Read Imbabura Highland Quichua JOSUÉ 11 Bible Online

JOSUÉ 11 - Imbabura Highland Quichua bible

JOSUÉ 11

¹Chaicunata uyashpami, Hazor shuti pueblota jatun mandaj Jabín shuti runaca, Madón shuti pueblota jatun mandaj Jobab shuti runaman, Simrón shuti jatun mandajman, Acsaf shuti jatun mandajmambash villachun cacharca.

²Shinallata jahua lado urcucunapi tiaj llactacunata mandajcunamambash, Cineret shuti cucha ura lado Arabá shuti llactapi tiaj jatun pambacunapi causajcunata mandajcunamambash, indi huashajuj ladoman tiaj Dor shuti pueblota mandajmambashmi villachun cacharca.

³Indi llujshimuj, indi huashajuj ladocunaman causanajuj cananeocunamambash, urcucunapi causanajuj amorreo, heteo, ferezeo, jebuseo nishca gentecunamambash, Mizpa shuti llactapi tiaj Hermón shuti urcu chaquipi causanajuj heveocunamambashmi villachun cacharca.

⁴Paicunami, paicunapaj tucui soldadocunandi llujshimunajurca. Paicunaca, mama cucha manñapi tiaj t'iyu alpashna ashtaca gentecunami, ashtacapacha caballocunandi, macanajuna carretacunandi llujshimunajurca.

⁵Tucuilla chai mandajcunami tandanajurca. Paicunaca, israelcunahuan macanajungapaj shamushpami, Merom shuti yacu ladopi carpacunata shayachishpa tandanajushpa tianajurca.

⁶Ashtahuangarin Mandaj Diosca, Josuetaca cashnami nirca: “Paicunataca na manllanachu canguichi. Paicunataca, caya cai horasllatami, can israelcunapaj ñaupajpi churajpi, ña huañuchinallacunata cusha. Caballocunapaj chaqui angucunatapashmi fitinguichi. Macanajuna carretacunatapashmi rupachinguichi” nircami.

⁷Josueca, paipaj tucuilla soldadocunandimi, chai gentecunahuan macanajungapaj, cungashcapi Merom shuti yacu ladoman shamurca.

⁸Israelcunapaj maquipi Mandaj Dios churajpimi, chai gentecunataca chugrichishpa huañuchinajurca. Paicunataca, Sidón shuti jatun pueblocaman, Misrefot-maim shuti pueblocaman, indi llujshimuj ladoman tiaj Mizpa shuti pugru pambacaman catishpami, shujllatapash na saquishpa chugrichishpa huañuchinajurca.

⁹Josueca, Mandaj Dios mandashcashnallatami, paicunataca huañuchirca. Paicunapaj caballocunapaj chaqui angucunatapash fitishpami, macanajuna carretacunatapash rupachirca.

¹⁰Josueca, chai punllacunallata Hazor shuti puebloman tigrashpami, chai pueblota japishpa, chaipi jatun mandajtapash espadahuan huañuchirca. Hazor shuti pueblota jatun mandajta nara huañuchijpica, paica chai tucui pueblocunata jatun mandajcunataca umashna pushajmi carca.

¹¹Chaipica, causaita tucui charijcunatami, espadahuan huañuchishpa tucuillata tucuchirca. Shujllatapash causajtaca na saquishpa, tucuillata huañuchishpami, Hazor shuti pueblotapash rupachirca.

¹²Shinallata Josueca, chai jatun mandajcunapaj tucui pueblocunata, chaipi tucui jatun mandajcunata japishpami, chai jatun mandajcunataca, espadahuan chugrichishpa huañuchirca. Mandaj Diosta servij Moisés mandashcashnallatami, paicunataca huañuchishpa tucuchirca.

¹³Ashtahuangarin israelcunaca, lomacunapi tiaj tucuilla pueblocunataca, na rupachircachu. Hazor shuti pueblotallami, Josueca rupachirca.

¹⁴Israelcunaca, chai pueblocunapi tucui imalla tiajcunatapash, animalcunatapashmi japinajurca. Ashtahuangarin chaipi causanajuj gentecunataca, shujllatapash na causajta saquishpami, tucuillata espadahuan huañuchishpa tucuchinajurca.

¹⁵Imashnami Mandaj Diosca paita servij Moisesta mandarca, chashnallatami Moisespash Josuetaca mandarca. Chaimandami Josueca, Mandaj Dios Moisesta mandashcataca, shuj shimitallapash na saquishpa, tucuillata pactachirca.

¹⁶Josueca, tucui cai llactacunatami japirca: Urcupi tiaj llactacunata, Neguev shuti tucui pambata, Gosén shuti tucui llactata, jatun pambacunata, Arabá shuti llactata, Israel llacta urcucunataca, chai pugru pambacunandimi japirca.

¹⁷Seir shuti llactaman vichai rina Halac shuti urcumanda callarishpaca, Líbano shuti jatun pambapi tiaj Baal-gad shuti llactacaman, Hermón shuti urcu manñacamanmi japinajurca. Shinallata paicunapaj tucui jatun mandajcunatapash japishpami, chugrichishpa huañuchirca.

¹⁸Josueca, chai jatun mandajcunahuanga, unai huatacunatami macanajurca.

¹⁹Israelcunahuan casilla aliguta causanata munaj puebloca, na tiarcachu. Ashtahuangarin Gabaón pueblopi causanajuj heveocunallami, israelcunamandaca quishpirirca. Chaimanda caishuj pueblocunataca, macanajushpa mishashpami tucuillata japirca.

²⁰Paicunataca, israelcunahuan macanajuchunmi, Mandaj Diosllata shinlli shunguta rurarca. Pai Mandaj Dios, Moisesta mandashcashnallatami, chai llactapi causajcunataca na llaquishpa, sapimanda llujchishpa shitanshna, tucuicunata huañuchirca.

²¹Shinallata Josuepash, chai huatacunapillata shamushpami Hebrón, Debir, Anab shuti urcucunapi, Judá aillupaj tucui urcucunapi, israelcunapaj tucui urcucunapi causanajuj anaceo nishca gentecunataca, tucuicunata huañuchishpa tucuchirca. Josueca, chai anaceocunataca, paicunapaj pueblocunandimi tucuchirca.

²²Anaceo nishca puramandaca, israelcunapaj llactapica shujllapash na quedarcachu. Chai anaceocunaca, Gaza, Gat, Asdod shuti pueblocunapillami causaj quedanajurca.

²³Mandaj Dios, Moisesta imashna mandashcashnallatami Josueca, tucuilla chai llactacunataca japirca. Chai llactacunataca israelcunamanmi, tucui aillucuna mashnapura cashcashnallata, paicuna japichun chaupishpa curca. Shinami chai llactapica, cutinga na macanajushpa samarca.