Read Imbabura Highland Quichua 1 TESALONICENSES 3 Bible Online

1 TESALONICENSES 3 - Imbabura Highland Quichua bible

1 TESALONICENSES 3

¹Cangunata na ashtahuan shuyai ushashpa, Atenas shuti pueblopi ñucanchilla quedanata yarircanchi.

²Shina yarishpami, huauqui Timoteotalla cangunata ricuchunga cachamurcanchi. Paica, Taita Diosta servijmi. Shina cashpami Cristomanda ali villaitapash, ñucanchihuan villashpa purijurca. Paitaca, canguna crishcata ashtahuan shinllitapacha catinata yachachijuchunmi cachamurcanchi.

³Cashna jatun llaquicunata apanajushpapash, crishcata ama saquichunmi, chashna cachamurcanchi. Llaquita apangapajmi, ñucanchica agllai tucushcanchi. Chaitaca, cangunallata yachanguichimi.

⁴Cangunahuan ñucanchi chaipi cashpaca: “Llaquita apanapachami canchi” nishpami, ña villarcanchi. Ñucanchi nishcashnami llaquitaca, ña apanajunguichi. Chaitaca yachanguichimi.

⁵Chaita yachashpami cangunataca, na cungashpa ninanda yariajurcanilla. Canguna crishcata imashna catinajujta ñuca yachangapaj munashpami, Timoteotaca cachamurcani. Nalita rurana yuyaita cuj diablo nali yuyaita cushcata canguna catijpica, ñucanchi villashcapash yangami tucunman.

⁶Ashtahuangarin cangunata ricushpa Timoteoca, ñami ñucanchipajman tigramurca. “Aligutapacha crishpami catinajun, juyarishpami causanajun. Ñucanchitapash na cungashpami juyaihuan yarianajushca, ñucanchishnallatami paicunapash ñucanchita ninanda ricunayachinajushca” nishpami, ñucanchiman juyailla villarca.

⁷Huauquicuna, panicuna, canguna chashna aliguta crishpa catinajujtami uyanchi. Shinamandami, ñucanchica imagupash illaj cashpapash, llaquita apanajushpapash ninanda cushijunchi.

⁸Apunchi Jesusta shinllipacha catinajun nijta uyashpami, cunanga cutin ninanda cushijunchi.

⁹Ñucanchi Taita Diospaj ñaupajpica, canguna ninandapacha cushichijpimi cushijunchi. Shinamandami cangunamandaca, Taita Diosta ninandapacha pashi ninajunchi.

¹⁰Canguna ashtahuan alipacha crishpa catichunmi, ñavi ñavi ricushpa yachachingapaj munashpa, Taita Diostaca tutapash, punllapash ninanda mañanajunchilla.

¹¹Ashtahuan ñucanchi Taita Diosllata, ñucanchi Apunchi Jesucristollatami, cangunapajman ñucanchita pushashpami ali canman.

¹²Ñucanchica, cangunataca ninandami juyanchi. Shinallata canguna purapash, shujmanda shujmanda ashtahuan juyaita charishpa, shujcunatapash juyashpa causanata cangunaman Apunchi Jesús ninanda carachunmi mañanchi.

¹³Ñucanchi Apunchi Jesucristoca, paipajlla causajcunata tucuilla pushashpami tigramunga. Chai punllapica, ñucanchi Taita Diospaj ñaupajpi ama juchachi tucushca, juchapash illaj, tucui shunguhuan shinllipacha catishca ricurichunmi, cangunamandaca mañanajunchi.