Read Imbabura Highland Quichua 1 TESALONICENSES 1 Bible Online

1 TESALONICENSES 1 - Imbabura Highland Quichua bible

1 TESALONICENSES 1

¹Caitaca Pablohuan, Silvanohuan, Timoteohuanmi, Tesalónica pueblopi tandanajuj crijcunaman escribinchi. Cangunaca, Taita Dioshuan, Apunchi Jesucristohuanmi canguichi. Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munanchi.

²Cangunataca na cungashpami, Taita Diosta pashi nishpa, tucuicunata yariashpa mañanajunchi.

³Cangunaca, alipacha crishpami, ninan juyaita charishpa, imatapash aliguta rurashpa causanajunguichi. Shinallata ñucanchi Apunchi Jesucristo tigramunataca, tucui shunguhuanmi yarishpa shuyanajunguichi. Shina cajpimi cangunata na cungashpa, ñucanchi Taita Diostaca mañanajunchilla.

⁴Taita Dios juyashca huauquicuna, panicuna, cangunataca Dios agllashcatami yachanchi.

⁵Ali villaita cangunaman ñucanchi villashpaca, na ñucanchi shimimandalla villarcanchica. Ashtahuangarin Diospaj jucha illaj Espíritu ushaita carajpimi, chai villana shimica na llulla cajtapacha yachashpa villarcanchi. Maijanlla cangunata juyaimanda cangunapajman ñucanchi shamushcataca, cangunallata yachanguichimi.

⁶Apunchi Jesusta ñucanchi catinajujta ricushpami, cangunapash ñucanchishnallata paita catinajunguichi. Ñucanchi villajujtaca, jatun llaquita apanajushpapash, Diospaj jucha illaj Espíritu cushichijpimi, cushijushpa chasquircanguichi.

⁷Shina canguna aliguta catijta ricushpami, Macedonia shuti, Acaya shuti llactacunapi causanajuj crijcunapash, tucuilla aliguta catirca.

⁸Apunchi Jesusmanda cangunaman villashpaca, na Macedonia shuti, Acaya shuti llactacunapilla villashpami, ashtahuangarin Taita Diosta canguna crishcataca, tucuipi uyashca. Chaimandami ñucanchica, na ashtahuan imatapash parlana canchi.

⁹Cangunapajman ñucanchi shamujpi imashna aliguta chasquishcata, shinallata yanga dioscunata saquishpa, na llullaj, causajujlla Taita Diosta servingapaj tigrarishcataca, paicunallatami parlanajun.

¹⁰Taita Diosca, paipaj Churitaca, huañushcacunapaj chaupimandami causachirca. Cunanga, jahua pachamanda Jesús tigramunatami shuyanajunguichi. Dios ninanda fiñashpa llaquichina punlla chayamujujpipash, paimi ñucanchitaca cacharichinga.