Read Imbabura Highland Quichua JOSUÉ 12 Bible Online

JOSUÉ 12 - Imbabura Highland Quichua bible

JOSUÉ 12

¹Israelcunaca, Jordán yacu chimbamandaca, indi llujshimuj ladocamanmi llactacunata japinajurca. Arnón shuti jatun larca yacumanda callarishpa, Hermón shuti urcucaman, shinallata indi llujshimuj ladoman tiaj Arabá shuti tucui pambacamanmi japinajurca. Cai llactacunata jatun mandajcunatami, israelcunaca misharca:

²Amorreocunata jatun mandaj Sehón shuti runaca, Hesbón shuti pueblopimi causajurca. Paica, Arnón shuti jatun larca yacu manñapi tiaj Aroer shuti pueblomanda callarishpaca, pugru pamba chaupicaman, Galaad llacta chaupicaman, shinallata Jaboc shuti jatun larca yacu ladocamanmi mandajurca. Chai yacuca, Amón shuti llactapaj linderomi.

³Indi llujshimuj ladoman, Arabá shuti pambataca, Cineret shuti mama cucha ladocamanmi mandajurca. Shinallata indi llujshimuj ladomanllata, Cachi tiaj Arabá shuti mama cucha ladocamambashmi mandajurca. Bet-jesimot shuti puebloman rina ñangunamambash, urai ladomandaca, Pisga shuti loma chaqui vichaicamambashmi mandajurca.

⁴Basán shuti llactata jatun mandaj Og shuti runaca, refaíta nishca puramanda puchushcami carca. Paica, Astarot shuti, Edrei shuti pueblocunapimi causajurca.

⁵Paica, cai llactacunatami mandajurca: Hermón shuti urcupi tiaj llactatapash, Salca shuti llactatapash, Basán shuti tucuilla llactatapash, Gesur shuti llactahuan, Maaca shuti llactahuan lindero ladocamanmi mandajurca. Shinallata chaupi Galaad llactatapash, Hesbón shuti pueblota jatun mandaj Sehón shuti runa mandajuj llacta linderocamanmi mandajurca.

⁶Chai jatun mandajcunatami, Mandaj Diosta servij Moisespash, israelcunapash misharca. Shina mishashpami, chai llactacunataca, Mandaj Diosta servij Moisesca, Rubenbaj, Gadpaj aillucunamambash, Manasespaj chaupi aillumambash curca.

⁷Josuehuan israelcunahuanga, Jordán yacu cai ladomandaca, indi huashajuj ladoman tiajuj llactacunatami misharca. Paicunaca, cai jatun mandajcunatami misharca: Líbano shuti pambapi tiajuj Baal-gad shuti llactamanda, Seir shuti urcuman vichai rina Halac shuti urcucamanmi misharca. Josueca, chai llactacunataca Israel aillucunamanmi, mashnapura cashcashnallata paicunapaj alpacuna cachun, chaupishpa curca.

⁸Shina cujpimi urcucunapi, pugru pambacunapi, Arabá shuti pambapi, urcu vichaicunapi, jichushca pambapi, Neguev pambapi alpacunata japinajurca. Chai llactacunapica heteo, amorreo, cananeo, ferezeo, heveo, jebuseo nishca gentecunami causanajushca carca.

⁹Cai jatun mandajcunatami, huañuchinajurca: Jericó pueblota jatun mandajta, Bet-el shuti pueblo ladollapi tiaj Hai shuti pueblota jatun mandajta,

¹⁰Jerusalén pueblota jatun mandajta, Hebrón shuti pueblota jatun mandajta,

¹¹Jarmut shuti pueblota jatun mandajta, Laquis shuti pueblota jatun mandajta,

¹²Eglón shuti pueblota jatun mandajta, Gezer shuti pueblota jatun mandajta,

¹³Debir shuti pueblota jatun mandajta, Geder shuti pueblota jatun mandajta,

¹⁴Horma shuti pueblota jatun mandajta, Arad shuti pueblota jatun mandajta,

¹⁵Libna shuti pueblota jatun mandajta, Adulam shuti pueblota jatun mandajta,

¹⁶Maceda shuti pueblota jatun mandajta, Bet-el shuti pueblota jatun mandajta,

¹⁷Tapúa shuti pueblota jatun mandajta, Hefer shuti pueblota jatun mandajta,

¹⁸Afec shuti pueblota jatun mandajta, Sarón shuti pueblota jatun mandajta,

¹⁹Madón shuti pueblota jatun mandajta, Hazor shuti pueblota jatun mandajta,

²⁰Simron-merón shuti pueblota jatun mandajta, Acsaf shuti pueblota jatun mandajta,

²¹Taanac shuti pueblota jatun mandajta, Meguido shuti pueblota jatun mandajta,

²²Cedes shuti pueblota jatun mandajta, Carmelo shuti urcu ladopi tiaj Jocneam pueblota jatun mandajta,

²³Dor shuti llactapi tiaj Dor shuti pueblota jatun mandajta, Gilgal shuti pueblopi tiaj Goim pueblota jatun mandajta,

²⁴Tirsa shuti pueblota jatun mandajtami huañuchinajurca. Tucuimandaca, quimsa chunga shuj jatun mandajcunatami huañuchirca.