Read Imbabura Highland Quichua COLOSENSES 1 Bible Online

COLOSENSES 1 - Imbabura Highland Quichua bible

COLOSENSES 1

¹Taita Dios munajpi, Jesucristo villachun cachashca Pablomi cani. Caitaca, huauqui Timoteondimi,

²Diospajlla causaj, Cristota alipacha cazuj, Colosas pueblopi causanajuj huauquicunaman, panicunamanmi escribinchi. Ñucanchi Taita Diospash, Apunchi Jesucristopash ninan juyaita, casilla ali causaiguta, cangunaman carachunmi munanchi.

³Cangunamanda na samashpa Diosta mañajushpami, ñucanchi Apunchi Jesucristopaj Taita Diosta pashi ninajunchi.

⁴Jesucristotaca alipacha crijcuna cajta, Diospajlla causajcunatapash, tucuicunata juyanajujta uyashpami, chashna ninajunchi.

⁵Jahua pachapi alichishca tiajujta japigrinata shuyanajushpami, chashna causanajunguichi. Na llullashpa villajuj ali villaita uyaimandami, chaita yariajlla canguichi.

⁶Na llullashpa villajuj shimica, cai pachapica tucui llactacunapi mirajushpami, cangunamambash chayamurca. Shinamandami cangunapash: “Taita Diosca ninandapachami juyan” nishpa villanajujta uyashca punllamandapacha, grano fucujunshna miranajunguichi. Shinallatami cai pachapica, tucui llactacunapi miranajun.

⁷Ñucanchi juyashca huauqui Epafras yachachijpi yachajushcashnami causanajunguichi. Paica alipacha pactachij, Cristopajta ruraj cashpami, chashnaca alipacha cangunaman yachachijun.

⁸Diospaj Espíritu yarichijpimi, juyarishpa causanajun nishpami, paica ñucanchiman villaj shamurca.

⁹Shinamandami ñucanchipash, chaita uyashca punllamandapacha cungaitapash na cungashpa, cangunamandaca Diosta mañanajunchi. Dios munashcata aligutapacha yachajuchun, paipaj Espiritumanda aliguta yarishpa imatapash tucuita yachajuchunmi mañanchi.

¹⁰Shina yachajushpami, Apunchi Jesús munashcata imatapash aliguta rurashpa, paitaca tucuipi cushichinguichi. Shinallata grano fucujpi tandachinshnami, imatapash aliguta ruranajunguichi. Taita Diosmandaca, ashtahuan ashtahuan viñanshnami yachajuna canguichi.

¹¹Paipaj jatun punchapamba ushaihuan, cangunata shinllichishpa charichunmi, Diostaca mañanchi. Chai ushaita carajpimi, imapipash na ñapash fiñarishpa, ali shunguhuambacha causai ushanguichi.

¹²Shinallata ninanda cushijushpami, Taita Diostaca pashi ninajunguichi. Paimi, paipajlla causajcunamambash, paipaj punchapamba llactapi carangapaj, ñucanchimambash alichishca charijun.

¹³Yanapi huatashpa charijujpaj maquimandaca, Diosmi ñucanchita cacharichishpa, paipaj juyashca Churi mandajuj llactaman yalichishca.

¹⁴Paipaj Churipaj yahuarmandami, Diosca ñucanchipaj juchacunata anchuchishpa quishpichirca.

¹⁵Cristoca, pipaj ñavipipash na ricurij Taita Dios imashna cajtami ricuchijun. Paica, tucui imatapash nara rurajpillatami, pundallata ña tiashca.

¹⁶Jahua pachapi, cai pachapi ricunallacuna, na ricunallacunatapash ima tiachumbash Diosca, paipaj Churihuanllatami tucuita rurashca. Jatun mandajcunata, tucui mandajcunata, cati mandajcunata, ushaita charijcunatapash, paipaj Churipaj ali cachunmi, paihuanllata Diosca tucuita rurashca.

¹⁷Imapash nara tiajpillatami, Cristoca ña pundata tiashca. Tucui ima cashpapash, paipaj maquipimi tianajun.

¹⁸Tandanajuj crijcunaca, Cristopaj cuerposhnami, paica umashnami. Tucui imatapash pailla mandangapajmi Cristoca, huañushcacunapaj chaupimanda punda causarirca.

¹⁹Taita Diosca, pai imashna cashcapash Cristopi junda cachunmi munarca.

²⁰Tucui ima tiashcapash, Cristomandalla paihuan cutin ali tucuchunmi, Diosca munarca. Cai pachapi causajcunapash, jahua pachapi tiajcunapash, Dioshuan casilla aliguta causachunmi Cristoca, cruzpi yahuarta jichashpa huañurca.

²¹Cangunapaj yuyaipi imatapash nalita yarishpa, nalita rurashpami, pundacunaca Diosta na rijsishpa, fiñashpa chingashca causarcanguichi. Ashtahuangarin cunanga, Dioshuan cutin ali tucuchunmi,

²²Cristoca aichayu tucushpa, ninan llaquita apashpa huañurca. Paipajlla causashpa, na mapayashcata, na juchachi tucushcata, Diospaj ñaupajpi cangunata ricuchingapajmi, chashna huañurca.

²³Cangunaca, shinllitapacha shayachishcashnami crishpa catina canguichi. Ali villaita villajujpimi, imata japigrinatapash ña uyarcanguichi. Chaitaca, cungaitapash na cungashpami shuyana canguichi. Cai pachapi tucui miraicunamanmi villanajun. Diospajta rurachun, agllashca Pablomi cani.

²⁴Cunanga, cangunapaj ali cachunmi, llaquita apajushpapash ninanda cushijuni. Tandanajuj crijcunamanda llaquicunata apachun Cristo munashcatami, ñucapaj cuerpohuan llaquita apashpa pactachijuni. Tandanajuj crijcunaca, Cristopaj cuerposhnami.

²⁵Cangunapaj ali cachunmi Taita Diosca, paipajta rurachun agllahuarca. Shinamandami na samashpa, Diospaj Shimitaca villajunilla.

²⁶Diosca, ñaupa huatacunamandapacha cunan punllacamanmi cai shimitaca, pacalla charijushca. Ashtahuangarin cunambimi, paipajlla causajcunaman yachachishca.

²⁷Paicunamanmi Taita Diosca, na israelcunamambash carangapaj munashpa, juyailla pacalla charijushcataca rijsichirca. Chai pacalla tiajushca Cristoca, cangunapaj shungupimi causajun. Paimandami, punchapamba llactapi causagrinata shuyanajunguichi.

²⁸Ñucanchica, Cristomandami villanajunchi, shinlli tacurinajunchi. Cristo Jesushuan shujlla tucushpa, ima pandatapash na rurashcatami, tucuicunallata Diosman ricuchigrina canchi. Chaipajmi, imagutapash aliguta yachajuchun, tucuicunaman yarichishpa yachachinchi.

²⁹Shina yachajuchunga, Cristo caramujuj ninan ushaihuanmi, macanajushpa mishanshna paipajta rurajuni. Imata rurachumbash, paimi ñucaman ninan ushaita caramujun.