Read Imbabura Highland Quichua FILIPENSES 3 Bible Online

FILIPENSES 3 - Imbabura Highland Quichua bible

FILIPENSES 3

¹Huauquicuna, panicuna, cunanga Apunchi Jesuspaj cashcamandaca, ninanda cushijunguichi. Canguna chaitallata tigrashpa uyanaca, alipacha cajpimi cutin escribinamandaca, na llaquirini.

²Alcushna causajcunamanda, nalita yachachijcunamandaca cuidarinami canguichi. Runapaj aichamanda aicha carata fitinapachami canguichi nijcunamandapash cuidarinami canguichi.

³Ashtahuangarin circuncisión nishcata rurashca ñucanchimi, Diospaj Espíritu yuyaita cujpi, Taita Diosta servinajunchi. Cai causaipi imatapash rurashcahuanlla napacha quishpirinata yachashpami, Cristo Jesushuan cushijunchi.

⁴Ñucapash, cai causaipi rurashcatalla yariajunata charinimi. Paicuna cai causaipi imatapash rurashcahuan jariyajpica, ñucacarin ashtahuanmi yariajuiman.

⁵Huacharishca pusaj punllahuanga, ñucataca ñami circuncisionda rurahuashca carca. Israel puramanda Benjamín aillu purami cani. Taitandi, mamandi hebreopura cajpimi, ñucapash hebreo purallata cani. Mandashca shimimanda parlashpaca, fariseo purami cani.

⁶Chaita catichun munashpami, tandanajuj crijcunataca ninanda fiñashpa catiriashpa llaquichij carcani. Mandashca shimipi nijunshna imatapash cashcatapacha ruraj cajpimi, pipash imatapash na juchachi ushahuarca.

⁷Imapash alimi canga yashpa catijushcataca, Cristota juyai callarishpami, tucuillata jichurcani.

⁸Ñucata Mandaj Cristo Jesusmanda yachajunaca, juyaillagupacha cajpimi, punda imatapash alimi canga yajushcataca, tucuillatapacha cungarcani. Cristota juyashpa tucuita saquishpami, paihuan causangapaca jupa ismushcatashna, tucuilla jichurcani.

⁹Cristohuan causangapaj yariajlla cashpami, mandashca shimita pactachishpa ñucapajlla ali cachunga, na munani. Ashtahuangarin Cristota crijpimi Taita Diosca, imatapash cashcatapacha rurashcatashna chasquihuarca. Diosca, Cristota crijpillami chasquijun.

¹⁰Cunanga, Cristota rijsingapaj munashpami, pai causarishpa, imatalla rurashcatapash ashtahuan yachangapaj munani. Llaquita apashpa pai huañushcashnami, ñucapash llaquita apashpa huañungapaj munani.

¹¹Huañushcacunapaj chaupimandaca, imashnamambash causarishapachami yajunimi.

¹²Ñucaca, ñami cai tucuita rurarcani, ñucaca ima pandatapash na ruranichu nitaca na ushanichu. Ashtahuangarin Cristo Jesús ñucata imapaj agllashcataca pactachishapacha yashpami, calpanshna rijunilla.

¹³Huauquicuna, panicuna, ñami chayagrircani nitaca na ushanichu. Ashtahuangarin caitallami rurashpa causajuni: Punda causashcataca, cungaita cungashpami, japigrishapacha yashpa, ninanda ñaupajman rijuni.

¹⁴Cristo Jesushuan shujlla tucushcamandami, jahua pachapica aliguta carajpi japigrichun, Taita Diosca ñucata cayahuashca. Chaimambacha chayangapajmi, calpashpa rijunilla.

¹⁵Shina cajpica, ima pandatapash na ruraj cashpaca, tucuicunami chashnallata yarina canchi. Imatapash shujta yarijpica, Taita Diosca aliguta yachachingallami.

¹⁶Ña shina yachajushpa rinajushpapash, aligutapacha cazushpa shujllashnalla yarishpa, aligutapacha catishunchi.

¹⁷Huauquicuna, panicuna, ñuca imashna causashcatapachami catina canguichi. Imashna causachun cangunaman ñucanchi yachachishcata catijcunatapash ricushpami, catina canguichi.

¹⁸Cutin cutin villashca cashpapash, chaitallatami huacashpapacha, cunambash yarichini: Cristota cruzpi chacatashpa huañuchishcatapash, ashtacacunami fiñashpa purinajun.

¹⁹Chashnacunaca tucurimui punllapimi, chingaita chingagringa. Chaicunaca, paicunapaj vijsatallami diostashna yarinajun. Imapash pinganayaicunata rurashpami jariyanajun. Cai pachapi tiajtallami yarinajun.

²⁰Ashtahuangarin ñucanchi causagrina llactaca, jahua pachapimi. Jahua pachamanda Quishpichij, Apunchi Jesucristo tigramunatami ñucanchica shuyanajunchi.

²¹Paimi, ñucanchipaj tucurinalla cuerpotaca, paipaj cuerpotashna punchapambaguta ruranga. Paica, tucui tiashcata mandajuj ushaihuanmi, chashna ruranga.