Read Imbabura Highland Quichua GÁLATAS 3 Bible Online

GÁLATAS 3 - Imbabura Highland Quichua bible

GÁLATAS 3

¹¡Galacia llactapi causajcunalla, juizu illajcunamari canguichi! Na llullashpa villajuj Shimita ama cazuchunga, ¿pita cangunataca muspachishpa pandachirca? Cangunaman ñucanchi villashpaca, Jesucristota chacatashcata cangunapaj ñaupajpi ricuchinshnami, aliguta villarcanchi.

²Cangunamandaca, caigutallami yachangapaj munani: ¿Cangunaca, mandashca shimicunata pactachishpachu, Diospaj Espiritutaca chasquircanguichi? ¿Na cashpaca, ñucanchi villajujta uyashpa crishpachu chasquircanguichi?

³Cangunaca shinlli shungucunapachami canguichi. ¿Cangunaca, Diospaj Espirituhuan callarishca jahuachu, cunanga cangunapaj munaihuanlla tucuchingapaj munanguichi?

⁴¿Yanga yangachu, chai tucui llaquicunataca aparcanguichi? Chai llaquicunataca, ama yangallata apashca cachunmi munani.

⁵Diosca, paipaj Espirituta cangunaman carashpami, canguna purapica pipash na rurai ushanallacunata rurajun. ¿Chaitaca, mandashca shimicunata pactachinajujpillachu chashna rurajun? ¿Na cashpaca, ñucanchi villajujta uyashpa crishcamandachu chashna rurajun?

⁶Abrahamga, Taita Diostami crirca. Shina crijpimi, imatapash cashcatapacha rurashcata ricushpa Diosca chasquirca.

⁷Shina cajpimi, caitaca yachanapacha canguichi: Crijcunaca, taita Abrahambaj miraicunami.

⁸Diosca, pai escribichishca Shimipimi, pundamandapacha taita Abrahamdaca: “Ñucami canmandaca, shuj llactacunapi tucui causajcunata bendiciasha” nijushca. Na israelcunatapash Taita Diosta crishcamandalla, imatapash cashcatapacha rurashcatashna chasquingapajmi, shina nijushca.

⁹Shinamandami crijcunaca, Abrahamshnallata bendiciai tucunajun.

¹⁰“Chai mandashca tucui shimicunata pactachingapaj yariajlla tucui causajcunaca, ninan llaquiman rinapachami” nijunmi. Escribishcapica cashnami nijun: “Mandashpa escribishca libropi imata nijujtapash tucuita na pactachijcunaca, tucuillami ninan llaquiman ringapaj purinajun” nishcami.

¹¹Shina cashcamandaca, Diosca pitapash na mandashca shimita pactachijpilla, imatapash cashcatapacha rurashcatashna chasquingachu. Diospaj Shimipica, cashnami nijun: “Runaca, paita crishpallami, imatapash cashcatapacha rurashpa causajunga” nijunmi.

¹²Mandashca shimicunapica, crinami canguichi nishpaca, na villajunllu. Ashtahuangarin: “Cai mandashcapi nijujta pactachijmi, aliguta pactachishcamanda causajunga” nijunmi.

¹³(Escribishcapica cashnami nijun: “Pipash caspipi chacatai tucushpaca, ninanda nalicachi tucushcami” nijunmi). Mandashcapi ninan nalipachami canguichi nijujmandaca, Cristomi ñucanchitaca quishpichirca.

¹⁴Cristo Jesusmandami, Abraham bendiciai tucushcataca, na israelcunapash japinajun. Diosca, paipaj Espirituta carashapachami nijushcataca, ñucanchi crishpalla chasquichunmi munan.

¹⁵Huauquicuna, panicuna, gentecuna imata ruranajujtami, cangunaman cashna yarichimuni: Runacunalla ari nirishca cashpapash, ña ari nishpa escribishcataca, pipash na yangapi churai ushanllu, mirachitapash na ushanllu.

¹⁶Abrahammambash, paipaj miraimambash carashapachami nijushcami: “Cambaj miraicunamambash” nishpaca, taucacunaman caranataca na nijunllu. Ashtahuangarin, shujmanlla carangapajmi: “Cambaj miraiman” nishca. Chaica Cristomi.

¹⁷Shina cajpica, caitallami ningapaj munani: Taita Diosca, ari nishcataca pactachishapacha nijushcami. Mandashca shimicunaca, chuscu patsaj quimsa chunga huata jipami shamushca. Chai mandashca shimicunaca, Dios carashapachami nijushcataca na yangapi churanllu, na anchuchi ushanllu.

¹⁸Mandashca shimicunata pactachishpalla Dios caramujta japina cajpica, na carashapachami ninmanllu carca. Ashtahuangarin Abrahamman, Taita Dios carashapachami nishca cashpami carashca.

¹⁹Shina cashpaca, mandashca shimicunaca, ¿imapajta ali canga? Mandashca shimicunataca na cazunajujta ricushpami, jipaman mirachishca. Chai mandashca shimicunaca, Dios cachamushami nishca Abrahambaj mirai shamungacamanllami, mandai ushashca. Chai mandashca shimicunataca, angelcuna mandajpillami, shuj runa chasquishpa, paipaj maquihuan gentecunaman yalichishca.

²⁰Chai chasquishpa yalichij runaca, na shujmandallata imatapash rurajunllu. Ashtahuangarin Taita Diosca, shujllami.

²¹Taita Dios pactachishami nishcataca, ¿mandashca shimicunaca nalicachijunllu, imata? Napacha shinachu. Dios mandashca shimicuna causaita carangapaj ushaita charijpica, chai mandashca shimicunata pactachijcunataca, imatapash cashcatapacha rurashcatashnami chasquinman carca.

²²Ashtahuangarin Dios escribichishca Shimipi nijunshnami, juchaca tucuicunata prezu charijun. Dios carashapachami nishcataca, Jesucristota crijcuna paita crishcamandalla japichunmi, prezu charijun.

²³Crina punllacuna nara chayamujpica, mandashca shimicunata yariajllami causanajurcanchi. Crishpa causachun Dios caramungacamanmi, chashna causarcanchi.

²⁴Mandashca shimicunaca, Cristopajman chayachingapajmi huahuacunata yachachijunshna charijurca. Cristota crishcamanda imatapash cashcatapacha rurashcashna chasqui tucuchunmi, chashna charijurca.

²⁵Ashtahuangarin crina punllacuna ña chayamujpimi, mandashca shimicunaca na ashtahuan huahuatashna mandajun.

²⁶Cristo Jesusta crishcamandaca, cunanga tucuicunami Taita Diospaj huahuacuna canguichi.

²⁷Cristohuan shujlla tucungapaj bautizashca cashpami, cangunaca Cristota churajushcashna causanajunguichi.

²⁸Chashna cashpami, Judá llactamanda cashpa, griego cashpa, gañan cashpa, na gañan cashpapash, jari cashpa, huarmi cashpapash, Cristo Jesushuan shujlla tucushpa, tucuicuna shujllashna canguichi.

²⁹Cristopaj cashpaca, taita Abrahambaj miraicunapachami canguichi. Shina cashpami, Dios carashapachami nishcataca japigrina canguichi.