Read Imbabura Highland Quichua FILIPENSES 4 Bible Online

FILIPENSES 4 - Imbabura Highland Quichua bible

FILIPENSES 4

¹Cunanga, ñuca juyashca huauquicuna, panicuna, cangunata ricungapajmi ninanda munani. Cangunaca, ñucata ninanda cushichijcunami canguichi. Cangunamandami, coronaguta japigrinataca charini. Juyashca crijcuna, Apunchi Jesustaca shinllipacha tucushpa catipanguichi ninimi.

²Evodia shuti, Síntique shuti panicuna. Cangunataca, Apunchi Jesusmanda shujlla cashcata yarishpa causapaichi ninimi.

³Ñucahuan Diospajta ruraj can huauquitaca, caitapashmi nini: Chai panicunaca, Clemente shuti huauquihuan, shuj huauquicunandimi, ali villaita ñuca villajujpica, na manllashpa aligutapacha ñucata ayudahuarca. Chaimandami, paicunataca ayudapai nini. Paicunapaj shuticunataca, causaita causagrinata ricuchijuj libropimi, escribishca tiajun.

⁴Apunchi Jesushuan shujlla tucushcamandaca, tucui causaipi cushijupaichi. Cutimbash: ¡Cushijupaichi! ninimi.

⁵Canguna llaquishpa causanajujtaca, tucui gentecuna yachachunmi munani. Apunchi Jesús shamunaca, ñami chayamujun.

⁶Ima illajpipash, na chaitalla yariashpa llaquilla causanachu canguichi. Ashtahuangarin Taita Diosmanmi, imatapash villashpa ninanda mañana canguichi. Tucui imamandapash pashi nishpa mañaichilla.

⁷Casilla ali causaitaca, Taita Diosmi caramunga. Chashna aliguta causanataca, pipash na yachajui ushanalla cajpimi, cangunapaj shungutapash, yuyaicunatapash, Cristo Jesushuan shujlla tucushcamanda huacaichijunga.

⁸Huauquicuna, panicuna, caitallami ningapaj munani: Imapipash na llullashpa, maipipash aliguta causashpa, imatapash cashcatapacha rurashpa, tucuipi mapa illaj canata, tucuicunata juyaj canata, tucuipi ali canata, tucuicuna juyashca canata, alicachishca canata munashpaca, caitallami yarina canguichi.

⁹Ñuca yachachijpi yachajushcata chasquishpami, catina canguichi. Ñuca imata rurashpa ricushcatapash, uyashcatapashmi catishpa rurana canguichi. Shina causajpimi, casilla ali causaita caraj Taita Diosca, cangunahuan canga.

¹⁰Ñucata cutin yarishpa canguna caramujpimi, Apunchi Jesusmandaca ninandapacha cushijuni. Ñucata cungashcataca, na ninichu. Ashtahuangarin ñucata yarishpapash, cachamuitallami na usharcanguichi.

¹¹Imapash illaimandaca, na cashna nijunichu. Imata charishpapash, chaigullahuan cushijushpa causanatami yachajurcani.

¹²Charishpapash, na charishpapash, imashna causanatapash, tucuipi imashna causanatapash yachanimi. Micushpa causanatapash, na micushpa causanatapash yachanimi. Charij causanatapash, imapash illaj causanatapash yachanimi.

¹³Cristo shinllipacha ushaita carajpimi, tucuita rurai ushani.

¹⁴Shina cajpipash, ñuca jatun llaquipi cajta ricushpami cangunaca, ñucataca cushichingapaj carahuarcanguichi.

¹⁵Filipos pueblopi causanajuj crijcuna, cangunallata ñami yachanguichi. Ali villaita villai callarijushpa, Macedonia shuti llactamanda ñuca rijujpica, tandanajuj chaishuj crijcunaca, imagutapash na carahuarcachu. Ashtahuangarin cangunallami, ñuca villajujta uyashcamanda, culquiguta cararcanguichi.

¹⁶Ñucaca, Tesalónica pueblopi cashpa, imagupaj na charijpipash, cangunami cutin cutin carashpa cachamurcanguichi.

¹⁷Imatapash carahuachun yachashpaca, na chashna nijunichu. Ashtahuangarin Diospaj ñaupajpi, cangunapajllata ashtahuan japigrina mirachunmi, cashnaca nijuni.

¹⁸Canguna caramushcagutaca, tucuita japishpami, cunanga ashtacata charini. Epafrodito shuti huauquiman mingashpa cachamushcahuangarin, ashtahuanmi charini. Canguna cachamushcami, Diosman carashpa rupachijpi, mishquillagu ashnajunshna tucushca. Chaitaca, Taita Diosmi cushijushpa chasquijun.

¹⁹Ñuca Taita Diosca, imagutapash ninandami juyailla charin. Chaitami, canguna imaguta charichumbash, Cristo Jesusmanda caramunga.

²⁰Shina cashcamandaca ñucanchi Taita Diostami, causaita causaicaman punchapambagumi cangui nina canchi. Shina cachun.

²¹Cristo Jesusmanda Diospajlla causajcunataca, tucuicunata alillachu capanguichi nijunmi nipanguichi. Ñucahuan purinajuj huauquicunapashmi, cangunataca alillachu capanguichi ninajun.

²²Diospajlla causajcunapash, tucuicunami cangunataca alillachu capanguichi ninajun. Cesarpaj huasipi causanajuj crijcunacarin, ninandapachami cangunataca alillachu capanguichi ninajun.

²³Ñucanchi Apunchi Jesucristopaj ninan juyaica, tucui cangunahuan cachunmi munani. Shina cachun.