Read Imbabura Highland Quichua COLOSENSES 2 Bible Online

COLOSENSES 2 - Imbabura Highland Quichua bible

COLOSENSES 2

¹Ashtahuangarin caitami canguna yachachun munani: Cangunamanda, Laodicea shuti pueblopi causajcunamandapash, ñucata ima horallapash nara ricushca tucui crijcunamandapashmi, ñucaca ninanda macanajunshna imatapash rurajuni.

²Paicunapaj shungupica tucuicunallata cushijushpa, shujlla cashcata yarishpa juyarishpa alipacha yachajungacamanmi, cashna rurajuni. Shina juyarishpa, imata cashpapash aligutapacha yachajushpami, Taita Dioshuan, Cristohuan imata pacalla charijushcatapash tucuita yachajunga.

³Imatapash juyailla yarinata, alipacha yachajunataca, Cristollatami pacashca charijun.

⁴Caitaca, pipash juyailla rimaj tucushpa, cangunata ama umachinajuchunmi, cashna nijuni.

⁵Ñucapacha cangunahuan na chaipi cashpapash, ñuca espirituca cangunahuanmi. Shina cashpami, Cristota shinllitapacha crishpa canguna catinajujta, tucui mandashcata aliguta pactachinajujta, ñuca ricujunshna cushijujuni.

⁶Shinamandami, Apunchi Jesucristota imashna chasquishcashnallata paihuanlla causana canguichi.

⁷Alipacha sapiyashca shinllipacha shayachishcashnami Jesucristotaca, aliguta crishpa catina canguichi. Cangunaman yachachishcataca na cungashpami, Diostaca pashi nishpa mañariana canguichi.

⁸Ricuichi, pipash cangunata pactarallapash aliguta yachajunami nij tucushpara, yanga parlocunatalla parlashpa pandachinman. Paicunaca, Cristomandaca na yachachishpami, runacuna yachachishpa saquishcata, cai pachapajtalla cutin cutin yachashcata yachachinajun.

⁹Taita Diosca, pai imashna cashcapash Cristopaj cuerpopimi junda tiajun.

¹⁰Shinallatami cangunapash, Cristohuan shujlla tucushcamandaca, Dioshuambacha causanajunguichi. Cristomi, mandajcunatapash, ushaita charijcunatapash, tucuita umashna mandajun.

¹¹Cristohuan shujlla tucushpami, circuncisión nishcataca na maquihuan rurai tucushcanguichi. Ashtahuangarin juchacunata rurachun yarichijuj nali munaicunata anchuchishpami, Cristoca cangunata circuncisionda rurashca.

¹²Canguna bautizarishpaca, Cristohuanmi pambai tucurcanguichi. Huañushcacunapaj chaupimanda Cristota Taita Dios paipaj ninan ushaihuan causachishcata crishcamandami, cangunapash Cristohuan causarishcanguichi.

¹³Juchacunata rurashcamanda, cuerpopi circuncisionda na rurashcamandapash, huañushcashnami carcanguichi. Ashtahuangarin Diosmi cangunapaj juchacunata tucuilla cungashpa, Cristohuan mushuj causaita carashca.

¹⁴Imata rurachun mandashpa escribishcatapash na pactachi ushajpimi, ñucanchita juchachijurca. Chaitaca, Cristota cruzpi chacatajpimi, Diosca tucuilla anchuchirca.

¹⁵Cristoca, cruzpi chacatai tucushpa huañushpami, mandajcunatapash, ushaita charijcunatapash, tucuita misharca. Paicunataca, tucuicunapaj ñaupajpi prezu apanshna ricuchishpami, urai cumuchirca.

¹⁶Cangunataca, imata micunatapash, imata ufianatapash pipash ama jarcachun ninimi. Fiesta punllacunapi, luna llullu punllacunapi, samana punllacunapipash cashnami, chashnami rurana nishpaca, ama pipash mandachun ninimi.

¹⁷Chai tucui mandashcacunaca, jipalla shamunata llandushna ricuchijcunallami. Ashtahuangarin cuerpoca Cristopajmi.

¹⁸Angelcunata yarinchimi nishpa, na jariyaj tucushpa, jahua shungulla yachachijcuna canguna juyaillaguta japigrinatara saquinguichinman. Napash ricushpatami satirishpa, paicunapaj shungu yarichijpilla, ninanda punguinshna jariyashpa purinajun.

¹⁹Paicunaca, umashna mandajuj Cristotami na catinajun. Paimi, paita crishpa paipaj tucushcacunaman carashpa shinlliyachijun. Shina shinlliyachijpimi, cuerpopi mucucuna, angucuna huatarishcashna tucuicuna aliguta causanajun. Chaimandami Taita Dios viñachijpi, pai munashcashna miranajun.

²⁰Cai pachapajtalla cutin cutin yachachishcata catinamandaca, Cristohuan huañushcashnami canguichi. Shina cashpaca, ¿imashpata cai pachapajtalla rurashpa causanajunshnallata, mandashcacunatara cazushpa cunambash catinguichi?

²¹Chai mandashca shimipica: “Ama caita tacaringuichu, ama chaitaca micunguichu, ama chaitaca tacarillatapash tacaringuichu” nijunmi.

²²Chaicunaca, micujhuan yangata tucurinallami. (Chai mandashcacunaca, runacuna yarishpa yachachishcallami).

²³Chai mandashcacunata yachajushpa catinaca, alishnallapachami ricurin. Chaicunaca, Diosta ashatalla yarishpa, na jariyashpa causanata, cuerpota llaquichinatallami yachachijun. Ashtahuangarin nali munaicunata jarcaitaca, napacha ushanllu.