Read Imbabura Highland Quichua COLOSENSES 4 Bible Online

COLOSENSES 4 - Imbabura Highland Quichua bible

COLOSENSES 4

¹Amocunapash, cangunata servijcunataca imatapash cashcatapacha aligutallami rurana canguichi. Cangunapajpash shuj Amo jahua pachapi tiajta yachanami canguichi.

²Diosta mañanataca, cungaitapash na cungashpami, pashi nishpa mañanajunalla canguichi.

³Shina mañanajushpami, ñucanchimandapash Cristomanda nara uyashca Shimita villanajujpi, punguta pascanshna Apunchi Jesús yarichijuchun, Diosta mañanajunguichi. Paimanda villajushpami, prezu tiajuni.

⁴Pai mingashcataca tucuita villajuchun, ñucamanda mañapanguichi.

⁵Villana cajpica, na crijcunahuan cashpapash, ama punlla yanga yalichunmi, aliguta yarishpa villajuna canguichi.

⁶Pi imata tapuchijpipash, cachihuan mishquiyachishpa churashcatashnami aliguta villangapaca, ña yachajushcalla purina canguichi.

⁷Ñucanchi juyashca Tíquico shuti huauquimi, ñuca imashna causajujtapash, cangunaman tucuita villanga. Paica, Apunchi Jesusmanda ñucahuan villashpami, alipacha pactachishpa purijun.

⁸Cangunaman villashpa cushichishpa, canguna imashna causanajujtapash yachashpa villangapaj tigramuchunmi, paitaca cachamuni.

⁹Canguna puramanda shamushca, tucuita pactachij, ñucanchi juyashca Onésimo shuti huauquitaca, Tíquico shuti huauquihuanmi cachamuni. Caipi ima tucujujtapash, paicunami tucuita villanga.

¹⁰Aristarco shuti huauquipash, ñucahuanmi prezu tiajun. Bernabepaj sobrino huauqui Marcospashmi, cangunataca alillachu capanguichi nijun. Marcos imata ruranatapash, cangunapajman ñami cachamurcani. Pai chayamujpica, aliguta chasquipanguichi.

¹¹Justo ni tucushca Jesús shuti huauquipash, cangunataca alillachu capanguichi nijunmi. Circuncisión nishcata rurashca puramandaca, paicunallami Taita Dios mandajujmanda, caipi ñucahuan yachachinajun. Chaimandami ninandapacha cushijuni.

¹²Canguna puramanda shamushca Epafras shuti huauquipash, alillachu capanguichi ninmi. Paica, Cristota servij cashpami, cangunamandaca cungaitapash na cungashpa, Diosta ninanda mañariajun. Taita Dios munashcashna shinllitapacha shayarishpa, ima pandatapash na rurashpa causachunmi mañajun.

¹³Cangunatapash, Laodicea shuti, Hierápolis shuti pueblocunapi causaj crijcunatapash, Epafras huauquica alipachami yariajun. Paitaca, ñuca ricushcapacha cashpami villani.

¹⁴Ñucanchi juyashca jambij doctor Lucaspash, Demas shuti huauquipashmi, cangunataca alillachu capanguichi ninajun.

¹⁵Laodicea shuti pueblopi causanajuj huauquicuna, panicunatapash, Ninfas shuti huauquitapash, paipaj huasipi tandanajuj crijcunatapash, alillachu capanguichi nishcami nishpa villapanguichi.

¹⁶Cai cartata canguna purapi ricushca jipaca, Laodicea pueblopi tandanajuj crijcunaman leyishpa uyachipanguichi. Shinallata Laodicea puebloman ñuca cachashca cartatapash, japishpa ricupanguichi.

¹⁷“Apunchi Jesuspajta rurachun mingashcataca, cazushpa pactachingui” nishcami nishpa, Arquipo shuti huauquimambash villapanguichi.

¹⁸Alillachu capanguichi nishpaca Pablomi, ñuca maquihuambacha caitaca escribimuni. Ñuca prezu tiajujtaca, ama cungashpa yarihuanguichi. Diospaj ninan juyaica, cangunahuan cachunmi munani. Shina cachun.