Read Imbabura Highland Quichua FILIPENSES 1 Bible Online

FILIPENSES 1 - Imbabura Highland Quichua bible

FILIPENSES 1

¹Caitaca Pablopash, Timoteopash, Jesucristota servijcuna cashpami, Cristo Jesushuan shujlla tucushpa, Filipos pueblopi causanajuj, Diospajlla causajcunaman escribinchi. Cangunata ricushpa yachachijcunamambash, ayudajcunamambashmi escribinchi.

²Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munanchi.

³Cangunata yariashpami, ñuca Taita Diostaca pashi nishpa mañajunilla.

⁴Ima horas Diosta mañajushpapash, tucui cangunamandaca cushijuihuanmi cutin cutin mañajuni.

⁵Ali villaita villangapaj tandanajushpa callarishca punllamandapacha cunangamanmi, ñucaman alita rurashcanguichi.

⁶Shina alita rurachun callarichij Diosca, Jesucristo tigramui punllacamanmi, ashtahuan aligutapacha pactachinajuchun, ushaita caranga. Chaitaca alimi yachani.

⁷Cangunata cashna yarinaca ñucapica ali cajpimi, tucui shunguhuan juyashpa ninandapacha cushijuni. Prezu tiajujpi mandajcunapajman ñucata apajpipash, ali villaica napacha llullachu nishpami, shinllitapacha villajuni. Dios ninanda juyashpa caramujujtaca, ñucahuanllatami japinguichi.

⁸Jesucristo ninanda juyajunshnami, ñucapash tucui cangunataca ninanda juyajuni. Chaitaca, Taita Diosca chashnapachami nishpa villangallami.

⁹Ashtahuan juyarishpa, imaguta yachajunapipash, aliguta yarishpa yachajuna ushaita carachunmi, Diostaca mañajuni.

¹⁰Shina yachajushpami, imatapash aliguta ruranata yariaj causanguichi. Shina causashpami, Cristo tigramui punllapica, ima nalitapash na rurashca cashpa, na juchachi tucunguichi.

¹¹Jesucristo cangunaman ushaita carajpimi, imatapash cashcatapacha rurashpa, fucushca granota jundachinshna, ninanda japinguichi. Chaimandami Taita Diostaca, punchapambagumi cangui nishpa, ninanda alicachinguichi.

¹²Huauquicuna, panicuna, caita yachachunmi munani: Caipi ñuca ima tucujujpipash, ali villaica maipi cashpapash, ashtahuan ashtahuanmi uyarijun.

¹³Cristomanda caipi prezu tiajujtaca, jatun mandajpaj cai huasipi tucui soldadocunapash, shujcunapash tucuillami yachan.

¹⁴Shinallata chaupi yali crijcunami, ñuca prezu tiajujtaca yachan. Chaimandami ashtahuan shinlli tucushpa, Apunchi Jesusmandaca na manllashpa, Diospaj Shimitaca cushijushpa ashtahuan villanajun.

¹⁵Huaquingunaca, ñucapash chashna cashcaiman yashpa ñucata fiñashpa rimanamandallami, Cristomandaca villanajun. Ashtahuangarin shujcunaca, ali munaihuambachami villanajun.

¹⁶Caishujcunaca, paicuna alicachi tucungapaj munashpallami, ñuca prezu tiajujpi ashtahuan llaquichingapaj, Cristomanda nali shunguhuan villanajun.

¹⁷Ashtahuangarin shujcunaca, ñucata juyaimandami villanajun. Ali villaica, napacha llullachu nishpa villajushcamanda, ñuca prezu tiajujtami yachan.

¹⁸Ñucata fiñashpa villashcapash, imapash na canllu. Ali shunguhuan cashpa, nali shunguhuan cashpapash, Cristomandami villanajun. Chaimandami ninanda cushijuni. Ashtahuan cushijusharami.

¹⁹Canguna Diosta mañashcamanda, Jesucristopaj Espíritu ñucata ayudajpi, caimanda llujshinataca yachanipachami.

²⁰Chaimandami ñuca munashpa yarijushcashna, imapipash na pingai tucusha. Cristo ñucaman ushaita carashcata yariashpami, pundamandapacha ricuchircani. Chaitaca causashpapash, huañushpapash, ashtahuan juyaillagutapachami cunambipash ricuchingapaj munani.

²¹Shinamandami ñucaca causajushpapash, Cristopajlla causajuni. Huañushpapash, pai carasha nishcatami japigrisha.

²²Ashtahuangarin Diospajta rurangapaca, cai causaipi causajushpami ali canga yanimi. Shina cajpimi, maijanda agllaitapash na ushani.

²³Causanapash, huañunapash ñucapaca ali cajpimi, ishcanditallata munani. Cristohuan causagrinacarin, ashtahuan aligupacha cajpimi, huañungapajpash munani.

²⁴Shina cajpipash cangunamandaca cai causaipi causanami, ashtahuan ali canman yajunimi.

²⁵Chashna yariajushpami, nara huañunataca yachani. Canguna crishcatapash, ashtahuan aliguta catishpa cushijuchunmi, tucui cangunahuan ashallatapash causashcaiman yajuni.

²⁶Cangunapajman cutin ñuca tigramujpimi, ñucamandaca Cristo Jesushuan juyailla ninandapacha cushijunguichi.

²⁷Cristomanda ali villaita yachajushcashna, aliguta causapanguichi ninimi. Cangunapajman shamushpapash, na shamushpapash, canguna crishpa shujllashnalla tucushpa, alipacha catinajun nijta uyangapajmi munani. Ali villaita crishpa, tucuilla shujllashnalla tucushpa, imagutapash ninanda ruranajun nijtapash, uyangapajmi munani.

²⁸Cangunata nalicachijcunataca, imatapash na manllanachu canguichi. Paicunaca, chingaita chingagrinatami ricuchinajun. Ashtahuangarin cangunaca, ña quishpirishcatami ricuchinguichi. Chaitaca, Taita Diosmi caramujun.

²⁹Cristomandaca, na paita crinatalla Diosca carashcachu. Ashtahuangarin paimanda llaquita apanatapashmi carashca.

³⁰Chaimandami cangunapash, ñucapash chai llaquitallata apanajunchi. Llaquita ñuca apajujtaca, ñami pundallata ricurcanguichi. Cunambash, chai llaquita ñuca apajujtaca yachanguichimi.