Read Imbabura Highland Quichua JOSUÉ 10 Bible Online

JOSUÉ 10 - Imbabura Highland Quichua bible

JOSUÉ 10

¹(Josueca, Jericó pueblopi causajcunatapash, paicunata jatun mandajtapash tucuchishcashnallatami, Hai shuti pueblopi causajcunatapash, paicunata jatun mandajtapash tucuchirca). Adonisedec shuti runaca, Hai shuti pueblota Josué japishpa llaquinayaita tucuchishcatami yacharca. Shinallata Gabaón shuti pueblopi causajcunapash, israelcunahuan casilla aliguta causangapaj ari ninajushpa, Israelpura tucushcatapashmi yacharca.

²Shina yachashpami, ninanda manllarca. Gabaón puebloca, jatun mandajcuna causana puebloshnalla jatumbachami carca. Chai puebloca, Hai shuti pueblota yali jatunmi carca. Chai pueblopi causaj tucui runacunapash, ninan shinllicunami carca.

³Chaita yachashpami, Jerusalén pueblota jatun mandaj Adonisedec shuti runaca, cai pueblocunata jatun mandajcunata cayachun cacharca: Hebrón shuti pueblota jatun mandaj Hoham shuti runata, Jarmut shuti pueblota jatun mandaj Piream shuti runata, Laquis shuti pueblota jatun mandaj Jafía shuti runata, Eglón shuti pueblota jatun mandaj Debir shuti runatami, cashna nishpa cayachun cacharca:

⁴“Gabaón pueblopi causajcunahuan macanajushpa, ñucata ayudangapaj vichai shamupaichi. Paicunaca, aliguta casilla causangapajmi, Josuehuambash, israelcunahuambash ari ninajushca” nishpami cacharca.

⁵Chaimandami Jerusalenda, Hebrón shuti pueblota, Jarmut shuti pueblota, Laquis shuti pueblota, Eglón shuti pueblota picha jatun mandajcuna tandanajurca. Shina tandanajushpami, chai mandajcunapash, paicunapaj tucuilla soldadocunandi, Gabaón puebloman vichai rirca. Shina rishpami, chai pueblo ladopi carpacunata shayachishpa, chai pueblopi causajcunahuan macanajunajurca.

⁶Chaimandami, Gabaón pueblopi causajcunaca, Gilgal pueblo ladopi carpacunata shayachishpa tiajuj Josueman cashna nishpa villachun cacharca: “Canda servijcunata ayudanataca, ama na nipaichu. Ñucanchita mitsashpa ayudangapaj ucha vichai shamupai. Jahua urcucunapi causaj amorreocunata tucuilla jatun mandajcunami tandanajushpa, ñucanchihuan macanajungapaj vichai shamushca” nishpa villachunmi cacharca.

⁷Chashna villajpimi Josueca, Gilgal pueblomanda vichai rirca. Macanajunata ali yachaj tucuilla runacunapash, ninan shinlli tucuilla soldadocunapashmi paihuan rinajurca.

⁸Mandaj Diosca, Josuetaca cashnami nirca: “Paicunataca, na manllanachu cangui. Ñucami, paicunataca cambaj maquipi churarcani. Paicuna puramandaca, pipash na canhuan macanajui ushangachu” nircami.

⁹Josueca, Gilgal pueblomanda tucui tuta vichai rishpami, chai soldadocunapajman cungashcapi chayarca.

¹⁰Mandaj Diosca, israelcunapaj ñaupajpica, ninanda manllana yuyaitami curca. Chaimandami israelcunaca, Gabaón pueblopica chugrichishpa ashtacatapacha huañuchirca. Pacajushpa rijcunataca, Bet-horón shuti puebloman vichai rina ñanda catishpami, Azeca shuti, Maceda shuti pueblocunacaman catishpa huañuchinajurca.

¹¹Israelcunata pacajushpa, Bet-horón shuti pueblomanda urai rina ñanman calpanajujpimi, Mandaj Diosca jahua pachamanda rumicunata, Azeca shuti pueblocaman paicunapaj jahuapi urmachimurca. Shina urmachimujpimi, chai runacunaca huañunajurca. Israelcuna espadahuan huañuchishcatapash yalimi, chai rundu rumicunahuanga huañurca.

¹²Shinamandami Josueca, amorreocunata israelcunapaj maquipi Mandaj Dios churashca punllapica, Mandaj Diostaca israelcunapaj ñaupajpi cashna nijurca: “Indi, Gabaón pueblo vichaipilla shayari. Shinallata can lunapash, Ajalón shuti pugru pamba vichaipilla shayari” nijurcami.

