Read Imbabura Highland Quichua 1 TESALONICENSES 2 Bible Online

1 TESALONICENSES 2 - Imbabura Highland Quichua bible

1 TESALONICENSES 2

¹Huauquicuna, panicuna, cangunata ñucanchi ricungapaj rishcapash na yanga cajtaca, cangunallata yachanguichimi.

²Cangunallata yachanguichimi, ñucanchica pundallatami Filipos pueblopi causajcuna nali shimicunata rimajpi, ninanda nalicachi tucurcanchi. Chashna cajpipash, ñucanchi Taita Dios shinlli tucuchun, ñucanchiman ushaita carajpimi, villachun na munajpipash, Taita Diosmanda ali villaitaca cangunaman villarcanchi. Chaitaca yachanguichimi.

³Ñucanchica, pandashpa nali cachun yashpa, cangunata umangapaj munashpaca, na shina aliguta yarichircanchica.

⁴Ashtahuangarin Taita Diosca, ñucanchi imashna cajta ricushpa alicachishpami, ali villaita villanataca, ñucanchiman mingarca. Shinamandami gentecunata cushichinataca, na mascashpa, ashtahuangarin ñucanchi shungutapash ricujuj Taita Diosta cushichingapaj villanajunchi.

⁵Ñucanchica, ima horasllapash uyanayaita llullashpaca, na parlashcanchica. Shinallata charijyanatalla munashpapash, na villarcanchica. Chaitaca cangunapash yachanguichimi, Taita Diospash yachanmi.

⁶Shujcuna cashpa, canguna cashpa, maijan cashpapash, ñucanchita alicachishcanman yashpaca, na purircanchica. Ñucanchica, Cristo villagrichun cachashcacuna cashpami, imata rurachumbash cangunataca mandana ushaita charinchi.

⁷Ashtahuangarin mama paipaj uchilla huahuacunata juyashpa viñachinshnami, cangunataca charircanchi.

⁸Ñucanchica, cangunataca ninanda juyashpami, Taita Diosmanda ali villaita villarcanchi. Cangunamandaca, huañuitapash huañushunlla yashpami, na saquishpa villarcanchi. Cangunaca, ninanda juyai tucushcami canguichi.

⁹Huauquicuna, panicuna, imagupaj cashpapash, ninanda shaijungacaman ñucanchillata imatalla rurashcataca, cangunallata yaringuichimi. Tutapash, punllapashmi, imagutapash rurashpa tiarcanchi. Imatapash mañashpa cangunata ama fiñachingapajmi chashna rurashpa, Taita Diosmanda ali villaita cangunaman villarcanchi.

¹⁰Cangunahuan cashpaca, Diospajlla causashpa, imatapash cashcatapacha rurashpa, ama juchachi tucungapajmi, aligutapacha causarcanchi. Chaitaca, tucui crijcunami yachanguichi, Taita Diospash yachanmi.

¹¹Huahuacunata taita viñachinshnami, ñucanchica cangunataca tucuitallata aliguta yachachishpa, cushichishpa tiarcanchi. Chaitapash yaringuichimi.

¹²Ñucanchimi, cangunataca Taita Dios munashcashna aliguta causapaichi nishpa mañarcanchi. Diosmi cangunataca, paipaj punchapamba llactapi causachun cayarca.

¹³Diospaj Shimita cangunaman ñucanchi villajpica, runacunapaj munaimanda villashcataca, na chasquircanguichica. Ashtahuangarin Taita Diospacha villachijuj Shimi cajpimi, aliguta uyashpa crircanguichi. Diospaj Shimica, canguna crij cajpimi chashna yarichijun. Chaita yarishpami, na cungashpa Taita Diostaca, pashi ninajunchilla.

¹⁴Huauquicuna, panicuna, cangunaca, Cristo Jesusmanda Taita Diospajlla tandanajuj, Judea llactapi crijcunashnami tucushcanguichi. Paicunaca, Judea llactapi causajcunallata ninanda llaquichijpimi causanajurca. Cangunapash chashnallatami, cangunapaj llacta puracunallata ninanda llaquichijpi causashcanguichi.

¹⁵Paicunaca, Apunchi Jesustapash, chai llactamandallata Dios ima nishcata villajcunatapash huañuchishcami. Chai runacunallatami, ñucanchitapash llaquichishpa calpachirca. Chaicunaca, Taita Diostapash na cazunllu. Shinallata tucui gentecuna imata rurachumbash na saquinllu.

¹⁶Chaicunaca, na israelcunapash quishpirichun nishpa, ñucanchi villachumbash na saquinllu. Chashna rurashpami, paicunaca tucui causaipi ashtahuan, ashtahuan juchata mirachinajun. Shinamandami paicunataca, Diosca ninandapacha fiñashpa, ña llaquichina tucushca.

¹⁷Huauquicuna, panicuna, cangunataca ña unaillagutami saquishpa rishcanchi. Cangunata na ricushpapash, shungupica na cungashpami yarinajunchi. Shina cashpami cangunataca, ñavi ñavi cutin ricungapaj ninan munaita charinchi.

¹⁸Cangunapajman rishun yarcanchimi. Na tucuilla rita ushashpapash, Pablo ñucallapash rishapachami yashpami, cutin cutin yarijurcanilla. Ashtahuangarin Satanasmi jarcariajurca.

¹⁹Ñucanchica, ¿ima alita japigrishun yashpata, cushijushpa shuyanajunchi? Ñucanchi Apunchi Jesucristo tigramujpi, cangunamanda coronata japigrinata yachashpami cushijunchi.

²⁰Cangunamanda alicachi tucushpa, cushijunataca yachanchimi.