Read Imbabura Highland Quichua EFESIOS 4 Bible Online

EFESIOS 4 - Imbabura Highland Quichua bible

EFESIOS 4

¹Apunchi Jesusmanda villajushcamanda prezui tucushca tiajushpami, cangunataca cashna nipani: Cangunataca, Dios agllashca cajpimi, pai munashcashna aliguta causana capanguichi.

²Na jariyashpa, ali shunguhuan caishujhuan chaishujhuan na ñapash fiñarishpami, juyarishpa aliguta causana canguichi.

³Shujllashnalla tucushpa causachun, Diospaj Espíritu yachachijujtami catina canguichi. Casilla aliguta causashpami, shujllashnalla causanguichi.

⁴Shujlla cuerpomi tian. Diospaj Espiritupash, shujllami tian. Shinallata shujllata japigrinata cushijushpa shuyanajuchunmi, Diosca cangunataca agllarca.

⁵Apunchi Jesuspash shujllami, crinapash shujllami, bautizarinapash shujllami tian.

⁶Shujlla Taita Diosmi tian, paica tucuicunapaj Taitami. Paica, tucuita Mandaj cashpami, tucuicunata yarichijun, tucuicunapimi causajun.

⁷Shina cashpapash, tucuicunamanmi Diospaj ninan juyaitaca, Cristo imashna caranatalla ricushpa caramurca.

⁸Shinallata Dios escribichishca Shimipipash, cashnami nijun: “Paimi, prezu tiajcunataca jahua pachaman apashpa rirca. Runacuna imaguta rurachumbash, paimi ushaita cararca” nijunmi.

⁹“Jahuamanmi rirca” nishpaca, ¿imatashi nijun? Paimi pundaca, alpaman urai shamurca nishpami, shina nijun.

¹⁰Chai uriajumujllatami, jahua pachataca tucuita yalishpa vichai rishpa, tucui maipipash paillata junda cangapaj, ashtahuan jahuaman rirca.

¹¹Paillatami, huaquingunaca villachun cachai tucushca cachun, shujcunaca Profetacuna cachun, shujcunaca ali villaita villajcuna cachun, shujcunaca crijcunata michijcuna cachun, yachachijcuna cachun churashpa callarichirca.

¹²Diospajlla causajcuna Diospajta rurachunmi, chashna callarichirca. Crijcunata shinllichinajuchunmi, chashna churarca. Crijcunaca, Cristopaj cuerposhnami.

¹³Tucuicuna crishcamanda shujllashnalla tucushpa, Diospaj Churi Cristota rijsichunmi, chashna churarca. Shina causashpami, Cristoshnalla tucungacaman aliguta viñashpa, ima pandatapash na rurajcuna tucushun.

¹⁴Shina tucushpami, huaira shamunshna pandata yachachijpipash, na huahuacunashna caiman chaiman apai tucushun. Chai yachachijcunaca, umachinata alipacha yachajcuna cashpami, runacuna pandata yachachishcatalla imatapash pandatara yachachinajun.

¹⁵Ashtahuangarin na llullaj shimita catishpami, juyarishpa causana canchi. Shina causashpami, Cristoshna tucungacaman, tucuipi aliguta viñashunchi.

¹⁶Paimandami, cuerpopi tiaj mucucunapash tucuilla aliguta paipura huatarishcashna cashpa, caishuj chaishuj ayudarishpa causashun. Shina causashpami, tucuicuna imata rurashpa causanshnallata, ashtahuan ashtahuan juyarishpa, shinlli tucushpa causashunchi.

¹⁷Apunchi Jesús ñucata mandajpimi, cangunataca cashna nishpa mandani: Caishuj na israelcunashnaca, na ashtahuan causanachu canguichi. Paicunaca, yanga imatapash nalitalla yarishpami causanajun.

¹⁸Shungupash yanayashcashnami causanajun. Taita Diosmandapash anchurishcacuna cashpami, imatapash na yachajcuna, shinlli shungucuna tucushpa, Dios caramushca mushuj causaitaca na charin.

¹⁹Paicunaca, juizupash tucurijpimi, ima nalita ruranatapash na pinganayachin. Chashna cashpami Diospaj ñaupajpica, imatapash mapatalla cushijushpa ruranajun.

²⁰Ashtahuangarin cangunaca, na chashna causangapajmi, Cristomandaca yachajurcanguichi.

²¹Na llullaj Shimita Jesusmanda villajujpi uyashpa yachajushpaca, paica napacha llulla cajtami yachanguichi.

²²Shina cashcamandami, punda mauca causaitaca shitashpa saquina canguichi. Chai nalita rurana munaicunami pandachishpa, chai nalitalla rurachishpa charijurca.

²³Cangunapaj yuyaipica, mushujtalla yarishpami causana canguichi.

²⁴Mushuj causaitaca, mushujta churajunshna causaichi. Taita Dios munashcashna imatapash cashcatapacha ruraj cachun, paipajlla causashpa, na llullaj cachun agllashcashna causaichi.

²⁵Shina cashpami, llullanataca saquishpa, tucuicunallata cangunapaj cumbacunahuanga, na llullashpa parlana canguichi. Caishujmanda chaishujmanda, Cristopaj cuerposhna cashpami, chashna parlana canguichi.

²⁶Fiñarishpapash, juchataca na ruranachu canguichi. Na tucui punlla fiñarishcalla chishanachu canguichi.

²⁷Diablo imatapash nalita yarichijuchunga, napacha saquinachu canguichi.

²⁸Shuhuashpa causashca cashpapash, na ashtahuan shuhuanachu. Ashtahuangarin cangunapaj maquihuambacha trabajashpami, aliguta causana canguichi. Shina causashpami, imagupash illajcunaman carangapaca charinguichi.

²⁹Ima mapa parlocunapash, cangunapaj shimimandaca amapacha llujshichun. Ashtahuangarin shujcuna shinlli tucushpa catichunmi, ali canatalla parlana canguichi. Uyajcunapajpash aligupacha uyarichunmi, chashna parlana canguichi.

³⁰Taita Diospaj jucha illaj Espiritutaca, na llaquichinachu canguichi. Diosca, chai jucha illaj Espirituhuanmi, cangunata quishpichina punllacaman, paipajlla cachun sellashca charijun.

³¹Cangunapaj shungupi jatun llaquillahuan canatapash, fiñashca canatapash, fiñarishcalla canatapash, caparishpa rimajunatapash saquinami canguichi. Ima llaquipash japishpachari ali canman nijunatapash, imata nalita ruranatapash, tucuitami saquina canguichi.

³²Ashtahuangarin cangunaca, tucuicunahuan aliguta causashpa, caishuj chaishuj llaquirishpa causaichi. Cristomanda Taita Dios cangunapaj juchacunata perdonashcashnallatami, caishujmanda chaishujmanda perdonarina canguichi.