Read Imbabura Highland Quichua GÁLATAS 5 Bible Online

GÁLATAS 5 - Imbabura Highland Quichua bible

GÁLATAS 5

¹Ñucanchitaca, gañanshna causajujmandaca Cristomi cachcarichirca. Shina cacharichishca cashpami, shinllipacha shayarina canguichi. Cutinga na yugurinshna, gañan tucushpa causanachu canguichi.

²Uyahuaichi, Pablomi cangunataca cashna nini: Circuncisión nishcata canguna rurashpaca, Cristomandaca imagutapash na japinachu canguichi.

³Cutinmi villangapaj munani: Pipash circuncisionda rurashpaca, mandashca shimicunapi imata nijujtapash, tucuita pactachinapachami.

⁴Mandashca shimicunata pactachijpimi, Diosca imatapash cashcatapacha rurashcatashna chasquinga ninajushpaca, Cristomandami shicanyashcanguichi. Diospaj ninan juyaimandapashmi urmarcanguichi.

⁵Ñucanchica, Diospaj Espíritu ushaita carashcamanda, crishcamandami, imatapash cashcatapacha rurashcatashna chasquinataca cushijushpa shuyanajunchi.

⁶Cristo Jesushuan shujlla tucujpica, circuncisionda rurashcapash, chaita na rurashcapash, imapash na canllu. Ashtahuangarin crij cashpa, juyarishpa causanami ashtahuan ali.

⁷Cangunaca, calpanshnami ali rurashpa causarcanguichi. Na llullashpa villajuj Shimita ama cazuchunga, ¿cangunataca pita jarcarcayari?

⁸Na cazunata yarichunga, cangunata agllaj Diosca na carashcachu.

⁹Ashalla levadurami, tucuilla masanataca punguichin.

¹⁰Ñucaca, Apunchi Jesusta yariashpa causashpami, canguna shujtara na yarinataca ali yachani. Ashtahuangarin cangunata pandachishpa purij runaca, maijan cashpapash, ninandapachami llaquichi tucunga.

¹¹Huauquicuna, ñucaca cashnami nini: Circuncisionda ruranami nishpa, cunangaman villajushpaca, na catiriashpa llaquichi tucujuimanllu. Cristota cruzpi chacatashpa huañuchishcata villajushcapash, pitapash na nitijachinshna fiñachinmanllu.

¹²Circuncisionda ruranami canguichi nishpa, cangunata pandachijcunaca, ¡paicunapajtara fitishpachari ali canman!

¹³Huauquicuna, panicuna, ama gañanshna causachunmi, cangunataca Diosca agllarca. Ñami cacharichishca canchi nishpalla, pactarallapash cangunapaj munaitalla ruranguichiman. Ashtahuangarin caishujhuan chaishujhuanmi, juyaimanda ayudarishpa causana canguichi.

¹⁴“Canllata imashnami juyaringui, shinallatami shujcunatapash juyana cangui” nijunmi. Cashnata pactachijushpaca, mandashca shimipi nijujtami, tucuita pactachijun.

¹⁵Ashtahuangarin chaishujhuan canirishpa micurishpara, pactarallapash cangunapura tucuringuichiman.

¹⁶Cangunataca caitami nini: Diospaj Espirituhuanmi causana canguichi. Ashtahuangarin na quiquin munaicunatalla ruranachu canguichi.

¹⁷Quiquin munaicunatalla rurashpa causajcunaca, Diospaj Espíritu munajujtaca fiñanmi. Shinallata Diospaj Espíritu munajujpash, quiquin munaicunata fiñanmi. Canguna munashcatalla ama rurachunmi, nali munaicunahuan Diospaj Espirituhuan fiñanajun.

¹⁸Ashtahuangarin Diospaj Espíritu pushajpi causajujpica, mandashca shimicunaca na ashtahuan mandajunllu.

¹⁹Quiquin munaitalla rurashpa causajcunaca, shutillami: Chaicunaca, cazarashca jahuami, shujhuan causanajun. Huainayanajunmi, mapayanajunmi, ima munashcatami ruranajun.

²⁰Yanga dioscunatami mañanajun, brujurishpami causanajun, fiñanajushpallami causanajun, fiñanajushpa rimarishpallami causanajun. Imatapash paipajlla cachunmi munanajun, imamandapash ninanda rimarishpami causanajun, caishuj chaishuj rimarishpami causanajun, chaupirichunmi fiñanajuchinajun, shicanyarishpami pandata yachachinajun.

²¹Shujcuna imata charijtapash, ñucapaj cashcanman yanajunmi. Huañuchinajunmi, machanajunmi, sajsaitapash na sajsashpami purinajun. Chashna nalitaca, imatapash ashtahuanmi ruranajun. Cangunaman ña villashca cashpapash, cutinmi shinllita tacurishpa yarichini: Chashna nalitalla rurashpa causajcunaca, Taita Dios mandajuj llactagupica, imagutapash na japingachu.

²²Ashtahuangarin Diospaj Espirituca, cashna causanatami granota fucuchinshna ricuchijun: Juyarishpa causanata, cushijushpa causanata, casilla aliguta causanata, na ñapash fiñarishpa causanata, llaquishpa causanata, imagutapash carashpa causanata, aliguta crishpa causanatami ricuchijun.

²³Na jariyashpa causanata, nali munaicunatapash mishashpa causanatami ricuchijun. Cashna causajcunataca, mandashca shimicunaca imatapash na rurai ushangachu.

²⁴Ashtahuangarin Cristopajlla tucushcacunaca, quiquin munaicuna nalitalla yarichishcata ruranataca chacatashcashnami tucuchinajurca.

²⁵Diospaj Espirituhuan causajushpaca, Diospaj Espirituhuanllata purishunchi.

²⁶Na yanga jariyashpa rimanachu canchi. Caishujmanda, chaishujmanda na fiñanajunachu canchi. Imaguta charishcatapash, na caishujmanda chaishujmanda ñucapaj cashcanman yanachu canchi.