Read Imbabura Highland Quichua EFESIOS 5 Bible Online

EFESIOS 5 - Imbabura Highland Quichua bible

EFESIOS 5

¹Taita Dios juyashca huahuacuna cashpami, paishnallapacha causana canguichi.

²Cristo ñucanchita juyashcashnami, cangunapash juyarishpa causana canguichi. Paica, ñucanchipaj ali cachunmi, paillata japi tucushpa Taita Diosman cararishpa huañurca. Shina huañushpami, animalta huañuchishpa rupachijpi, mishquillagu ashnajunshna tucurca.

³Canguna purapica: “Huainayashpami causanajun, tucui mapatami ruranajun, charijyanatalla munashpami causanajun” ninajuj shimicunaca, uyaritapash ama uyarichun ninimi. Diospajlla causajcuna chashna ni tucushpa causanaca, napacha alichu.

⁴Pinganayai shimicunata, napash rimana shimicunata, mapa parlocunataca, na parlanachu canguichi. Ashtahuangarin Taita Diostami, pashi nina canguichi.

⁵Huainayashpa causajpash, mapatalla rurashpa causajpash, yanga dioscunata mañanshna charijyanatalla munashpa causajpash, Cristohuan, Taita Dioshuan mandajuj llactapica, imatapash na japigringachu. Chaitaca ñami yachanguichi.

⁶Pactarallapash yanga parlocunata parlashpa, pipash cangunata umachinman. Chashnacunamandami Taita Diosca, paita na cazushpa causajcunataca, ninanda fiñashpa llaquichinga.

⁷Chashnacunahuanga, na tandanajunachu canguichi.

⁸Pundaca, yana yana tutapishnami causarcanguichi. Ashtahuangarin cunanga, Apunchi Jesushuan shujlla tucushpami, michagushna canguichi. Michagupaj huahuacunashnami causana canguichi.

⁹(Diospaj Espirituca, tucui juyaita, imatapash cashcatapacha ruranata, na llullashpa causanatami, granota fucuchinshna ricuchijun).

¹⁰Apunchi Jesús munashcashna causanatami yarina canguichi.

¹¹Yanapishna causashpa, imatapash yangata nalitalla rurajcunataca, na catinachu canguichi. Ashtahuangarin paicunatapash jarcashpa rimanami canguichi.

¹²Paicuna pacalla imatapash rurashcata parlangapaca, pinganayaimi.

¹³Ashtahuangarin ima nalita rurashcatapash micha ricuchijpimi, michapica tucuilla ricuringa.

¹⁴Shinamandami cashna nijun: “Puñujunshna causajushcamanda rijchari. Huañushcashna causajcunapaj chaupimanda jatarimui. Candaca, Cristomi punchayachinga” nijunmi.

¹⁵Ricuichi, imashna causanatapash, aligutapachami yarina canguichi. Juizu illanshnaca, na causanachu canguichi. Ashtahuangarin alipacha yachajushcami causana canguichi.

¹⁶Cunan punllacunapillata, aliguta yarishpa causaichi. Nali punllacunapimi causanajunchi.

¹⁷Shina cashcamandami, juizu illanshnaca na causana canguichi. Ashtahuangarin Apunchi Jesús munashcata rurangapajmi, ali yuyaita japina canguichi.

¹⁸Na vinota ufiashpa machanachu canguichi. Machashpa purijcunaca, llaquinayaitami causanajun. Ashtahuangarin Diospaj Espíritu jundami causana canguichi.

¹⁹Canguna purapica, Salmocunamandami parlana canguichi. Shinallata Diospaj Espíritu yachachishca juyailla candanacunatapash, Apunchi Jesusta tucui shunguhuan alicachishpami, candana canguichi.

²⁰Tucui causaipimi, imamandapash ñucanchi Apunchi Jesucristopaj shutipi, Taita Diostaca pashi nina canguichi.

²¹Taita Diosta manllashpa, caishuj chaishuj cazurishpa causaichi.

²²Huarmicuna, cangunapaj cusacunataca, Apunchi Jesusta cazunshna cazuichi.

²³Cristoca, tandanajuj crijcunataca umashnami mandajun. Shinallata cusapash, huarmitaca umashnami mandajun. Cristoca, crijcunata Quishpichijmi. Crijcunaca, paipaj cuerposhnami canchi.

²⁴Tandanajuj crijcuna Cristota cazunshnami, cusacuna imaguta mandajtapash, huarmicunaca tucuipi cazuna canguichi.

²⁵Shinallata cusacunapash, cangunapaj huarmicunataca juyashpami charina canguichi. Tandanajuj crijcunata juyashpami, Cristoca paillata japi tucushpa huañurca. Shinallatami, cangunapash juyana canguichi.

²⁶Diospaj Shimihuambash, yacuhuambash armachishpami, Diospajlla causanajuchun, mapa illajta rurashpa crijcunamandaca Cristoca huañurca.

²⁷Tandanajuj crijcunaca ama mapayashca, llambu llambu, ima nalita rurashcapash illaj, paipajlla causashpa juyaillagu, paipaj ñaupajpi ricurichunmi, chashna huañurca.

²⁸Chashnallatami cusacunapash, quiquin huarmitaca cangunapaj cuerpotashna juyana canguichi. Paipaj huarmita juyashpaca, quiquinllatami juyarijun.

²⁹Pipash paipaj cuerpotallataca na millanayachinllu. Ashtahuangarin aliguta micushpa alichirinatami yachan. Shinallatami tandanajuj crijcunatapash, Cristoca cuidashpa charijun.

³⁰Shinallata crijcunaca, Cristopaj cuerpomanda cashpami, paipaj aichamanda, tullumandapash canchi.

³¹“Shinamandami jarica, paipaj taita mamata saquishpa, paipaj huarmihuan causangapaj tandanajunga. Shina tandanajushpaca ishcai cashpapash, shujlla cuerposhna tucushpami causanajunga” nijunmi.

³²Caitaca, pipash na yachai ushanallami. Ashtahuangarin ñucami, cashna nini: Cazarajcunamanda parlashpaca, tandanajuj crijcuna Cristohuan imashna causanatami chashna nijun.

³³Shina nishpaca, tucuicunami quiquinllata juyarinshna, cangunapaj huarmitapash juyana canguichi ninimi. Shinallata huarmipash, cusataca alicachishpa cazuchun ninimi.