Read Imbabura Highland Quichua 1 TESALONICENSES 5 Bible Online

1 TESALONICENSES 5 - Imbabura Highland Quichua bible

1 TESALONICENSES 5

¹Huauquicuna, panicuna, ima huata, ima punlla chashna tucunata cangunaman escribichunga, na shuyanachu canguichi.

²Tuta shuhua shamunshnami, Apunchi Jesusca ñapash shamunga. Chaitaca, cangunallata alipachami yachanguichi.

³“Casilla aliguta, imatapash na manllashpami causanajunchi” ninajujpimi, ñapash tucuchij llaquica, ungunalla huarmita nanai japinshna japinga. Chai jatun llaquimandaca, pipash na pacajui ushangachu.

⁴Ashtahuangarin huauquicuna, panicuna, cangunaca Jesús shamuna punllapash, shuhua shamunshna ama cungashcapi japij shamuchunmi, yana yana tutapishnaca na causanajunguichi.

⁵Cangunaca, tucuillami michapaj huahuacuna, punllapaj huahuacuna canguichi. Na yana yana tutapajchu canchi.

⁶Shinamandami, caishujcuna puñunajunshnaca, na causana canchi. Ashtahuangarin ñucanchica, aliguta yarishpa rijchariajmi causana canchi.

⁷Puñujcunaca tutami puñun, machajcunapash tutami machan.

⁸Ashtahuangarin ñucanchica, punllapaj cashcamanda, aliguta yarishpami causana canchi. Shunguta pacangapaj jirru churajunata soldado churajunshnami, crishcatapash juyanatapash churajushca causana canchi. Shinallata umapipash jirruta churajunshnami, quishpirinata yariashpa shuyana canchi.

⁹Taita Diosca ñucanchitaca, ninanda fiñashpa llaquichingapaca, na agllarcachu. Ashtahuangarin ñucanchi Apunchi Jesucristomanda quishpirinata japichunmi agllarca.

¹⁰Causashpapash, huañushpapash paihuan causachunmi, Jesucristoca ñucanchimanda huañurca.

¹¹Ashtahuan aliguta catingapajmi, cangunaca caishuj chaishuj aliguta yarichirina canguichi. Chaitaca ñami ruranajunguichi.

¹²Huauquicuna, panicuna, canguna purapi yachachijcunaman imagutapash cushpa alicachipanguichi nishpami ninanda mañapanchi. Paicunaca, Apunchi Jesusmandami, cangunataca shinlli tacurishpa cuidanajun.

¹³Paicuna imagutalla rurashcamandaca, ninanda alicachishpa, ninanda juyashpa charipanguichi nipanimi. Canguna purapash, casilla ali causaigutami charina canguichi.

¹⁴Huauquicuna, panicuna, yanga yanga causangapaj munajcunataca, shinlli tacurichunmi ninanda mañapanchi. Shinallata na catinayanllu nijcunatapash ayudapanguichi. Nara ali shinlli crijcunatapash yachachipanguichi. Pitapash ama ñapash fiñashpa yachachipaichi nipanchimi.

¹⁵Cangunata nalita rurashcamanda, maijambash ama chashnallata tigrachijuchun ricurianami canguichi. Ashtahuangarin caishuj chaishuj, tucuicunaman alitalla rurashpami catina canguichi.

¹⁶Punllandimi ninanda cushijushpa causana canguichi.

¹⁷Taita Diosta mañanataca, na saquinachu canguichi.

¹⁸Imamandapash Taita Diostaca, pashi ninajunallami canguichi. Cangunataca, Cristo Jesusmandami Taita Diosca, chashna causachun munan.

¹⁹Diospaj Espíritu imata nijujtapash, pactara jarcanguichiman.

²⁰Pactarallapash Dios ima nishcata villajcunata, yangapi churanguichiman.

²¹Ali cajta, nali cajta tucuita aliguta yarishpa uyapanguichi. Imatapash aliguta yachachishcatallami chasquina canguichi.

²²Tucui ima nalimandapash, jarcarinami canguichi.

²³Casilla ali causaiguta caraj Taita Diosllata paipajlla causanatapash carachun. Cangunapaj tucui causaita, espirituta, almata, cuerpotapash ama juchachi tucushca cachun, ñucanchi Apunchi Jesucristo tigramuna punllacaman alichishpa charichun.

²⁴Cangunata juyashpa cayaj Diosca, tucuita pactachij cashpami, cashna nishcataca tucuillata ruranga.

²⁵Huauquicuna, panicuna, ñucanchimanda Diosta mañapanguichi.

²⁶Tucui crijcunatami, ima nalitapash na yarishpa muchashpa, alillachu capangui nina canguichi.

²⁷Cai cartataca, Diospajlla causanajuj tucui crijcunapash uyachun leyipaichi nishpami, Apunchi Jesuspaj shutipi cangunata juramentuchini.

²⁸Ñucanchi Apunchi Jesucristopaj ninan juyaipash cangunahuan cachunmi munani. Shina cachun.