Read Imbabura Highland Quichua EFESIOS 6 Bible Online

EFESIOS 6 - Imbabura Highland Quichua bible

EFESIOS 6

¹Huahuacuna, cangunapaj taitata, mamataca, Apunchi Jesusta cazunshna cazunguichi. Caita ruranaca, imatapash cashcatapacha ruranami.

²Mandashca shimipica: “Taitata, mamataca ninanda alicachingui” nijunmi. Chaita mandashpa callarishpami, carashapachami nishpa cashna nijun:

³“Can cazushpaca, cai pachapipash unai unaicamanmi causangui” nijunmi.

⁴Taita mamacuna, cangunapaj huahuacunataca na yangamanda fiñachinachu canguichi. Ashtahuangarin nalita rurajpica, shinlli tacurishpami aliguta yarichishpa, Apunchi Jesús munashcashna viñachina canguichi.

⁵Servijcunapash, cai pachapi cangunapaj amocunataca, Cristota cazunshnami manllaihuan na jariyashpa, ali shunguhuan cazuna canguichi.

⁶Gentecunapaj ñaupajpi ali ricuringapajlla rurajcunashnaca, na shujcuna ricuchunlla ruranachu canguichi. Ashtahuangarin Cristota servijcunashnami, Taita Diospaj munaita tucui shunguhuan, imatapash rurana canguichi.

⁷Gentecunata servinshnaca, na servinachu canguichi. Ashtahuangarin Apunchi Jesusta servinshnami, tucui shunguhuan, ali munaihuan pactachina canguichi.

⁸Imatapash aliguta rurashca cashpaca, servishpa causaj, na servishpa causaj cashpapash, Apunchi Jesús carasha nijushcataca tucuicunami japinga. Chaitaca yachanguichimi.

⁹Amocunapash, cangunapaj servijcunataca alimi charina canguichi. Na macashami nishpa, manllachinachu canguichi. Cangunatapash, paicunatapash Mandaj Apunchi Jesusca, jahua pachapimi tiajun. Chaitaca, yarinami canguichi. Diosca, na ñavita ricushpalla chasquijunllu.

¹⁰Cunanga, ñuca juyashca huauquicuna, panicuna, Apunchi Jesushuanmi shinllipacha tucuna canguichi. Paipaj ushaihuanmi, shinlli tucuna canguichi.

¹¹Taita Dios cushca, macanajungapaj tucui churajunacunata churajuichi. Diablo urmachingapaj, pacalla chapajujta shinlli shayarishpa mishangapajmi, chashna churajuna canguichi.

¹²Ñucanchi macanajuica, yahuarta, aichata charij runacunahuanga na canllu. Ashtahuangarin mandaj ayacunahuan, ninan ushaita charij ayacunahuanmi macanajunchi. Cai pachapi yana yana tutapishna causajcunata mandaj ayacunahuan, jahua huairapi mandaj, nalita rurachij, ushaita charij ayacunahuanmi macanajunchi.

¹³Shinamandami macanajungapaj, Taita Dios caramujuj tucui churajunacunata japina canguichi. Nali punllacuna chayamujpi, shinlli tucushpa macanajungapajmi, shina japina canguichi. Shina macanajushpa tucuita mishashpami, shinllipacha shayaringuichi.

¹⁴Na llullashpa villajuj Shimihuanga, cinturasta alipacha chumbilishcashnami shayarina canguichi. Imatapash cashcatapacha ruranahuanga, jirru churajunata churajunshnami shayarina canguichi.

¹⁵Casilla ali causaita yachachij, ali villaita villajungapaca, botasta churajunshnami alichirishcalla causana canguichi.

¹⁶Tucuimanda yalica, alipacha crinatami jarcarina escudotashna japina canguichi. Chaihuanmi, nalicunata yarichij diablo flecha pundapi ninata japichishpa shitamushcataca huañuchi ushanguichi.

¹⁷Ima nalimandapash quishpichijujtaca, umapi churajuna jirrutashna japinguichi. Diospaj Espíritu caramushca Diospaj Shimitapash, espadatashnami japina canguichi.

¹⁸Shinallata Diosta mañanataca, na samashpa tucuipi ninanda mañashpami, Diospaj Espirituhuan causashpa mañajunalla canguichi. Cungaitapash na cungashpami, Diospajlla causajcunamandapash, tucuicunamanda Diosta mañana canguichi.

¹⁹Ñuca villajuchumbash, Dios yarichijuchunmi mañana capanguichi. Shina yarichijpimi, pipash na yachashca ali villaitaca, na manllashpa villajusha.

²⁰Shinamandami, jatun mandajpaj randi villajuchun Dios cachamushcashnallata, cadenacunahuan huatai tucushca cashpapash villajuni. Ñucaman mingashcataca, ama manllashpa villangapaj Diostaca mañapanguichi.

²¹Ñuca juyashca Tíquico shuti huauquimi, Apunchi Jesuspajtaca rurashpa aligutapacha pactachijun. Caipi imata ñuca rurashpa causajtapash, paimi cangunaman aliguta villanga.

²²Ñucanchi imashna tianajujtapash, villashpa cangunapaj shunguta cushichijuchunllatami, paitaca cachamuni.

²³Casilla aliguta causanata, juyarishpa causanata, alipacha crishpa catinataca, tucui crijcunaman Taita Diospash, Apunchi Jesucristopash carachunmi munani.

²⁴Diospaj ninan juyaica, ñucanchi Apunchi Jesucristota tucui causaipi juyashpa causajcunahuan cachunmi munani. Shina cachun.