Read Imbabura Highland Quichua EFESIOS 1 Bible Online

EFESIOS 1 - Imbabura Highland Quichua bible

EFESIOS 1

¹Taita Dios munajpi, Jesucristo villachun cachashca Pablomi cani. Caitaca, Efeso pueblopi Taita Diospajlla causanajuj, Cristo Jesusta aligutapacha cazushpa pactachijcunamanmi escribini.

²Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munani.

³Ñucanchi Apunchi Jesucristopaj Taita Diosca, aligumari cangui ni tucushca cachun. Cristomandami Diosca, ñucanchita jahua pachamanda ninanda bendiciashca.

⁴Diosca, cai pachata nara rurashpallatami ñucanchitaca, ima nalitapash ama rurashpa, paipajlla causachun, ama mapayashpa causachun Cristomanda agllarca.

⁵Paillatami, ñucanchitaca pundamandapacha juyashpa, Jesucristomanda paipaj huahuacunapacha cachun, paillata agllangapaj munashpa agllarca.

⁶Paipaj juyashca Churimandami, punchapamba Diosca ñucanchita ninanda juyashpa chasquirca. Paita ninanda alicachinajuchunmi chasquirca.

⁷Jesucristopaj yahuarmandami, Diosca ninandapacha juyashpa, ñucanchipaj juchacunataca anchuchishpa quishpichirca.

⁸Shina juyashpami, ali yachaita, ali yuyaita charichumbash, ninan ushaita caramujun.

⁹Shina caramushpami, ali munaita pai charinshnallata, pacalla yarijushcata rijsichirca. Chaita ruranataca, paillatami yarijushca carca.

¹⁰Diosca, pai munashcata rurana huatacuna chayamujpica, jahua pachapi tiajcunahuan, cai pachapi tiajcunahuambashmi, tucuillata tandachishpa, Cristo mandashpa tiajuchun churanga.

¹¹Paihuan shujlla tucushpami, Dios carajpi japircanchi. Ñucanchi chaita japichunga, Diosmi pundamandapacha munashpa, paillata pactachijun.

¹²Punchapamba Diosta ñucanchi alicachishpa causachunmi, chashna pactachijun. Cristotaca pundamandapachami shuyanajurcanchi. Ñucanchimi, chashna alicachina canchi.

¹³Quishpirinamanda ali villaita villajuj, na llullaj Shimitaca cangunapash uyashpami, Cristotaca crircanguichi. Shina crijpimi, carashapachami nishca paipaj jucha illaj Espirituhuan sellai tucushca canchi.

¹⁴Chai Espiritumi, Dios quishpichishcamanda ñucanchi imata japigrinatapash ricuchijun. Punchapamba Diosta alicachishpa causanatami ricuchijun.

¹⁵“Apunchi Jesusta alipacha crishpami, Diospajlla causajcunatapash tucuicunata juyanajun” nijtami cangunamandaca uyarcani.

¹⁶Chaimandami cungaitapash na cungashpa, na shaijushpa cangunamandaca, Diosta pashi nishpa mañajunilla.

¹⁷Ñucanchi Apunchi Jesucristopash, punchapamba Taita Diospash, canguna paita ashtahuan ali rijsichun, ali yachaita imatapash ricuchij Espirituta carachunmi mañajuni.

¹⁸Imaguta canguna japigringapaj shuyanajuchun, Dios agllashcatapash yachashpa, cangunapaj yuyaita punchayachijuchunmi mañajuni. Shinallata paipajlla causajcunaca, Diospaj punchapamba llactagupi imata japigrinatapash yachachunmi, chashna mañajuni.

¹⁹Ñucanchica, paita crijcuna cajpimi, imata rurachumbash, paipaj jatun ushaitapacha ninanda caramujun. Diosca, jatun ushaita charishcata ricuchingapajmi,

²⁰Cristotaca, huañushcacunapaj chaupimanda causachirca. Shina causachishpami, jahua pachaman pushashpaca, paipaj ali ladoman tiachirca.

²¹Cristoca, mandajcunatapash, ushaita charijcunatapash, jatun mandajcunata, cati mandajcunatapash, tucuita mandangapajmi chashna tiarirca. Na cunan punllacunapilla mandajungachu, ashtahuangarin shamui punllacunapipashmi tucuita mandajunga.

²²Tucui ima tiajtapash sarunshna mandachunmi, Diosca Cristoman ushaita cararca. Shina tucuita mandajushpa, tandanajuj crijcunatapash umashna mandachunmi, paiman ushaita cararca.

²³Tandanajuj crijcunaca, tucui maipipash paillata junda Cristopaj cuerposhnami.