Read Imbabura Highland Quichua EFESIOS 2 Bible Online

EFESIOS 2 - Imbabura Highland Quichua bible

EFESIOS 2

¹Diosta na cazushpa, juchata rurashpa huañushcashna cajpipashmi, Diosca cangunaman causaita caramurca.

²Huairapi mandajuj, ninan ushaita charij diablopaj munaita rurashpami, cai pachapajtalla rurajcunashnallata, cangunapash pundaca causarcanguichi. Chai diablollatami, Diosta na cazujcunataca cunangaman imatapash nalitalla rurachijun.

³Ñucanchipash tucuillami pundaca, paicunashnallata nali munaicunatalla rurashpa causarcanchi. Chashna nalitalla rurangapaj yarishpami, ñucanchipaj munaita rurashpa causarcanchi. Juchayu huacharishca cashpami, Dios ninanda fiñarishpa llaquichijpi, caishujcunashnallata llaqui tucunapacha carcanchi.

⁴Ashtahuangarin Taita Diosca, ninandapacha llaquishpa juyaj cashpami, ñucanchitaca ninandapacha juyarca.

⁵Juchacunata rurashcamanda huañushcashna ñucanchi causanajujpipash Diosca, Cristohuan causachishpami, ñucanchimambash causaita cararca. (Dios ninanda juyashcamandami quishpirishca canguichi).

⁶Ñucanchitaca, Cristo Jesushuan causachishpami, Cristohuan jahua pachapi tiachirca.

⁷Diosca ninanda llaquij cashpami, Cristo Jesusmanda ñucanchita ninandapacha juyashcata shamui punllacunapi ricuchingapaj, chashnaca rurarca.

⁸Cangunaca, na cangunamandallataca quishpirishcachu canguichi. Ashtahuangarin Diospaj ninan juyaimandami, paita crishpa quishpirishca canguichi. Chai aligutaca, Taita Diosmi caramujun.

⁹Pipash ama jariyachunmi, imatapash alicunata rurashpa causashcamandaca, na caramushca.

¹⁰Ashtahuangarin Diosllata ñucanchita rurashca cashpami, imatapash alicunata rurashpa causanajuchun, Cristo Jesusmanda ñucanchitaca rurashca. Shinamandami Taita Diosca, ñucanchitaca ñaupallata ña alichishca.

¹¹Shinamandami, punda huatacuna imashna causashcatapash yarina canguichi. Circuncisión nishcata rurashcacunamanda parlashpaca, cangunataca na israelcuna cajpimi, circuncisionda na rurashcacunami canguichi ninajurca. Paicunataca, gentecunallami circuncisionda rurashpa, asha aicha carata anchuchirca.

¹²Punda huatacunaca, na Cristohuan cashpami, Israel llacta puramandapash caruyashca carcanguichi. Imagutapash carashami nishpa, Dios ari nishcacunata japinamandapash caruyashcami carcanguichi. Taita Diostapash, na rijsij imata cushijushpa shuyanatapash na charishpami, cai pachapica causarcanguichi.

¹³Cangunaca, punda huatacunapica paimanda anchurishpami, carupi causarcanguichi. Ashtahuangarin cunanga, Cristo Jesuspaj yahuarmandami, paihuan shujlla tucujpi, cangunataca Diospajman tandachirca.

¹⁴Paillatami, casilla ali causaita ñucanchiman caramujun. Paica, shicanyachishca tiajuj patata shitanshnami, shujlla llacta tucuchun ishcandi ladota tandachirca.

¹⁵Mandashca shimipi nijunshnallata imata rurachun munashcata pactachinguichi nijujtaca, Cristomi paipaj cuerpohuan huañushpa tucuchirca. Shina rurashpami, chai ishcanditallata paihuan shujlla tucushpa, ama ashtahuan fiñanajushpa causachumbash alichishpa mushujyachirca.

¹⁶Cruzpi chacatai tucushpa huañushpami Cristoca, Taita Dioshuan cutin ali tucushpa causanajuchunga churarca. Shina rurashpami, chai ishcandicuna fiñanajushpa causajtaca huañuchinshna alichishpa, shujlla cuerpotashna rurarca.

¹⁷Diosmanda carupi causajcunaman, Dioshuan ladolla causajcunamambash, Cristo shamushpami casilla ali causaiguta charichunga, ali villaita villarca.

¹⁸Ashtahuangarin Cristomandami israelcuna cashpa, na israelcuna cashpapash, Diospaj Espiritumandalla Taita Diospajman chayanata charinchi.

¹⁹Shina cashpami, caru llactamanda shamushca mingarishpa purijcunashnaca na canguichi. Ashtahuangarin Taita Diospajlla causaj puracuna cashpami, Diospaj familiapacha canguichi.

²⁰Cangunaca, villachun cachashcacunapash, Dios ima nishcata villajcunapash yachachishpa callarichishcapi shayachishcacunami canguichi. Huasi tigranapi churana ashtahuan ali rumica, Jesucristomi.

²¹Paihuan shinlli shayachishca huasi cashpami, Diospajlla huasi tucungacaman, Apunchi Jesushuan shujlla tucushpa mirashpa catinga.

²²Jesushuan shujlla tucushpami, cangunapash Diospaj Espíritu causajuj huasishna tucushcanguichi.