Read Imbabura Highland Quichua FILIPENSES 2 Bible Online

FILIPENSES 2 - Imbabura Highland Quichua bible

FILIPENSES 2

¹Cristopi cangunapaj cushijui tiajpi, juyaimanda cushui tiajpi, Diospaj Espiritupash cangunahuan cajpi, tucui shunguhuan juyarina tiajpi, shujcunata llaquina yuyai tiajpica,

²ñucatami cushichihuanguichi. Shujlla cashcata yarishpa, chai juyaitallata charishpa, shujllashnapacha yuyai tucushpami, chashna cushichihuanguichi.

³Randimanda fiñanajungapajlla, na cashpaca yanga jariyangapajllapash, na imatapash ruranachu canguichi. Ashtahuangarin paimi ñucatapash yali ashtahuan ali yashpami, na jariyashpa tucuicunatallata alicachina canguichi.

⁴Maijan cashpapash quiquimbajlla ali cachunga, na yarinachu canguichi. Ashtahuangarin shujcunapajpash ali cachunmi, tucuicunallata yarina canguichi.

⁵Cristo Jesús yarishpa causashcashnallatami, cangunapash yarishpa causana canguichi.

⁶Taita Diosman rijchaj cashpapash, paica Taita Dioshuan chimbapurapachami cani, chaitaca na saquishachu nishpaca na causarcachu.

⁷Ashtahuangarin Cristoca, imata charishcatapash tucuillata saquishpami, servij tucushpa, runaman rijchajpacha tucushpa shamurca.

⁸Pai runapacha tucushpaca, ashtahuan yangallagu tucushpami causajurca. Diosta cazuj cashpami, pinganayaita cruzpi chacatashpa huañuchi tucuna cashpapash, huañuchi tucurcalla.

⁹Shina cajpimi Taita Diosca, tucuita yali ashtahuan alicachishpa, paitaca jatumbi churarca. Shinallata tucuicunapaj shuticunata yali ashtahuan ali shutigutami cararca.

¹⁰Chaimandami, Jesuspaj shutita uyashpaca, jahua pachapi tiajcunapash, cai pachapi tiajcunapash, alpa ucupi tiajcunapash, tucui ima tiashcapash cunguringa.

¹¹Taita Diosca punchapambagumari cangui ni tucuchunmi, tucuicunapaj shimihuambacha Jesucristotaca, Mandajmari cangui ninajunga.

¹²Huauquicuna, panicuna, cangunahuan cajpica ñucataca aligutami cazurcanguichi. Na cangunahuan cajpilla cazunachu canguichi, ashtahuangarin cunambi na cangunahuan cajpipash, ashtahuanmi ñucataca cazuna canguichi. Quishpirinamandaca, manllaihuan chujchuihuan rurashpami causana canguichi.

¹³Canguna aliguta ruranata yarichumbash, imagutapash Taita Diosmi caramujun. Chaita pactachishpa causachumbash, paillatami pai munashcashna cangunaman ushaita caramujun.

¹⁴Tucui imata rurashpapash, nalicachishpa parlashpa, fiñanajushpa rimarishpaca, na ruranachu canguichi.

¹⁵Taita Diospaj huahuacuna cashcamandaca, na juchachi tucushpa, na jariyashpa, ima mapapash illajmi causana canguichi. Shina causashpami, cai pachapi causanajuj, jatun nali miraicunapaj chaupipica, punchayachij luzerogushna causanguichi.

¹⁶Causaita caraj Shimitaca, villanami canguichi. Shina villanajujpimi, Cristo tigramui punllapica, ñucapash na yanga causashpa, na yanga villajushcata ricushpa ninandapacha cushijusha.

¹⁷Ñuca servishpa causajpi canguna crishcamandami, Diosman carashpa rupachinshna ñucataca, yahuarta llujchishpa huañuchihuanga. Huañunata yachashpapash, cangunahuanga tucuicunahuanmi, ninandapacha cushijuni.

¹⁸Shinallata cangunapash, ñucahuan ninandapacha cushijunguichi.

¹⁹Apunchi Jesús munajpica, Timoteotaca cangunapajman ucha cachamusha yajunimi. Canguna aliguta causanajujta ricushpa tigramushpa villajpimi, ñucapash cushijuita japisha.

²⁰Cangunapaj ali cachunmi, Timoteopash cangunataca ñucashnallata tucui shunguhuan yariajun. Paishnaca, pipash na tianllu.

²¹Tucuicunami, quiquimbajlla ali cachun mascanajun, Jesucristopaj ali canataca na mascanajunllu.

²²Ashtahuangarin Timoteotaca, aliguta rurashpa causajtaca ñami yachanguichi. Ali villaita ñuca villajujpica, taitahuan churi imagutapash rurashpa purijunshnami, paipash ñucahuan villajurca.

²³Shina cajpimi, ñucata imata ruranatapash ali ricushpaca, Timoteota cangunapajman cachamusha yajuni.

²⁴Ashtahuangarin ñucapacha cangunata ricungapaj ucha rishcaiman yashpami, Apunchi Jesustalla ninanda yariajuni.

²⁵Ashtahuangarin Epafrodito shuti huauquitaca, cachanapacha cajpimi cachamugrini. Ñucahuan cumba tucushpami, paica maipipash na manllashpa villajun. Paitaca, ñucata ayudashpa imagutapash rurashpa carachunmi cachamurcanguichi.

²⁶Paica, tucuilla cangunata ricungapaj ringapaca, ninandapachami munajurca. Shinallata pai huañujushcata canguna yachashcamandapash, paica ninandapachami llaquirirca.

²⁷Paica, ungushcapacha cashpami, ña huañunallapacha carca. Ashtahuangarin ama jahuan jahuan llaquita ñuca apajuchunmi, Taita Diosca paitapash, ñucatapash llaquihuashca.

²⁸Shina cajpimi, cutin paita ricushpa cushijuchun, ñucapash ama cashna llaquilla tiajungapaj, cangunata ricuchun ucha cachamungapaj munajuni.

²⁹Paica, Apunchi Jesusta alipacha crijmi. Paitaca, tucui shunguhuan cushijushpa mingachipanguichi ninimi. Paishnalla ali crijcunataca, ninanda alicachipanguichi.

³⁰Cristopajta rurajushpami, paica ashagumandalla na huañuparca. Paipaj causaitapash na llaquishpami, canguna carupi causashpa, ñucata na servi ushashcata paica rurajurca.