Read Imbabura Highland Quichua EFESIOS 3 Bible Online

EFESIOS 3 - Imbabura Highland Quichua bible

EFESIOS 3

¹Na israelcuna cangunapaj ali cachun villajuimandami Pablo ñucaca, Cristo Jesusmanda prezu tiajuni.

²Taita Diosca, ninandami juyajun nishpa villajuchunmi, cangunapaj ali cachun, ñucaman mingahuarca. Chaita uyashca cashpaca, ñami yachanguichi.

³Diosca, pipash na yachai ushashcatami ñucaman ricuchihuarca. Chaitaca, ñami pundata ashaguta escribimurcani.

⁴Chaita leyishpami, Cristomanda pipash na yachashcata, ñucara yachashcata yachanguichi.

⁵Pipash na yachai ushanallataca, punda mirai, huañunalla aichayu gentecunaman ricuchishcatami yachanguichi. Ashtahuangarin cunambimi Diosca, villachun cachashca paipajlla causajcunaman, Dios ima nishcata villajcunamambash, paipaj Espirituta carashpa ricuchimushca.

⁶Ali villaita villajpimi na israelcunapash, israelcunahuan shujlla cuerposhnalla tucushcamandaca, Dios carajpi japinajun. Dios carashapachami nishcataca, Cristo Jesusmandami na israelcunapash japinajun.

⁷Taita Diospaj ninan juyaimandami, paipajta rurachun, paipaj ninan ushaita carashpa mingahuarca.

⁸Diospajlla causaj puracunapica, ñucaca tucuicunapaj jipa jipagupachami cani. Chashna cajpipash, Diosca ñucata ninanda juyashpami, na israelcunaman ali villaita villajuchun mingahuarca. Cristoca, pipash na yachai ushanalla ashtacacunatami charin nishpami villajuni.

⁹Taita Diosca, pai imata rurasha nishcatapash, ñaupamandapachami pacalla charijushca. Chaitami, tucuicunaman villachun ñucataca mingahuarca. Paillatami, tucui ima tiachumbash rurashca.

¹⁰Taita Dios tucuita yachaj cajtaca, tandanajuj crijcunata ricushpa rijsichunmi, jahua pachapi tiaj mandajcunaman, ushaita charijcunamambash, cunambi ricuchijun.

¹¹Diosca, ñaupamandapacha pai imata rurangapaj yarijushcashnallatami, ñucanchita Mandaj Cristo Jesusta cachamushpa pactachimurca.

¹²Ñucanchica, Cristota crishpa paihuan shujlla tucushpami, Diospajman chayagrishapachami yashpa, cushijushpa shuyanajunchi.

¹³Shinamandami, cangunamanda cashna jatun llaquicunata ñuca apajujpipash, na shaijuna canguichi. Canguna ninanda alicachi tucuchunmi, cashna llaquichi tucujuni.

¹⁴Chaimandami, ñucanchi Apunchi Jesucristopaj Taitapaj ñaupajpica, cungurishpa mañajuni.

¹⁵Paimandami jahua pachapipash, cai pachapipash tucui familiacunaca, paipaj shutita japinajun.

¹⁶Diosca, juyailla imagutapash ashtacata charij cajpimi, paipaj Espirituhuan cangunapaj shunguta shinllichishpa, paipaj ushaita carachun mañajuni.

¹⁷Paita crishcamanda Cristo cangunapaj shungupi causajujpimi, alpapi yura sapiyashcashna shinllipacha shayajunshna, juyarishpa causanajuchun mañajuni.

¹⁸Cangunapash, Diospajlla causanajuj tucuicunapash, Cristo ninanda juyajujtaca, aliguta yachachunmi mañajuni. Paica vichaimambash, quinraimambash, jahuamambash, alpa ucucamambashmi juyajun.

¹⁹Cristo chashna ninanda juyajujtaca, pipash na ali yachai ushanllu. Ashtahuangarin chaita yachachun, Taita Dios cangunapaj shungupi jundashcashna causajushpa mandajuchunmi mañajuni.

²⁰Diosca, ñucanchi paita imata mañajujtapash, imaguta japingapaj yarijujtapash ashtahuan yalita rurangapajmi, ushaita charin. Chaitaca, ñucanchi shungupi causajuj paipaj ushaihuanllatami ruranlla.

²¹Cristo Jesusmanda tandanajuj crijcunaca, tucui miraicuna causaita causaicamanmi, Diostaca punchapambagumi cangui ninajuna canchi. Shina cachun.