¹³Shina nijpimi indipash, lunapash shayarishpa quedarca. Israelcunata fiñajcuna llaquichishcashnallata, paicunatapash llaquichingacamanmi, chashna shayarirca. Indica, jahua pacha chaupipi shayarishpami, shuj punllatashna na ucha huashajurca. Chashna tucushcataca, ¿nachu Jaser nishca libropimi villajun?

¹⁴Chai punllashnaca punda punllacunapash, jipa punllacunapash na tiarcachu. Shuj runa mañashcata uyashpallami, Mandaj Diosca chashna rurarca. Chai punllapica Mandaj Diosca, israelcunamandami macajurca.

¹⁵Chai jipaca Josueca, Gilgal pueblopi shayanajuj carpacunaman tigrarcallami. Tucui israelcunapashmi, paihuan tigrarca.

¹⁶Chai picha jatun mandajcunaca, pacajungapaj calpashpami, Maceda shuti pueblo ladopi tiaj shuj utujupi pacajunajurca.

¹⁷Chai picha jatun mandajcunataca, Maceda shuti pueblo ladopi tiaj shuj utujupi pacajushpa tianajujta tarishcatami, Josueman villanajurca.

¹⁸Shina villajpimi, Josueca cashna nirca: “Jatun rumicunata t'angashpa apashpa, chai utujuman yaicunata quilpaichi. Chaipi paicunata cuidachunga, runacunata churaichi.

¹⁹Cangunaca, na chaipilla shayarinachu canguichi. Ashtahuangarin cangunata fiñajcunata catishpa ringuichilla. Shina catishpaca, pueblocunaman yaicuchunga na saquishpami, paicunata cuidajcunataca chugrichishpa huañuchina canguichi. Cangunata Mandaj Taita Diosmi, paicunataca cangunapaj maquipi churarca” nircami.

²⁰Josuehuan, israelcunahuan amorreo soldadocunata chugrichishpa ninanda huañuchishpa, tucuillata tucuchi punllapica, cashnami tucurca: Paicuna puramanda causaj quedashcacunaca, muyundi pircashca pueblocunapimi pacajugrirca.

²¹Chai jipami, israelcunaca shujllapash na huañushpa, na imapash tucushpallata Josuepajman tigramurca. Josueca, Maceda shuti pueblo ladopi carpacunapimi carca. Imata juchachishpa israelcunata rimangapajpash, pipash na tiarcachu.

²²Shinamandami Josueca, israelcunataca: “Utujupi vichashca chai picha jatun mandajcunataca llujchimugrichi” nirca.

²³Josué mandashcashnallatami israelcunaca, Jerusalén, Hebrón, Jarmut, Laquis, Eglón shuti pueblocunapaj picha jatun mandajcunataca, utujumanda llujchimurca.

²⁴Chai mandajcunata Josuepajman pushamujpimi Josueca, tucuilla Israel runacunata chaiman cayashpa, paihuan shamushca soldadocunata mandajcunataca, cashna nirca: “Caiman quimirishpa, cai mandajcunapaj cungapi saruichi” nirca. Shina nijpimi paicuna quimirishpaca, chai jatun mandajcunapaj cungapi sarunajurca.

²⁵Chaipimi Josueca, paicunataca cashna nirca: “Cangunaca na manllanachu canguichi, na chujchunachu canguichi. Ashtahuangarin shinlli tucushpa, na manllajcuna caichi. Cangunahuan macanajuj tucui cangunata fiñajcunataca, Mandaj Diosca chashnami ruranga” nircami.

²⁶Chai jipami Josueca, chai mandajcunataca chugrichishpa huañuchirca. Chashna huañuchishpaca, picha caspicunapi huarcuchunmi mandarca. Chai caspicunapica, amsayangacamanmi huarcurianajurca.

²⁷Ña indi huashajugrijpimi Josueca, chai huañushcacunataca caspimanda uriajuchishpa, paicuna pacajurianajushca utujupillata shitachun cacharca. Chaipi shitashpami, chai utujuman yaicunataca jatun rumicunahuan quilparca. Chai rumicunaca, cunan punllacamanmi shinallata tianajun.

²⁸Josueca chai punllallatami, Maceda shuti pueblota japirca. Shina japishpami, chaipi causajcunatapash, chai pueblota jatun mandajtapash, espadahuan chugrichishpa huañuchirca. Chai pueblopica, causaita tucui charijcunatami shujllatapash na saquishpa, tucuillata tucuchirca. Maceda shuti pueblota jatun mandajtapash, Jericó pueblota jatun mandajtashnallatami huañuchirca.

