios munashpami, mamapaj vijsapi cajpillata shicanyachihuashca. Paipaj ninan juyaihuan cayashpami,

¹⁶na Israel puracunapi villajuchun, paipaj Churita rijsichihuarca. Shina rijsishpami, na ñapash pitapash tapurcani.

¹⁷Ñucapaj punda villachun cachashcacuna causanajuj, Jerusalenmanllapash na vichai rircanichu. Ashtahuangarin Arabia llactamanmi rircani. Chai jipami, Damasco puebloman cutinllata tigramurcani.

¹⁸Ña quimsa huata jipami Jerusalenbi, Pedrota ricungapaj rircani. Paihuanmi, chunga picha punllacaman purijurcani.

¹⁹Chaipica, villachun cachashca puracunataca, pitallapash na ricurcanichu. Apunchi Jesuspaj huauqui Jacobotallami ricurcani.

²⁰Ricuichi, caicunataca Taita Diospaj ñaupajpimi, na llullashpa escribimuni.

²¹Chai jipaca, Siria shuti, Cilicia shuti llactacunamanmi rircani.

²²Cristota crishpa, Judea llactapi tandanajuj crijcunaca, na ñavi ñavi rijsihuarcachu.

²³Paicunaca, cashna nijtallami uyashca carca: “Punda ñucanchita catiriashpa llaquichij, llaquinayaita tucuchingapaj purij runallatami, cunanga crinajuchun villashpa purijun” nijtallami uyashca carca.

²⁴Shina purijujta uyashpami, ñucamandaca Taita Diostaca punchapambagumi cangui ninajurca.