Read Imbabura Highland Quichua GÁLATAS 4 Bible Online

GÁLATAS 4 - Imbabura Highland Quichua bible

GÁLATAS 4

¹Cashnatapashmi ningapaj munani: Taita mama imata charishcatapash, imata cashpapash huahuacunaca, tucuilla japinatami charin. Shina cashpapash, viñangacamanga gañanshnami causan.

²Taita carasha nishca punlla chayangacamanmi, huahuataca yachachishpa cuidajcuna mandashpa charinajun.

³Shinallatami ñucanchipash, huahuacunashna cashpaca, cai pachapajtalla cutin cutin yachachishcata catishpa, pundaca gañanshna causarcanchi.

⁴Ashtahuangarin ña huatacuna pactajpimi, Taita Diosca paipaj Churita cachamurca. Paitaca, shuj huarmigumi ungurca. Paica, mandashca shimicuna mandajpimi causajurca.

⁵Chai mandashca shimicuna charijushcamanda ñucanchita cacharichingapaj, chai jipaca paipaj huahuacunapacha canata chasquichunmi, paica chashna causajurca.

⁶Diospaj huahuacuna cajpimi, Taita Diosca paipaj Churipaj Espirituta cangunapaj shunguman cachamurca. Chai Espíritu caparishpami: “¡Ñuca Taitalla!” nichijun.

⁷Shina cashcamandami, na ashtahuan gañanshna causajushpa, ashtahuangarin Diospaj huahuapacha cangui. Paipaj huahua cashpami, Taita Dios carashcataca Cristomanda japigringui.

⁸Pundaca, Taita Diosta napacha rijsishpami, napash dioscunatara servishpa causarcanguichi.

⁹Ashtahuangarin cunanga, Taita Diosta rijsinguichimi. Taita Diospash, cangunataca rijsinmi. Shina rijsishpapash, ¿imashpata ushaita na charij, chai imapajpash na servij, cutin cutin yachachishcata catishpa, cutinllata gañanshna causangapaj munanguichi?

¹⁰Cangunaca, agllashca punllacunatapash, quillacunatapash, ima punllapi causajushcatapash, huatacunatapashmi yarinajunguichi.

¹¹Cangunaman ñuca imata yachachishcapash, yangallata canatami manllajuni.

¹²Huauquicuna, panicuna, ñucapash cangunashnallatami causangapaj tucurcani. Chaimandami cangunapash, ñucashna causapaichi nini. Cangunaca, ñucataca ima nalitapash na rurahuashcanguichica.

¹³Ali villaita cangunaman punda villajushpaca, huañujushpapashmi villajurcani. Chaitaca, alimi yachanguichi.

¹⁴Shina huañujushpa llaquilla cajpipash, ñucataca na millanayachishpa, na fiñashpami charihuarcanguichi. Ashtahuangarin Taita Diospaj angeltashna, Cristo Jesustashnami chasquihuarcanguichi.

¹⁵Shina causashpa cushijushcapash, ¿imata tucurca? Cangunataca, imashna cashcatami ricuchingapaj munani: Llujchi ushanalla cajpica, cangunapaj ñavitapashmi surcushpa, ñucaman caranguichiman carca.

¹⁶Na llullashpa cashna nijushpaca, ¿cangunata fiñaj runachu tucushcani?

¹⁷Caishujcunaca, nalita yarishpami cangunataca, ñucanchipaj yachajuj cashcanman yanajun. Ñucanchimanda anchurishpa, paicunatara juyashpa catichunmi munan.

¹⁸Shujcunapaj ali cachun, imatapash ninanda juyaimanda rurangapaj yarinaca alimi. Ñuca cangunahuan cajllapi na chashna yarishpami, tucui causaipi aliguta ruranataca yariashpa causana canguichi.

¹⁹Ñuca huahuacunalla, canguna Cristoshna tucushcanman yashpami, shuj huarmi ungungapaj nanachinshna, cutinllata llaqui llaqui cani.

²⁰Cunanllata cangunahuan chaipi cashpaca, imashnallapash rimaimanllari. Cangunamandaca, imashna yaritapash na ushanichu.

²¹Mandashca shimicunata pactachingapaj munajcuna tiashpaca, villahuaichi. Mandashca shimicuna imata nijujtapash, ¿nachu uyarcanguichi?

²²Escribishcapica: “Abraham runaguca, ishcai churitami charirca” nijunmi. Shuj churitaca, na gañan causajuj quiquin huarmihuambachami charirca.

²³Paita servij cuitsahuanga, paipaj munaimandallami charirca. Ashtahuangarin na servishpa tiaj paipaj huarmihuanga, Dios carashapachami nishcamandami charirca.

²⁴Ñucanchita yarichingapajmi, chashnaca tucushca. Chai ishcai huarmicunaca, ishcaipi shican shican ari nishcacunatami ricuchijun. Shuj ari nishcataca, Sinaí shuti urcupimi Diosca cushca. Chaica, Agar shuti huarmi imashna causashcatami ricuchijun. Chai urcupi cushcata catijcunaca, gañanshna causangapajllami miranajun.

²⁵Chai Agar huarmillatami, Arabia llactapi tiajuj Sinaí urcu imashna cashcata ricuchijun. Chai urcupash, cunambi Jerusalén imashna tiajujtami ricuchijun. Chai puebloca, chaipi causajcunandimi, gañanshna tiajun.

²⁶Ashtahuangarin jahua pachapi tiajuj ñucanchipaj mamashna Jerusalenga, na gañanshna tiajunllu.

²⁷Ashtahuangarin cashnami escribishca tiajun: “Huahuata tarinata na yachaj huarmi, cushijungui. Ungungapaj nanachinatapash na yachashcamanda, ninanda cushijushpa caparishpa asijunguilla. Jichuscha huarmica, cusayu huarmitapash yalimi, huahuacunataca ashtahuan charinga” nijunmi.

²⁸Shina cajpimi huauquicuna, panicuna, ñucanchica Dios carashapachami nishca Isaac shuti runashna canchi.

²⁹Ashtahuangarin paipaj munaimandallata charishca churimi, Diospaj Espiritupaj munaimanda huacharishca churitaca, catiriashpa llaquichin cashca. Shinallatami cunambash tucujun.

³⁰Ashtahuangarin Dios escribichishca Shimipica, ¿ima nijundayari? Cashnami nijun: “Servij cuitsataca, paipaj churindi llujchishpa cachangui. Chai cuitsapaj churica, huarmipajpacha churihuanga, taita imaguta charishcatapash, na chaupiringachu” nijunmi.

³¹Shinamandami huauquicuna, panicuna, ñucanchica chai servij cuitsapaj huahuacunashnaca, na canchi. Ashtahuangarin huarmipajpacha huahuacunashnami canchi.