Read Imbabura Highland Quichua COLOSENSES 3 Bible Online

COLOSENSES 3 - Imbabura Highland Quichua bible

COLOSENSES 3

¹Cangunaca, Cristohuan causarishcamandaca, jahua pachapi tiajtallami mascana canguichi. Chaipica Cristomi, Taita Diospaj ali ladoman tiajun.

²Cai pachapi ima tiajtapash na yarishpami, jahua pachapi tiajtalla yarishpa causana canguichi.

³Cangunaca, ñamari huañushcashna canguichi. Cangunapaj causaica, Cristohuanmi Taita Diospi pacajushca tiajun.

⁴Cangunaman causaita caraj Cristo ricurimujpimi, cangunapash paipaj punchapamba llactagupi ricuringuichi.

⁵Cai pachapajta rurachun yarichijuj munaicunataca, tucuitami huañuchinshna saquina canguichi: Huainayanata, Diospaj ñaupajpi mapayanata, nalita rurana yuyaicunata, nali munaicunata, charijyanataca na munanachu canguichi. Chaita munanaca, rurashcalla dioscunata mañanajunshnallatami.

⁶Taita Diosca, paita na cazushpa chashna nalita rurajcunatami, ninanda fiñashpa llaquichinga.

⁷Cangunapash, chashnallata nalita rurashpami pundaca causarcanguichi.

⁸Ashtahuangarin cunanga, ninanda fiñarinata, shungu ucupilla fiñarinata, nalicachishpa parlanata, nali shimicunata rimanataca, tucuitami nali causashcataca saquina canguichi.

⁹Imatapash nalita rurashpa punda causashcataca, cacharirinshna ña saquishca cashpami, caishujmanda chaishujmanda na llullarishpa causana canguichi.

¹⁰Cangunaca, ñami mushujta causangapaj callarishca canguichi. Diosmi, cangunataca paishnalla tucushpa, paita alipacha rijsingacaman mushujyachijun.

¹¹Shinamandami cunanga, griego cashpa, Judá llactamanda cashpa, circuncisión nishcata rurashca cashpa, chaita na rurashca cashpa, shuj llactamanda shamushca cashpa, maipi causaj cashpapash, servishpa causaj cashpa, na servishpa causaj cashpapash, chashnallata canguichi. Ashtahuangarin Cristoca tucuicunapajmi, tucuicunahuanmi causajun.

¹²Cangunataca, mushujta churachinshnami Taita Diosca juyashpa, paipajlla causachun agllarca. Shinamandami, tucui shunguhuan pitapash llaquishpa, juyashpa, ali shunguhuan na jariyashpa, pihuambash aligutapacha causana canguichi.

¹³Caishujhuan chaishujhuan cazurishpa, shinallata caishujhuan chaishujhuan llaquichirishca cashpapash, perdonarishpami causana canguichi. Cristo cangunapaj juchata perdonashcashnallatami, cangunapash perdonarina canguichi.

¹⁴Ashtahuangarin Tucui caicunapaj jahuaca, juyarishpa causanatami churajunshna yariajlla causana canguichi. Shina juyarishpami, tucuicuna imapipash na pandashpa aliguta causanguichi.

¹⁵Casilla ali causaita Taita Dios carashpa, cangunapaj shungupi yarichijuchunmi munani. Paillatami cangunataca, shujlla cuerpo tucushpa, casilla aliguta causachun agllarca. Shinamandami paitaca, pashi ninajuna canguichi.

¹⁶Cristo villashca shimicuna cangunapaj shungupi ninanda mirachunmi munani. Canguna purami caishujhuan, chaishujhuan chai yachajunataca yarichirishpa, tucuicuna yachajuna canguichi. Salmocunata, Diospaj Espíritu yachachishca juyailla candanacunatapash, Apunchi Jesusta pashi nishpami, tucui shunguhuan candana canguichi.

¹⁷Tucui imata rurashpapash, imata parlashpapash, Apunchi Jesuspaj shutipi alicachishpa, tucuita ruranguichi. Paimandallami Taita Diostaca, pashi nina canguichi.

¹⁸Huarmicuna, cangunapaj cusacunataca, Apunchi Jesusta crij cashcamandami, aliguta cazuna canguichi.

¹⁹Cusacunapash, cangunapaj huarmicunataca juyanami canguichi. Paicunahuanga, na millaicuna canachu canguichi.

²⁰Huahuacunapash, taita mama mandashcata, tucuipi aligutapacha cazuichi. Shina aliguta cazuchunmi, Apunchi Jesuspash munan.

²¹Taita mamacunapash, cangunapaj huahuacunataca, na yapata llaquichishpa fiñachinachu canguichi.

²²Servijcunapash, cai pachapi cangunapaj amocunataca, tucuipi cazunami canguichi. Na paicunapaj ñavipi alipi ricuringapajlla ruranachu canguichi. Ashtahuangarin Taita Diosta manllashpa, tucui shunguhuan cushijushpami rurana canguichi.

²³Imata rurashpapash, gentecunapajta ruranshnaca, na ruranachu canguichi. Ashtahuangarin Apunchi Jesuspajta rurajunshnami, tucui shunguhuan aliguta pactachina canguichi.

²⁴Canguna chashna aliguta rurashcamanda, Apunchi Jesús carajpi japigrinata alimi yachanguichi. Cangunapaj Amoca Cristomi, paitami servinajunguichi.

²⁵Ashtahuangarin imatapash cashcatapacha na ruraj cashpaca, nalita rurashcamandami, nalitallata japinga. Diosca, na ñavita ricushpalla chasquijunllu.