Read Imbabura Highland Quichua JOSUÉ 17 Bible Online

JOSUÉ 17 - Imbabura Highland Quichua bible

JOSUÉ 17

¹Josepaj punda churi cajpimi, Manasés aillumambash suertecunata rurarca. Shina rurajpimi, Galaad shuti, Basán shuti llactacunaca, paicunapaj urmarca. Manasespaj punda churi Maquir shuti runaca, Galaad llactapi causajcunapaj punda taitami carca. Paica, macanajunata ali yachaj runami carca.

²Shinallata Manasespaj caishuj churicunamambash, paicunapaj familiacuna imashna cashcashnallatami, suertecunata rurarca. Manasespaj churicunaca, caicunami: Abiezer, Helec, Asriel, Siquem, Hefer, Semida shuticunami carca. Paicunaca, Josepaj nietocunami carca. Chai churicunamambash, paicunapaj familiacuna imashna cashcashnallatami, alpacunata cungapaj suertecunata rurarca.

³Maquir shuti runaca, Manasespaj churimi carca. Galaad shuti runaca, Maquir shuti runapaj churimi carca. Hefer shuti runaca, Galaad shuti runapaj churimi carca. Zelofehad shuti runaca, Hefer shuti runapaj churimi carca. Zelofehad shuti runaca, jari huahuacunata na charircachu, ushicunatallami charirca. Paicunaca: Maala, Noa, Hogla, Milca, Tirsa shuticunami carca.

⁴Chai ushicunami, Eleazar shuti curapajman, Nun shuti runapaj churi Josuepajman, israelcunata mandajcunapajman shamushpa cashna ninajurca: “Mandaj Diosca, ñucanchi huauquicunaman cushca ladopillata alpacunata ñucanchiman cuchunmi, Moisesta mandarca” ninajurcami. Shina nijpimi Josueca, Mandaj Dios mandashcashnallata, paicunapaj taitapaj huauquicunaman cushca ladopillata alpacunata curca.

⁵Chaimandami Manasespaj miraicunaca, Jordán yacu chimba ladopi Galaad shuti, Basán shuti llactacunata japinajushca jahuapash, chunga pushtupi alpacunata japinajurcara.

⁶Manasés aillu purapica, paicunapaj ushicunapashmi alpacunata japinajurca. Shinamandami, Galaad llactapi alpacunataca, Manasespaj caishuj miraicuna japinajurca.

⁷Manasés aillupaj alpacunaca, caicunami carca: Aser shuti pueblomandaca, Siquem shuti pueblo chimba purapi Micmetat shuti pueblocamanmi carca. Urai ladoman rishpaca, Tapúa shuti pueblopi causajcunapaj ladocamanmi carca.

⁸Tapúa shuti pueblopi causajcunapaj alpacunaca, Manasés aillupaj llactami. Shina cajpipash Manasespaj llactahuan lindero ladollapi Tapúa shuti pueblopachaca, Efrainbaj miraicunapajmi carca.

⁹Chai linderoca, Caná shuti jatun larca yacuman urai rishpami, chai yacumandaca uraiman yalijun. Efraín llacta pueblocunaca, Manasespaj pueblo puracunapimi. Manasespaj llactapaj linderoca, chai jatun larca yacumanda jahuamanmi. Chai yacuca, mama cuchamanmi chayajun.

¹⁰Efrainbaj llactaca, Caná shuti yacumanda urai ladomanmi. Manasespaj llactaca, chai yacumanda jahua ladomanmi. Chai llactacunapaj linderoca, mama cuchahuanmi tuparijun. Manasespaj llactaca, Aser shuti llactahuanmi jahua ladoman tuparijun. Indi llujshimuj ladomanga, Isacar shuti llactahuanmi tuparijun.

¹¹Manasés ailluca, Isacar shuti, Aser shuti llactacunapica, cai pueblocunatapashmi charirca: Bet-seán shuti, Ibleam shuti pueblocunatami, uchilla llactacunandi charirca. Dor shuti pueblopi causajcunapash, uchilla llactacunandi, Endor shuti pueblopi causajcunapash, uchilla llactacunandi, Taanac shuti pueblopi causajcunapash, uchilla llactacunandi, Meguido shuti pueblopi causajcunapash, uchilla llactacunandimi paicunapaj carca. Chai llactacunaca, quimsa jatun llactacunami.

¹²Ashtahuangarin Manasespaj miraicunaca, chai pueblocunapi causanajuj cananeocunataca, na llujchishpa cachai usharcachu. Chaimandami cananeocunaca, chai llactacunamanda napacha llujshishpa causanajurca.

¹³Shina cajpipash israelcunaca, ashtahuan shinllicuna tucushpami cananeocunataca, impuestota japinajurca. Ashtahuangarin chai llactamandaca, na llujchishpa cacharcachu.

¹⁴Josepaj miraicunaca, Josuetaca cashnami ninajurca: —Ñucanchica, cunangaman Taita Dios bendiciajpimi, ashtaca gentecacuna canchi. Shina cashpaca, ¿imashpata ñucanchi japichunga, shuj suertetalla rurashpa, shuj asha alpatalla curcangui?— ninajurcami.

¹⁵Shina nijpimi Josueca, cashna nishpa tigrachirca: —Canguna ashtaca gentecuna cashpa, canguna causangapaj Efraín urcu na pactajpica, ferezeocuna, refaitacuna causanajuj llactacunapi sachacunaman vichai rishpa, sachacunata urmachigrichilla— nircami.

¹⁶Shina nijpimi Josepaj miraicunaca, cashna ninajurca: —Chai urcupash, ñucanchipaca na pactangachu. Chai jatun pamba llactacunapi causanajuj tucui cananeocunapash macanajungapaca, jirru carretacunatami charin. Bet-seán shuti pueblo muyundi uchilla llactacunapi causajcunapash, Jezreel shuti pugru pambapi causajcunapashmi, chashnallata charin— ninajurcami.

¹⁷Shina nijpimi Josueca, Josepaj, Efrainbaj, Manasespaj miraicunaman cashna nishpa tigrachirca: —Cangunaca, ashtaca gentecuna cashpami, ninan shinllicuna canguichi. Shina cashcamandami, na shuj pushtupilla alpacunata japinguichi.

¹⁸Ashtahuangarin chai urcupash, cangunapajmi canga. Chai urcupica, sachacuna cajpipash, cangunami sachacunata urmachishpa, ashtahuan caru linderocaman cangunapaj cachun japinguichi. Shinallata chai llactapi causajcunaca, jirru carretacunata charijpipash, ninan shinllicuna cajpipash, cangunami cananeocunataca llujchishpa cachanguichi— nircami.