Read Imbabura Highland Quichua GÁLATAS 2 Bible Online

GÁLATAS 2 - Imbabura Highland Quichua bible

GÁLATAS 2

¹Chunga chuscu huata yalishca jipami Bernabetapash, Titotapash pushashpa, Jerusalenman cutinllata vichai rircanchi.

²Ashtahuangarin Dios ricuchijpimi, vichai rircani. Chaipimi, alicachi tucushcacunahuanlla tandanajushpa, na Israel puracunapi ali villaita ñuca villajushcata ricuchishpa parlajurcani. Calpanshna punda imata rurajushcapash, cunambi imata rurajushcapash ama yanga cachunmi, chashna parlajurcani.

³Ñucahuan shamuj Titoca, griego nishca runami carca. Shina cajpipash paitaca, circuncisión nishcata ruranapachami cangui nishpaca, pipash na mandarcachu.

⁴Cristo Jesushuan ñucanchi shujlla tucushpa, aliguta causanajujta ricungapajllami, huaquingunaca crij huauquicunashnalla pacalla yaicumurca. Cutinllata gañanshna causachun munajcunallami, circuncisionmandaca parlarca.

⁵Cai ali villai na llulla Shimica, cangunapi causajuchunmi, paicunataca ashagutallapash, na cazungapaj munarcanchi.

⁶Imamandapash alicachi tucushcacunami carca. (Paicuna punda imashna causashcatapash, na yachanayanllu. Taita Diosca, na ñavita ricushpalla chasquijunllu). Chai alicachi tucushcacunaca, ñuca nara yachashcataca na yachachihuarcachu.

⁷Ashtahuangarin circuncisionda na rurashca gentecunaman ali villaita villajuchun, ñucaman Dios mingashcatami paicunaca ricurca. Circuncisionda rurashcacunaman villajuchun Pedroman mingashcashnallatami, ñucatapash mingarca.

⁸(Circuncisionda rurashcacunaman villachun cachashca Pedroman ushaita caraj Diosllatami ñucamambash, na israelcunaman villajuchun, ushaita carahuarca).

⁹Jacobopash, Cefaspash, Juanbash crijcunapaca, pilarcunashnami carca. Paicunaca, ñucata Dios ninanda juyashpa villagringui nishcata yachashpami, cumba purallata cashcata ricuchingapaj ñucatapash, Bernabetapash maquita japirij shamurca. Shina rurashpami, cashna ninajurca: “Cangunaca, na israelcunamanmi villagrina canguichi, ñucanchica circuncisionda rurashcacunamanmi villagrina canchi” ninajurcami.

¹⁰Paicunaca ñucanchitaca: “Imagutapash na charijcunata yaripanguichi” ninajushpallami mañarca. Chaitaca, ñucapash uchami pactachi callarircani.

¹¹Antioquía shuti puebloman Pedro chayamujpica, nalitapacha rurashpa purijujta ricushpami, paitaca shinllitapacha ñavi ñavi rimarcani.

¹²Jacobo cachamushca runacuna nara chayamujpimi Pedroca, na israelcunahuanra micujushca carca. Ashtahuangarin paicuna chayamujpica, circuncisión nishcata rurashcacunata manllashpami, Pedroca paicunamanda anchurishpa, na tandanajushpa purijurca.

¹³Pedropash chashna nij tucushpalla purijujpimi, Judea llactamanda caishuj runacunapash, paishnallata purinajurca. Bernabepash, mishqui shimi jayaj shungucunata catishpami, pandachi tucurca.

¹⁴Ali villai na llulla Shimita na cazushpa purijujta ricushpami Pedrotaca, tucuicunapaj ñaupajpi cashna nircani: “Canga, Judea llactamanda runa cashca jahuami, na israelcunashna causashpa, Judea llactamanda runashnaca na causajungui. ¿Imashpata na israelcunatara Judea llactamanda runacunashna causachun nishpa mandajungui”? nircanimi.

¹⁵Ñucanchica, huahuamandapacha Judea llacta puracuna cashpami, na shuj llactacunapi causajcunashna, juchayu canchi.

¹⁶Mandashca shimicunata pactachijllapica, na imatapash cashcatapacha rurashcatashna pitapash chasquinllu. Chaitaca, alimi yachanchi. Ashtahuangarin Jesucristota crijpillami, imatapash cashcatapacha rurashcatashna chasquijun. Ñucanchitaca, chai mandashca shimicunata pactachijllapica, Diosca na chasquijunllu. Ñucanchita Dios chasquichunga, Cristotami crinchi. Pitapash na mandashcata pactachishcamandalla imatapash cashcatapacha rurashcatashna chasquingachu.

¹⁷Cristomandalla, imatapash cashcatapacha rurashcatashna chasquichun munashcamandaca, ñucanchipashmi juchayu ricurinchi. Shina cashpaca, ¿Cristomi juchata rurachijun ninachu canchi? Napacha shinachu.

¹⁸Ima nalita ruranatapash ñuca shitashca jahua, chashnallata nalita cutin rurajushpaca, na cazujmi tucuni.

¹⁹Ñucaca, chai mandashca shimicunata ama rurashpa, Taita Diospajlla causangapajmi, chai mandashca shimimandallata huañuchi tucushcashna cani.

²⁰Cristohuan chacatai tucushcashna cashpami, cunanga na ñucallata causajuni. Ashtahuangarin Cristomi, ñucapaj shungupi causajun. Cunan cai causaipi causajushpapash, Taita Diospaj Churita crishpami causajuni. Paica, huañuchijcunaman japi tucushpami, ñucamanda huañurca.

²¹Taita Dios ñucata ninanda juyajujta nalicachingapaca, na munanichu. Mandashca shimicunata pactachishcamandalla, imatapash cashcatapacha rurashcatashna Dios chasquina cajpica, Cristoca yangami huañushca canman.