Read Imbabura Highland Quichua GÁLATAS 6 Bible Online

GÁLATAS 6 - Imbabura Highland Quichua bible

GÁLATAS 6

¹Huauquicuna, panicuna, imashpapash maijambash nalita rurajta japishpaca, Diospaj Espirituhuan causajcunami, alichina canguichi. Chai nalita rurajtaca, na fiñashpami, ali shunguhuan yachachina canguichi. Ama cambash pandachi tucungapajmi, aliguta yarina cangui.

²Ima llaquihuan cajpipash, caishujmanda chaishujmanda ayudaringuichi. Shina ayudarishpami, Cristo mandashcata pactachinguichi.

³Napash imapash cashpata, ñucami ali cani nirijushpaca, paillatami pandarijun.

⁴Shina cajpica alitachu rurajuni, nalitachu rurajuni nishpa, cangunallata tucuicuna yaringuichi. Shina yarishpami, na shujhuan chimbapurashpa, canguna imashna causashcatalla yarishpa, cushijuna canguichi.

⁵Tucuicunami, paicuna imata rurashcashnallata japinajunga.

⁶Diospaj Shimita yachachijmanga, tucui imaguta charishcatapash, yachajujcunaca asha asha carachun ninimi.

⁷Na cangunallata pandarinachu canguichi. Taita Diostaca, na pipash umashpa asi ushangachu. Maijan imata tarpushpapash, chaitallatami japinga.

⁸Shina cajpica, maijambash paipaj munaitalla catishpa tarpunshna rurashpaca, chai munaita rurashcamandami, chingaita chingagrinata japinga. Ashtahuangarin Diospaj Espíritu munashcata tarpunshna rurashpaca, Diospaj Espiritumandami causaita causagrinata japigringa.

⁹Imata cashpapash aliguta ruranataca, na shaijunachu canchi. Na cungashpa aligutalla rurashpaca, japina punllacuna chayamujpimi, granota tandachinshna japinajushun.

¹⁰Shina cajpica, ima aliguta maijanman rurai ushashpapash, tucuicunaman rurashunchi. Chaitaca, crij puracunami ashtahuambachaca pactachina canchi.

¹¹Ricupaichi, imashnami cangunaman ñuca maquihuambacha, jatun letracunahuan escribimuni.

¹²Paicuna alipi ricuringapaj munashpami, circuncisión nishcata ruranami canguichi nishpa, tucuicuna cangunataca mandanajun. Chaicunaca, Cristota cruzpi chacatai tucushpa huañushcata villashcamanda ama llaquichi tucungapajllami, na villanajun.

¹³Circuncisionda rurashcacuna cashpapash, mandashca shimicunataca, paicunallata na pactachinajunllu. Ashtahuangarin cangunapaj ñaupajpilla ali ricuringapaj munashpami, circuncisionda ruranami canguichi nishpa purinajun.

¹⁴Ashtahuangarin napacha ñucapaj munailla jariyashpami, ñucanchi Apunchi Jesucristota cruzpi chacatashcamandalla jariyajuni. Pai chacatai tucushcamandami, cai pachaca ñucapaca ña illashcashna tiajun. Ñucapash, cai pachapaca illanshnami cani.

¹⁵Cristo Jesushuan shujlla tucushcamandaca, circuncisionda rurashca cashpapash, circuncisionda na rurashca cashpapash, na imapash canllu. Ashtahuangarin pai mushujyachijpi, mushujta causanami ashtahuan ali.

¹⁶Caipi nijunshna tucui causajcunaman, casilla ali causaiguta carachunmi munani. Shinallata Taita Dios agllashca israelcunamambash, chashnallata carachunmi munani.

¹⁷Cunanmandaca, ama pipash ñucataca ashtahuan llaquichihuachun ninimi. Ñuca cuerpopi chugricuna ali tucushcapash, Apunchi Jesusmandami ricuchijun.

¹⁸Huauquicuna, panicuna, ñucanchi Apunchi Jesucristopaj ninan juyaica, cangunapaj espirituhuan cachunmi munani. Shina cachun.