²⁹Maceda shuti pueblomandaca, tucui israelcunandimi Josueca, Libna shuti puebloman yalirca. Chaipimi, Libna shuti pueblopi causajcunahuambash macanajurca.

³⁰Mandaj Diosca, chai pueblotapash, jatun mandajtapashmi, israelcunapaj maquipi churarca. Chaimandami israelcunaca, chai pueblopi causajcunataca shujllatapash na saquishpa, causaita tucui charijcunataca, espadahuan chugrichishpa huañuchinajurca. Chai Libna shuti pueblota jatun mandajtapash, Jericó pueblota mandajtashnallatami huañuchirca.

³¹Libna shuti pueblomandapashmi Josueca, tucui israelcunandi, Laquis shuti puebloman yalirca. Chai pueblo ladopi carpacunata shayachishpami, chaipi causajcunahuan macanajurca.

³²Chai Laquis pueblotapash, israelcunapaj maquipi Mandaj Dios churajpimi, cayandi punllapica chai pueblota japirca. Shina japishpami chaipi causajcunataca, espadahuan chugrichishpa huañuchinajurca. Causaita tucui charijcunataca, Libna shuti pueblopi huañuchishcashnallatami huañuchinajurca.

³³Shinamandami, Gezer shuti pueblota jatun mandaj Horam shuti runaca, Laquis shuti pueblopi causajcunata ayudangapaj vichai rirca. Ashtahuangarin paitapash, paipaj soldadocunatapashmi Josueca, shujllatapash na saquishpa tucuchirca.

³⁴Laquis shuti pueblomandaca Josuepash, tucui israelcunapashmi, Eglón shuti puebloman yalirca. Chai pueblo ladollapi carpacunata shayachishpami, chaipi causajcunahuan macanajurca.

³⁵Chaimandami chai pueblotapash, chai punllapillata japishpa chaipi causajcunataca, espadahuan chugrichishpa huañuchinajurca. Chai punllapica, Laquis shuti pueblopi causajcunata rurashcashnallatami, causaita tucui charijcunata huañuchirca.

³⁶Chai jipami Josueca, tucui israelcunandi, Eglón shuti pueblomanda Hebrón shuti puebloman vichai rishpa, chaipi causajcunahuan macanajurca.

³⁷Hebrón shuti pueblotapash japishpami, paicunata jatun mandajtapash, pai mandajushca caishuj pueblocunapi causajcunatapash, causaita tucui charijcunataca, espadahuan chugrichishpa shujllatapash na saquishpa huañuchinajurca. Chaipi causajcunatapash, Eglón shuti pueblopi causajcunata rurashcashnallatami, causaita tucui charijcunataca tucuillata tucuchirca.

³⁸Chai jipami Josueca, tucui israelcunandi tigrashpa, Debir shuti puebloman chayarca. Chaiman chayashpami, chaipi causajcunahuan macanajurca.

³⁹Chai pueblotapash japishpami, paicunata jatun mandajtapash, chai mandaj mandajushca pueblocunapi causajcunatapash, espadahuan chugrichishpa huañuchinajurca. Causaita tucui charijcunataca, shujllatapash na saquishpami tucuchinajurca. Hebrón shuti pueblopi, Libna shuti pueblopi causajcunatapash, paicunata jatun mandajtapash rurashcashnallatami, Debir shuti pueblopi causajcunatapash, paicunata jatun mandajtapash huañuchinajurca.

⁴⁰Josueca, urcucunapi tiaj tucui llactacunapimi, chugrichishpa huañuchijurca. Neguev shuti pambapi, jatun pambacunapi, urcu vichaicunapi causajcunatapash, paicunata jatun mandajcunatapash, shujllatapash na saquishpami, tucuillata huañuchirca. Israelcunata Mandaj Taita Dios mandashcashnallatami, causaita tucui charijcunataca huañuchirca.

⁴¹Cades-barnea shuti pueblomanda callarishpaca, Gaza shuti pueblocaman, Gosén shuti llactamandapash, Gabaón shuti pueblocamanmi, Josueca chugrichishpa huañuchirca.

⁴²Tucui cai jatun mandajcunataca, paicuna mandanajuj llactacunandimi Josueca, shuj viajepilla tucuillata japirca. Israelcunata Mandaj Taita Dios israelcunamanda macanajujpimi, chashna japirca.

⁴³Chai jipami Josueca, Gilgal shuti pueblo ladopi paicunapaj carpacunaman tigrarca. Paihuanga, tucui israelcunapashmi tigrarca.